ಬೆಂಗಳೂರು : ಖ್ಯಾತ ಪುಸ್ತಕ ಮಳಿಗೆ ಸಪ್ನಾ ಬುಕ್ಹೌಸ್ ಆರಂಭಿಸಿದ ಸುರೇಶ್ ಶಾ ಅನಾರೋಗ್ಯದಿಂದ ಮೃತಪಟ್ಟಿದ್ದಾರೆ. 1996ರಲ್ಲಿ ಮೆಜೆಸ್ಟಿಕ್ ಬಳಿ ಸಣ್ಣದಾಗಿ ಆರಂಭಿಸಿದ ಪುಸ್ತಕ ಮಳಿಗೆ ನಂತರ 19 ಶಾಖೆಗಳನ್ನು ಆರಂಭಿಸಿ ಅತಿದೊಡ್ಡ ಪುಸ್ತಕ ಮಳಿಗೆ ಎಂಬ ಖ್ಯಾತಿ ಹೊಂದಿದೆ.
ಓದಿ: ಕರ್ನಾಟಕದಲ್ಲಿ 'ಯಾಸ್' ಚಂಡಮಾರುತದ ಎಫೆಕ್ಟ್: ಬೆಂಗಳೂರಲ್ಲಿ ವರುಣಾರ್ಭಟ
84 ವರ್ಷ ವಯಸ್ಸಾಗಿದ್ದ ಸುರೇಶ್ ಅವರು, ವಯೋಸಹಜ ಅನಾರೋಗ್ಯದಿಂದ ಚೇತರಿಸಿಕೊಳ್ಳಲಾಗದೆ ಶೇಷಾದ್ರಿಪುರಂ ಸಾಗರ್ ಅಪೊಲೊ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದಾರೆ.
ಬುಧವಾರ ಬೆಳಗ್ಗೆ ಹರಿಶ್ಚಂದ್ರ ಘಾಟ್ ರುದ್ರಭೂಮಿಯಲ್ಲಿ ಅಂತ್ಯಸಂಸ್ಕಾರ ನೆರವೇರಲಿದೆ ಎಂದು ಸಪ್ನ ಬುಕ್ಹೌಸ್ ಪ್ರಕಟಣೆಯಲ್ಲಿ ತಿಳಿಸಿದೆ.
ಕನ್ನಡ ಪುಸ್ತಕ ಸಂಸ್ಕೃತಿಗೆ ಗಮನಾರ್ಹ ಕೊಡುಗೆ ಕೊಟ್ಟ ಸುರೇಶ್ ಶಾ ಅವರ ನಿಧನಕ್ಕೆ ಅರಣ್ಯ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಚಿವ ಅರವಿಂದ ಲಿಂಬಾವಳಿ ಸಂತಾಪ ಸೂಚಿಸಿದ್ದಾರೆ.
ಕನ್ನಡ ಪುಸ್ತಕಗಳ ಪ್ರಕಟಣೆ ಮತ್ತು ಮಾರಾಟಕ್ಕೆ ಸಪ್ನಾ ಬುಕ್ಹೌಸ್ ಕೊಟ್ಟ ಕೊಡುಗೆ ದೊಡ್ಡದು. ರಾಜ್ಯದ ಪುಸ್ತಕೋದ್ಯಮಕ್ಕೆ ಹೊಸ ಸಾಧ್ಯತೆಗಳನ್ನು ಪರಿಚಯಿಸಿತು. ಅವರ ಅಗಲಿಕೆಯ ದುಃಖ ಭರಿಸುವ ಶಕ್ತಿ ಅವರ ಕುಟುಂಬಕ್ಕೆ ಭಗವಂತನು ನೀಡಲಿ ಎಂದು ತಮ್ಮ ಸಂದೇಶದಲ್ಲಿ ತಿಳಿಸಿದ್ದಾರೆ.
