ಬೆಂಗಳೂರು: ರಾಜ್ಯಾದ್ಯಂತ ಇಂದು ಎಸ್ಎಸ್ಎಲ್ಸಿ ಪೂರಕ ಪರೀಕ್ಷೆ ಫಲಿತಾಂಶ ಪ್ರಕಟಗೊಂಡಿದೆ. 53,155 ವಿದ್ಯಾರ್ಥಿಗಳ ಪೈಕಿ 29,522 ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದು, ಶೇ.55.54ರಷ್ಟು ಫಲಿತಾಂಶ ಬಂದಿದೆ. ಶಿಕ್ಷಣ ಸಚಿವ ಬಿ.ಸಿ.ನಾಗೇಶ್ ಶಿಕ್ಷಣ ಇಲಾಖೆಯಲ್ಲಿ ಫಲಿತಾಂಶ ಪ್ರಕಟಿಸಿದರು. ಎಸ್ಎಸ್‌ಎಲ್‌ಸ್ ಬೋರ್ಡ್ ನಿರ್ದೇಶಕಿ ಸುಮಂಗಲ ಈ ವೇಳೆ ಉಪಸ್ಥಿತರಿದ್ದರು.
ಸಾಂಕ್ರಾಮಿಕ ಕೋವಿಡ್‌ ಹಿನ್ನೆಲೆಯಲ್ಲಿ 2020-21ರ ಎಸ್ಎಸ್ಎಲ್ಸಿ ಪರೀಕ್ಷೆಯನ್ನು ನಡೆಸಬೇಕೇ ಬೇಡವೇ? ಎಂಬ ಬಗ್ಗೆ ಸಾಕಷ್ಟು ಚರ್ಚೆ ನಡೆದಿದ್ದವು. ಎಸ್ಎಸ್ಎಲ್ಸಿ ವಿದ್ಯಾರ್ಥಿಗಳನ್ನು ಪರೀಕ್ಷೆ ಇಲ್ಲದೇ ಪಾಸ್ ಮಾಡುವುದು ಹಾಗೂ ಅವರ ಕಲಿಕಾ ಮಟ್ಟ ನಿರ್ಧಾರ ಮಾಡುವುದು ಕಷ್ಟವಾಗಿತ್ತು. ಇದಕ್ಕೆ ಕಾರಣ, ಕಳೆದ ವರ್ಷ 9ನೇ ತರಗತಿಯ ಪರೀಕ್ಷೆಯೇ ನಡೆದಿರಲಿಲ್ಲ. ಹಾಗಾಗಿ, ಯಾವುದೇ ಮಾನದಂಡ ಇಲ್ಲದೇ ಇರುವುದರಿಂದ ಪರೀಕ್ಷೆ ನಡೆಸುವುದು ಅನಿವಾರ್ಯವಾಗಿತ್ತು.
ಇವೆಲ್ಲದರ ನಡುವೆ ಜುಲೈ 19-22ರಂದು ಪರೀಕ್ಷೆ ನಡೆಸಲಾಗಿತ್ತು. ಎಸ್ಎಸ್ಎಲ್ಸಿ ಪರೀಕ್ಷೆಯನ್ನು ವಿಶೇಷ ರೀತಿಯಲ್ಲಿ ಪ್ರಶ್ನೆ ಪತ್ರಿಕೆ ಮಾದರಿ ಬದಲಾಯಿಸಿ ಬಹುಆಯ್ಕೆ ಪ್ರಶ್ನೆಗಳನ್ನು ನೀಡಿ ನಡೆಸಲಾಗಿತ್ತು. ಅದು ಕೂಡ 6 ದಿನಗಳ ಪರೀಕ್ಷೆಗೆ ಕತ್ತರಿ ಹಾಕಿ, ವಿಷಯವಾರು ಮೂಲಕ ಎರಡೇ ದಿನ ಪರೀಕ್ಷೆ ನಡೆಸಲಾಗಿತ್ತು. ಈ ನಡುವೆ ಬಹಷ್ಟು ವಿದ್ಯಾರ್ಥಿಗಳು ಕೊರೊನಾ ಭೀತಿಗೆ ಹೆದರಿ ಮೊದಲ ಆಯೋಜನೆಯಲ್ಲಿ ಪರೀಕ್ಷೆ ತೆಗೆದುಕೊಳ್ಳಲು ಹಿಂದೇಟು ಹಾಕಿದ್ದರು. ಬದಲಿಗೆ ಮುಂದಿನ ಸಲ ಪರೀಕ್ಷೆ ಬರೆಯುವುದಾಗಿ ತಿಳಿಸಿದ್ದರು. ಪರಿಣಾಮ ಸೆಪ್ಟೆಂಬರ್ 27-29 ರಂದು ಸುಮಾರು 53,155 ವಿದ್ಯಾರ್ಥಿಗಳಿಗೆ ಪೂರಕ ಪರೀಕ್ಷೆ ನಡೆಸಲಾಗಿತ್ತು.
ಪೂರಕ ಪರೀಕ್ಷೆ ಬರೆದವರಿಗೆ ಯಾಕಿಲ್ಲ ಗ್ರೇಸ್ ಮಾರ್ಕ್ಸ್?
ಜುಲೈನಲ್ಲಿ ಪರೀಕ್ಷೆ ಬರೆದವರನ್ನು ಕೊರೊನಾ ಆತಂಕದ ಕಾರಣಕ್ಕೆ ಯಾರನ್ನೂ ಫೇಲ್ ಮಾಡೋದಿಲ್ಲ. ಬದಲಿಗೆ ಕಡಿಮೆ ಅಂಕಗಳಿಸಿದ್ದ ವಿದ್ಯಾರ್ಥಿಗಳಿಗೆ ಗ್ರೇಸ್ ಮಾರ್ಕ್ಸ್ ಕೊಟ್ಟು ಎಲ್ಲರನ್ನೂ ಪಾಸ್ ಮಾಡಲಾಗಿತ್ತು. ಆದರೆ ಈ ಸಲ ಪರೀಕ್ಷೆ ಬರೆದು ಫೇಲ್ ಆದವರಿಗೆ ಗ್ರೇಸ್ ಮಾರ್ಕ್ಸ್ ನೀಡಿಲ್ಲ. ಬದಲಿಗೆ ಪೂರಕ ಪರೀಕ್ಷೆ ತೆಗೆದುಕೊಂಡ 23,655 ವಿದ್ಯಾರ್ಥಿಗಳು ಫೇಲ್ ಆಗಿದ್ದಾರೆ. ಸಾಕಷ್ಟು ವಿದ್ಯಾರ್ಥಿಗಳು ಪರೀಕ್ಷೆ ಬರೆದರೆ ಪಾಸ್ ಎಂದುಕೊಂಡವರಿಗೆ ನಿರಾಸೆಯಾಗಿದೆ.
'ಮುಂದಿನ ಸಲ ಪರೀಕ್ಷೆ ಬರೆಯಬಹುದು'
ಈ ಕುರಿತು ಮಾತನಾಡಿದ ಸಚಿವ ನಾಗೇಶ್, ಈ ಹಿಂದಿನ ಆದೇಶದಲ್ಲೇ ಪೂರಕ ಪರೀಕ್ಷೆ ಬರೆದವರಿಗೆ ಅವರು ಪಡೆದ ಅಂಕವನ್ನೇ ಫೈನಲ್ ಎಂದು ತಿಳಿಸಲಾಗಿತ್ತು. ಈಗ ಫೇಲ್ ಆದವರೆಲ್ಲಾ ಮುಂದಿನ ಸಲ ಪರೀಕ್ಷೆ ಬರೆಯಬಹುದು. ಅವರಿಗೆ ಗ್ರೇಸ್ ಮಾರ್ಕ್ಸ್ ನೀಡುವುದಿಲ್ಲ ಎಂದು ತಿಳಿಸಿದ್ದಾರೆ.
ಬೋರ್ಡ್ ನಿರ್ದೇಶಕಿ ಸುಮಂಗಲ ಮಾತನಾಡಿ, ಮೊದಲ ಪರೀಕ್ಷೆ ಬರೆದಿದ್ದವರಿಗೆ ಅಷ್ಟೇ ಪಾಸ್ ಆಗಲು ಮುಕ್ತ ಅವಕಾಶ ಕಲ್ಪಿಸಲಾಗಿತ್ತು. ಆ ಅವಕಾಶ ಉಪಯೋಗಿಸಿಕೊಳ್ಳುವುದು, ಬಿಡುವುದು ವಿದ್ಯಾರ್ಥಿಗಳಿಗೆ ಬಿಟ್ಟಿದ್ದು. ಯಾರು ಅವಕಾಶ ಉಪಯೋಗಿಸಿಕೊಂಡಿಲ್ಲ ಅವರಿಗೆ ಮುಂದಿನ ಪರೀಕ್ಷೆ ಬರೆಯಲು ಅವಕಾಶ ಕೊಡುವುದಾಗಿ ಹೇಳಿದ್ದೇವೆಯೇ ಹೊರತು, ಎಲ್ಲರನ್ನೂ ಪಾಸ್ ಮಾಡುತ್ತೇವೆ ಅಂತ ಹೇಳಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.
ಮ.3 ಗಂಟೆಯ ಬಳಿಕ ಎಸ್ಎಂಎಸ್ ಮೂಲಕ ಫಲಿತಾಂಶ
ವಿದ್ಯಾರ್ಥಿಗಳ ನೋಂದಾಯಿತ ಮೊಬೈಲ್ ಸಂಖ್ಯೆಗೆ ಫಲಿತಾಂಶವನ್ನು ಮಧ್ಯಾಹ್ನ 3 ಗಂಟೆಯ ನಂತರ ಎಸ್ಎಂಎಸ್ ಮೂಲಕ ರವಾನಿಸಲಾಗುತ್ತೆ. Kseeb.Karnataka.gov.in ಅಥವಾ sslcseptresults ಹಾಗೂ karresults.nic.in ನಲ್ಲಿಯೂ ಫಲಿತಾಂಶ ವೀಕ್ಷಿಸಬಹುದಾಗಿದೆ.
ನಗರ ಫಲಿತಾಂಶ
ನೋಂದಣಿ- ಉತ್ತೀರ್ಣ
22,757 - 10968
ಗ್ರಾಮೀಣ ಭಾಗ
30,398 -18 554
ಅಭ್ಯರ್ಥಿವಾರು ಫಲಿತಾಂಶ
ಹೊಸ ವಿದ್ಯಾರ್ಥಿಗಳು - 18,417ರಲ್ಲಿ 9182 ವಿದ್ಯಾರ್ಥಿಗಳು ಪಾಸ್
ಪುನರಾವರ್ತಿತ ಅಭ್ಯರ್ಥಿಗಳು 23,334ರಲ್ಲಿ 13,866 ವಿದ್ಯಾರ್ಥಿಗಳು ಪಾಸ್
ಹೊಸ ಖಾಸಗಿ ಅಭ್ಯರ್ಥಿಗಳು- 295ರಲ್ಲಿ 113 ಮಂದಿ ಪಾಸು
ಪುನರಾವರ್ತಿತ ಖಾಸಗಿ ಅಭ್ಯರ್ಥಿಗಳು- 7,857ರಲ್ಲಿ 4,288 ಮಂದಿ ಪಾಸ್
ಪುನರಾವರ್ತಿತ ಅಭ್ಯರ್ಥಿಗಳು- 2946 ರಲ್ಲಿ 1915 ಮಂದಿ ಪಾಸ್
ಪುನರಾವರ್ತಿತ ಖಾಸಗಿ ಅಭ್ಯರ್ಥಿಗಳು- 306ರಲ್ಲಿ 158 ಮಂದಿ ಪಾಸ್
ಬಾಲಕಿಯರದ್ದೇ ಮೇಲುಗೈ
ಪೂರಕ ಪರೀಕ್ಷೆಯಲ್ಲೂ ಬಾಲಕಿಯರದ್ದೇ ಮೇಲುಗೈ
35,182 ಬಾಲಕರಲ್ಲಿ 19,232 ಮಂದಿ ಪಾಸ್
17,973 ಬಾಲಕಿಯರಲ್ಲಿ 10,290 ಮಂದಿ ಪಾಸ್
ಹೆಚ್ಚು ಅಂಕ ಪಡೆದವರು
625/ 599 ಆಳ್ವಾಸ್ ಇಂಗ್ಲಿಷ್ ಸ್ಕೂಲ್ - ಪುತ್ತೂರು ವಿದ್ಯಾರ್ಥಿ- ಗ್ರೀಷ್ಮಾ ನಾಯಕ್ ಮೊದಲ ರ್ಯಾಂಕ್
625/ 592 ಕಲಬುರಗಿ ವಿದ್ಯಾರ್ಥಿ - ಗ್ರಾಮರ್ ಮಲ್ಟಿ ಮೀಡಿಯಾ ಹೈಸ್ಕೂಲ್- ಎರಡನೇ ರ್ಯಾಂಕ್
625/591- ಮೈಸೂರು ವಿದ್ಯಾರ್ಥಿ - ಮೂರನೇ ರ್ಯಾಂಕ್
625/580 - ಕಲಬುರಗಿ - ಇಂದ್ರಜಿತ್ ಸಿಂಗ್ - ನಾಲ್ಕನೇ ರ್ಯಾಂಕ್
625/577- ಕನಕಪುರ - ಕೆಂಪಯ್ಯ- ಐದನೇ ರ್ಯಾಂಕ್
ಸರ್ಕಾರಿ ಶಾಲೆಯಲ್ಲಿ ಉತ್ತಮ ಫಲಿತಾಂಶ
ಈ ಬಾರಿ ಸರ್ಕಾರಿ ಶಾಲೆಯ ಮಕ್ಕಳು ಹೆಚ್ಚು ಅಂಕವನ್ನು ಗಳಿಸಿದ್ದಾರೆ. ಸರ್ಕಾರದ 3,232 ಶಾಲೆಗಳಿಂದ 27,313 ವಿದ್ಯಾರ್ಥಿಗಳು ಹಾಜರಾಗಿ ಶೇ.58.05 ರಷ್ಟು (15,855 ವಿದ್ಯಾರ್ಥಿಗಳು) ಉತ್ತೀರ್ಣರಾಗಿದ್ದಾರೆ. ಅನುದಾನಿತ 2,355 ಶಾಲೆಯಲ್ಲಿ 16,736 ವಿದ್ಯಾರ್ಥಿಗಳು ಹಾಜರಾಗಿ ಶೇ.54.08 ರಷ್ಟು 9,050 ಉತ್ತೀರ್ಣರಾಗಿದ್ದಾರೆ. ಅನುದಾನ ರಹಿತ 2,151 ಶಾಲೆಯಲ್ಲಿ 9,106 ವಿದ್ಯಾರ್ಥಿಗಳು ಹಾಜರಾಗಿ ಶೇ.50.07 ರಷ್ಟು 4617 ಉತ್ತೀರ್ಣರಾಗಿದ್ದಾರೆ.
