ಬೆಂಗಳೂರು: ಕೊರೊನಾ ಸೋಂಕಿನ 1 ಮತ್ತು 2ನೇ ಅಲೆಯಲ್ಲಿ ಸಾರಿಗೆ ನಿಗಮದ ನೌಕರರು ಮೃತಪಟ್ಟಿದ್ದರು. ಮೃತಪಟ್ಟ ಒಟ್ಟು 90 ಮಂದಿ ನೌಕರರ ನಾಮ ನಿರ್ದೇಶಿತರಿಗೆ ಸಂಸ್ಥೆಯಿಂದ 7 ಕೋಟಿ ರೂ. ಪಾವತಿಸಲಾಗಿದೆ ಎಂದು ಸಾರಿಗೆ ಸಂಸ್ಥೆ ಹೇಳಿದೆ.
ನೌಕರರ ಕುಟುಂಬ ಕಲ್ಯಾಣ ಯೋಜನಾ ನಿಧಿ ರೂ. 2.70 ಕೋಟಿ, ಭವಿಷ್ಯ ನಿಧಿ ರೂ. 7.18 ಕೋಟಿ, ಐಚ್ಛಿಕ ಭವಿಷ್ಯ ನಿಧಿ ರೂ. 72 ಲಕ್ಷ, ಗಳಿಕೆ ರಜೆ ನಗದೀಕರಣ ರೂ. 1.61 ಕೋಟಿ ಹಾಗೂ ವೈದ್ಯಕೀಯ ವೆಚ್ಚದ ಮೊತ್ತ 15 ಲಕ್ಷ ರೂ. ಸೇರಿ ಒಟ್ಟಾರೆ ರೂ. 19.36 ಕೋಟಿ ಪಾವತಿಸಲಾಗಿದೆ ಎಂದು ಸಾರಿಗೆ ಸಂಸ್ಥೆ ಸ್ಪಷ್ಟನೆ ನೀಡಿದೆ.
ಕೋವಿಡ್ 1 ಮತ್ತು 2 ನೇ ಅಲೆಯಲ್ಲಿ ಮೃತಪಟ್ಟ ನೌಕರರ ಕುಟುಂಬದವರಿಗೆ ಸಾರಿಗೆ ಸಂಸ್ಥೆಯಿಂದ ಯಾವುದೇ ಅಂತಿಮ ಹಣ ಪಾವತಿ ಬಾಕಿ ಇರುವುದಿಲ್ಲ ಎಂದು ನಿಗಮ ದೃಢಪಡಿಸಿದೆ.
ಹಾಗೆಯೇ ನಿಗಮದ ಸಿಬ್ಬಂದಿ ಸೆಪ್ಟೆಂಬರ್ ಹಾಗೂ ಅಕ್ಟೋಬರ್ ತಿಂಗಳ ವೇತನ ಬಾಕಿ 5 ಮೊತ್ತವನ್ನ ಇಂದು ಪಾವತಿಸಲಾಗಿದೆ. ಜತೆಗೆ ನವೆಂಬರ್ ತಿಂಗಳ ಉಳಿದ ಶೇ 50ರಷ್ಟು ವೇತನ ಬಾಕಿಯನ್ನು ಡಿ. 10 ರಂದು ಪಾವತಿಸಲು ಕ್ರಮಕೈಗೊಳ್ಳಲಾಗಿದ್ದು, ಇದರಿಂದ ಸಿಬ್ಬಂದಿ ಯಾವುದೇ ವೇತನ ಪಾವತಿಯ ಬಾಕಿ ಇರುವುದಿಲ್ಲ ಎಂದು ಆದೇಶಿಸಿದೆ.
