ಬೆಂಗಳೂರು: ಕೋವಿಡ್ 3ನೇ ಅಲೆಯಲ್ಲಿ ಸೋಂಕಿತರ ಸಂಖ್ಯೆ ಅಂದಾಜಿಸಿದಂತೆ ಏರಿಕೆ ಕಾಣುತ್ತಿದೆ. 200-300 ಅಸುಪಾಸಿನಲ್ಲಿ ಪತ್ತೆಯಾಗುತ್ತಿದ್ದ ಸೋಂಕಿತರ ಸಂಖ್ಯೆಯೀಗ ನಿತ್ಯ 30-40 ಸಾವಿರದ ಗಡಿ ದಾಟಿದೆ. ಸೋಂಕು ನಿಯಂತ್ರಣಕ್ಕೆ ಜಾರಿಗೆ ತಂದ ನೈಟ್ ಕರ್ಫ್ಯೂ, ವೀಕೆಂಡ್ ಕರ್ಫ್ಯೂಗೆ ವಿರೋಧ ಹೆಚ್ಚಾಗ್ತಿದೆ. ಹೀಗಾಗಿ ಇಂದು ಸಿಎಂ ನೇತೃತ್ವದಲ್ಲಿ ಕೋವಿಡ್ ಸಭೆ ಕರೆಯಲಾಗಿದೆ.
ಎರಡು ವಾರಗಳ ವೀಕೆಂಡ್ ಕರ್ಫ್ಯೂನಿಂದಾಗಿ ಹೆಚ್ಚುವರಿಯಾಗಿ ಪತ್ತೆಯಾಗಬಹುದಾದ ಪ್ರಕರಣಗಳು ಇಳಿಕೆಯಾಯಿತೇ? ಎನ್ನುವ ಪ್ರಶ್ನೆಗೆ ಹೌದು ಅಂತಿವೆ ವರದಿಗಳು. ಇನ್ನು ನೈಟ್ ಕರ್ಫ್ಯೂ ಬಿಟ್ಟು ಉಳಿದ ಎಲ್ಲ ನಿಯಮಗಳನ್ನು ತೆರವುಗೊಳಿಸಲು ಸರ್ಕಾರಕ್ಕೆ ತಾಂತ್ರಿಕ ಸಲಹಾ ಸಮಿತಿಯು ವರದಿ ನೀಡಿದೆ. ನಿನ್ನೆ ಸಭೆಯ ಅಭಿಪ್ರಾಯಗಳನ್ನು ಪರಿಗಣಿಸಿ ವರದಿ ನೀಡಿದ್ದು, ಏಕೆ ವೀಕೆಂಡ್ ಕರ್ಫ್ಯೂ ತೆರವು ಮಾಡಬಹುದು ಎಂಬುದಕ್ಕೆ ವಿವರಣೆ ನೀಡಿದೆ.
ಎರಡು ವಾರದ ವೀಕೆಂಡ್ ಕರ್ಫ್ಯೂನಿಂದ ಆಗಿರುವ ಲಾಭ ಏನು ಎಂಬುದರ ಬಗ್ಗೆ IISC ಹಾಗೂ ಭಾರತೀಯ ಸಂಖ್ಯಾಶಾಸ್ತ್ರೀಯ ಸಂಸ್ಥೆ ವರದಿ ನೀಡಿದೆ. ಈ ವರದಿಯನ್ನು ಸರ್ಕಾರದ ಮುಂದೆ ತಜ್ಞರು ಮಂಡಿಸಲಿದ್ದಾರೆ.
ಇದನ್ನೂ ಓದಿ: ವೀಕೆಂಡ್ ಕರ್ಫ್ಯೂ ಬೇಕೋ ಬೇಡವೋ ಎಂದು ಕೋವಿಡ್ ಸಭೆಯಲ್ಲಿ ಚರ್ಚಿಸಿ ನಿರ್ಧಾರ: ಸಿಎಂ ಬೊಮ್ಮಾಯಿ
ವೀಕೆಂಡ್ ಕರ್ಫ್ಯೂನಿಂದ ಹೆಚ್ಚುವರಿಯಾಗಿ ಬರಬಹುದಾಗಿದ್ದ 7,000 ಪ್ರಕರಣಗಳು ಕಡಿಮೆ ಆಗಿದೆ. 300 ಜನರು ಆಸ್ಪತ್ರೆಗೆ ದಾಖಲಾಗುವುದನ್ನು, 80 ಸಾವುಗಳನ್ನು ತಪ್ಪಿಸಿದಂತಾಗಿದೆ ಎಂದು IISC ಹಾಗೂ ISI ವರದಿ ನೀಡಿದೆ. ಇದರ ಜೊತೆಗೆ ದಿನಕ್ಕೆ 1 ಲಕ್ಷ ಕೇಸ್ ಬಂದರೂ ಬೆಡ್ ಸಮಸ್ಯೆ ಇಲ್ಲ. ರಾಜ್ಯದಲ್ಲಿ ಬೆಡ್ ವ್ಯವಸ್ಥೆ ಉತ್ತಮವಾಗಿದೆ.
ಹೀಗಾಗಿ ವೀಕೆಂಡ್ ಕರ್ಫ್ಯೂ ತೆರವಾದರೂ ಬರುವ ಪ್ರಕರಣಗಳನ್ನು ನಿರ್ವಹಣೆ ಮಾಡಬಹುದಾಗಿದೆ. ಸದ್ಯದ ಆಸ್ಪತ್ರೆ ದಾಖಲಾತಿ ನೋಡಿದರೆ ಯಾವುದೇ ಆತಂಕ ಕಾಣಿಸುತ್ತಿಲ್ಲ. ಹೀಗಾಗಿ ನೈಟ್ ಕರ್ಫ್ಯೂ ಬಿಟ್ಟು ಉಳಿದ ಎಲ್ಲಾ ನಿರ್ಬಂಧಗಳನ್ನು ತೆರವುಗೊಳಿಸಬಹುದು ಎಂದು ಹೇಳಲಾಗಿದೆ. ಈ ಎಲ್ಲ ಅಂಶಗಳನ್ನು ಗಮನಿಸಿ ಇಂದಿನ ಸಭೆಯಲ್ಲಿ ಮತ್ತೊಮ್ಮೆ ಎಲ್ಲವನ್ನೂ ಚರ್ಚಿಸಿ ಅಂತಿಮ ನಿರ್ಣಯ ಘೋಷಣೆ ಸಾಧ್ಯತೆ ಇದೆ.
ನಿಮ್ಮ ಸೂಕ್ತ ಸಂಗಾತಿ ಹುಡುಕುತ್ತಿರುವಿರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ ನೋಂದಣಿ ಉಚಿತ
