ದಂಡ ಕಟ್ಟಿಸಿಕೊಂಡಾಗ ಮಾತ್ರ ವಾಹನ ಸವಾರರು ಎಚ್ಚೆತ್ತುಕೊಳ್ಳಲು ಸಾಧ್ಯ: ಆರಗ ಜ್ಞಾನೇಂದ್ರ

ಗೃಹ ಸಚಿವನಾಗಿ ಅಧಿಕಾರ ಸ್ವೀಕರಿಸಿ ನಡೆಸಿದ ಮೊದಲ ಸಭೆಯಲ್ಲಿ ಸ್ಥಳದಲ್ಲಿ ದಂಡ ವಸೂಲಿ ಮಾಡದ ಹಾಗೆ ಪರಿಶೀಲಿಸಲು ಹಿರಿಯ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದೆ. ಆದರೆ, ಇದರಿಂದ ಹಿಂದಿಗಿಂತಲೂ ಉಲ್ಲಂಘನೆ ಪ್ರಕರಣಗಳು ಹೆಚ್ಚಾಗಿ ಕಂಡು ಬಂದಿತ್ತು. ದಂಡದ ಭಯವಿಲ್ಲದೇ ಹೋದರೆ ವಾಹನ ಸವಾರರು ನಿಯಮ‌ಗಳನ್ನು ಪಾಲಿಸಲು ಹೋಗುವುದಿಲ್ಲ ಎಂದು ಸಚಿವ ಆರಗ ಜ್ಞಾನೇಂದ್ರ ಹೇಳಿದ್ದಾರೆ.

ಬೆಂಗಳೂರು: ಸಂಚಾರಿ ನಿಯಮ‌ ಉಲ್ಲಂಘನೆ ತಡೆಯುವ ನಿಟ್ಟಿನಲ್ಲಿ ಹಾಗೂ ವಾಹನ ಸವಾರರಲ್ಲಿ ಅರಿವು‌ ಮೂಡಿಸಬೇಕಾದರೆ ನಿಯಮ ಉಲ್ಲಂಘಿಸಿದವರಿಂದ ದಂಡ ಕಟ್ಟಿಸಿಕೊಳ್ಳಲೇಬೇಕು. ದಂಡ ಹಾಕಿದಾಗ ಮಾತ್ರ ಜನರು ಎಚ್ಚೆತ್ತುಕೊಳ್ಳುತ್ತಾರೆ.‌ ಹೀಗಾಗಿ‌ ಸವಾರರು ನಿಯಮ ಉಲ್ಲಂಘಿಸಿದಂತೆ ಎಚ್ಚರವಹಿಸಬೇಕು ಎಂದು ಗೃಹ ಸಚಿವ ಆರಗ ಜ್ಞಾನೇಂದ್ರ ಕಿವಿಮಾತು ಹೇಳಿದ್ದಾರೆ.

ಸಂಚಾರಿ ನಿಯಮಗಳ ಬಗ್ಗೆ ಅರಿವು ಮೂಡಿಸಲು ನಗರದ ಮಕ್ಕಳ‌ ಟ್ರಾಫಿಕ್ ಪಾರ್ಕ್‌ನಲ್ಲಿ ಮಕ್ಕಳೊಂದಿಗೆ ಹಮ್ಮಿಕೊಂಡಿದ್ದ ಸಂವಾದದಲ್ಲಿ ಮಕ್ಕಳನ್ನು ಉದ್ದೇಶಿಸಿ ಸಚಿವರು ಮಾತನಾಡಿದರು.

ಗೃಹ ಸಚಿವನಾಗಿ ಅಧಿಕಾರ ಸ್ವೀಕರಿಸಿ ನಡೆಸಿದ ಮೊದಲ ಸಭೆಯಲ್ಲಿ ಸ್ಥಳದಲ್ಲಿ ದಂಡ ವಸೂಲಿ ಮಾಡದ ಹಾಗೆ ಪರಿಶೀಲಿಸಲು ಹಿರಿಯ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದೆ. ಇದರಂತೆ ಕೆಲದಿನಗಳ ಕಾರ್ಯಾಚರಣೆ ಮಾಡದಿರಲು ಪೊಲೀಸರು ನಿರ್ಧರಿಸಿದ್ದರು.

ಈ ವೇಳೆ ಹಿಂದಿಗಿಂತಲೂ ಉಲ್ಲಂಘನೆ ಪ್ರಕರಣಗಳು ಹೆಚ್ಚಾಗಿ ಕಂಡುಬಂದಿತ್ತು. ದಂಡದ ಭಯವಿಲ್ಲದೇ ಹೋದರೆ ವಾಹನ ಸವಾರರು ನಿಯಮ‌ಗಳನ್ನು ಪಾಲಿಸಲು ಹೋಗುವುದಿಲ್ಲ. ಈ ದಿಸೆಯಲ್ಲಿ ಜಾಗೃತಿ ಜೊತೆಗೆ ಸವಾರರ ಜೀವ ಉಳಿಸುವ ನಿಟ್ಟಿನಲ್ಲಿ ಸ್ಥಳದಲ್ಲೇ ದಂಡ ವಸೂಲಿ ಮಾಡಬೇಕಾಗಿದೆ ಎಂದು‌ ಪ್ರತಿಪಾದಿಸಿದರು‌.

ಟ್ರಾಫಿಕ್‌‌ ಕಿರಿಕಿರಿಗೆ ಬ್ರೇಕ್ ಹಾಕಲು ಪೊಲೀಸರ ಕಾರ್ಯ ಶ್ಲಾಘನೀಯ:
ಬೆಂಗಳೂರಿನಲ್ಲಿ ಪ್ರತಿದಿನ 2,300ಕ್ಕೂ ಹೆಚ್ಚು ವಾಹನಗಳು ನೋಂದಣಿಯಾಗಿ ರಸ್ತೆಗಿಳಿಯುತ್ತಿವೆ. ಜನಸಂಖ್ಯೆ ಹೆಚ್ಚಾದಂತೆ ವಾಹನಗಳು ಅಧಿಕವಾಗತೊಡಗಿವೆ. ಇದರಿಂದ ರಸ್ತೆಗಳ ಮೇಲೆ‌ ಒತ್ತಡ ದ್ವಿಗುಣವಾಗುತ್ತಿವೆ.

ಆಧುನಿಕ ಯುಗದಲ್ಲಿ ಪ್ರತಿಯೊಬ್ಬ ವಾಹನ ಸವಾರರ ಸಮಯ ಅಮೂಲ್ಯವಾಗಿದ್ದು, ಇವರ ಸುಗಮ ಪ್ರಯಾಣದ ಹಿಂದೆ ಟ್ರಾಫಿಕ್ ಪೊಲೀಸರ ಶ್ರಮವಿರುವುದನ್ನು ಮರೆಯುವ ಹಾಗಿಲ್ಲ. ನಗರದ ಟ್ರಾಫಿಕ್‌‌ ಕಿರಿಕಿರಿಗೆ ಬ್ರೇಕ್ ಹಾಕಲು ಪೊಲೀಸರ ಕಾರ್ಯ ಶ್ಲಾಘನೀಯ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ನಿಷೇಧಿತ ಪ್ರದೇಶಗಳಲ್ಲಿ ನಿಲ್ಲಿಸುವ ವಾಹನಗಳಿಗೆ ಹಾನಿಯಾಗುವ ಹಾಗೇ ಸಂಚಾರ ಪೊಲೀಸರು ಟೋಯಿಂಗ್ ಮಾಡುತ್ತಾರೆ ಎಂಬ ಆರೋಪಗಳು ಸಾರ್ವಜನಿಕರಿಂದ ಕೇಳಿ ಬಂದಿವೆ‌.

ನೋ ಪಾರ್ಕಿಂಗ್‌ನಲ್ಲಿ ನಿಲ್ಲಿಸಿದ ವಾಹನಗಳನ್ನು ಟೋಯಿಂಗ್ ಮಾಡುವಾಗ ಕಡ್ಡಾಯವಾಗಿ ಸೈರನ್ ಮಾಡಿ ವಾಹನದ ಫೋಟೋ ಹಿಡಿಯಬೇಕು. ಕೆಲವು ಬಾರಿ ವಾಹನಗಳನ್ನು ಹಾನಿಗೊಳಿಸುವ ಹಾಗೆ ಸಿಬ್ಬಂದಿ ಟೋಯಿಂಗ್ ಮಾಡುತ್ತಾರೆ.‌ ಇದಕ್ಕೆ‌ ಕಡಿವಾಣ ಹಾಕಲು‌ ಪ್ರತ್ಯೇಕ ವಿಚಕ್ಷಣದಳ ನಿಯೋಜಿಸಲಾಗಿದೆ ಎಂದು ಗೃಹ ಸಚಿವ ಆರಗ ಜ್ಞಾನೇಂದ್ರ ಹೇಳಿದರು.

ಪೊಲೀಸರು ಲಂಚ ಕೇಳಿದ್ರೆ ಧೈರ್ಯವಾಗಿ ಪ್ರಶ್ನಿಸಿ:
ಟ್ರಾಫಿಕ್ ಪೊಲೀಸರು ಲಂಚ ತೆಗೆದುಕೊಳ್ಳುತ್ತಾರೆ ಎಂಬ‌ ಪ್ರಶ್ನೆಗೆ ಉತ್ತರಿಸಿದ ಸಚಿವರು, ಪೊಲೀಸರು ಲಂಚ ತೆಗೆದುಕೊಳ್ಳುವುದು ಎಷ್ಟು ತಪ್ಪೊ ? ಅಷ್ಟೇ ಲಂಚ ನೀಡುವುದು ತಪ್ಪು? ಪೊಲೀಸರು ಲಂಚ ಕೇಳಿದಾಗ ಧೈರ್ಯವಾಗಿ ‌ಪ್ರಶ್ನಿಸುವ ತಾಕತ್ತು ನಾಗರಿಕರು ಹೊಂದಿರಬೇಕು.

ಕಾಯ್ದೆಯಿಂದಲೇ ಭ್ರಷ್ಟಾಚಾರ ನಿಯಂತ್ರಣ ಅಸಾಧ್ಯ.‌ ನಾಗರಿಕರು ಇದಕ್ಕೆ ಕೈ ಜೋಡಿಸಿದಾಗ ಮಾತ್ರ ಸಂಪೂರ್ಣ ಭ್ರಷ್ಟಾಚಾರ ಇನ್ನಿಲ್ಲದಂತೆ ಮಾಡಬಹುದು ಎಂದರು.

ಇದನ್ನೂ ಓದಿ: ರೌಡಿ‌ ಮುಕ್ತ ಬೆಂಗಳೂರು ಮಾಡುವಂತೆ ಪೊಲೀಸ್ ಅಧಿಕಾರಿಗಳಿಗೆ ಗೃಹ ಸಚಿವರಿಂದ ತಾಕೀತು