ಬೆಂಗಳೂರು: ಕೊರೊನಾ‌ಗೆ ಬ್ರೇಕ್ ಹಾಕಲು ರಾಜ್ಯ ಸರ್ಕಾರ ಕಟ್ಟುನಿಟ್ಟಿನ ಲಾಕ್ಡೌನ್ ಘೋಷಿಸಿದೆ. ಜೊತೆಗೆ ನಿನ್ನೆಯಷ್ಟೆ ಲಾಕ್ಡೌನ್ ದಿನಗಳನ್ನ ವಿಸ್ತರಿಸಿದೆ. ಆದ್ರೆ ಮದುವೆ ಸೀಸನ್‌ನಲ್ಲಿ ಲಾಕ್ಡೌನ್ ಘೋಷಣೆ ಮಾಡಿರುವುದು ನವ ವಧು-ವರರಿಗೆ ಸಂಕಷ್ಟ ಎದುರಾಗಿದೆ.
ಕೋವಿಡ್ ಸೋಂಕಿಗೆ ಕಡಿವಾಣ ಹಾಕಲು ಸರ್ಕಾರ ಲಾಕ್ಡೌನ್ ಘೋಷಿಸಿದೆ. ಈ ಮಧ್ಯೆ ಮದುವೆ ಮಾಡಿಕೊಳ್ಳಲು ಅನುಮತಿ ನೀಡಿದ್ದು, ಮದುವೆಯಲ್ಲಿ 40 ಜನ ಭಾಗವಹಿಸಲು ಅವಕಾಶ ನೀಡಿದೆ. ಅಲ್ಲದೆ ಪಾಸ್ ಕೂಡಾ ಕಡ್ಡಾಯ ಮಾಡಿದೆ.
ಆದ್ರೆ ತುಂಬು ಸಂಸಾರದ ಜೊತೆ ಬಂಧು-ಬಳಗ ಸೇರಿ ಸಂತೋಷದಿಂದ ಆಚರಿಸಬಹುದಾದ ವಿವಾಹ ಮಹೋತ್ಸವ ಇಂದು ನಾಲ್ಕಾರು ಜನರ ಮಧ್ಯೆ ಸರಳವಾಗಿ ಮುಗಿಸುವಂತಾಗಿದೆ. ಅದ್ರಲ್ಲೂ, ಲಾಕ್ಡೌನ್ ವಧು ವರರ ಪಾಲಿಗೆ ಕಂಟಕಪ್ರಾಯವಾಗಿದ್ದು, ಮನೆಯಿಂದ ಛತ್ರ ಸೇರಿಕೊಳ್ಳಲು ವಧು ವರರು ಹರಸಾಹಸ ಮಾಡಬೇಕಾಗಿದೆ.
'ಎಲ್ಲೆಲ್ಲೂ ಚೆಕಿಂಗ್ಗೆ, ಗಾಡಿ ನಿಲ್ಲಿಸಿ ನನ್ನದೇ ಮದುವೆಗೆ ಮುಹೂರ್ತಕ್ಕೆ ಸರಿಯಾಗಿ ಸೇರಲು ಆಗುತ್ತಿಲ್ಲ. ಮದುವೆ ಮಾಡೋರಿಗಷ್ಟೇ ಗೊತ್ತು ಈ ಲಾಕ್ಡೌನ್ ಕಷ್ಟ. ಎಲ್ಲಿ ನೋಡಿದ್ರು ಚೆಕಿಂಗ್ ಚೆಕಿಂಗ್. ಎಲ್ರಿಗೂ ಉತ್ತರ ಕೊಟ್ಟು ಸಾಕಾಯ್ತು. ಯಾಕಾದ್ರೂ ಮದುವೆ ಆಗ್ತಿದ್ದೀವಿ ಅನಿಸುತ್ತೆ. ಯಾಕ್ ಕೇಳ್ತೀರಾ ನಮ್ ಕಷ್ಟ' ಅಂತ ಪೊಲೀಸ್ ತಪಾಸಣೆಯಲ್ಲಿದ್ದ ಮದುಮಗ ತನ್ನ ಕಥೆಯನ್ನ ಹೇಳಿದ ಪರಿ ಇದು.
ಒಟ್ಟಾರೆಯಾಗಿ, ಅಂದುಕೊಂಡಿದ್ದು ಒಂದು ಆದ್ರೆ ಈ ಕೋವಿಡ್ ತಂದಿಟ್ಟಿದ್ದು ಇನ್ನೊಂದು. ಒಂದನೇ ಅಲೆಯಲ್ಲಿ ಎಲ್ಲಾ ಮುಗೀತು ಅಂದುಕೊಂಡ್ರೆ ಎರಡನೇ ಅಲೆಗೆ ತಲೆ ತಿರುಗುವಂತೆ ಮಾಡಿದೆ.. ಇನ್ನೂ ಮುಂದೆ ಏನೇನು ಬಾಕಿ ಇದೆ ಅಂತ ಕಾಯ್ದು ನೋಡ್ಬೇಕು..
