ಬೆಂಗಳೂರು: ನಾಪತ್ತೆಯಾಗಿರುವ ಉದ್ಯಮಿ ಸಿದ್ಧಾರ್ಥ್ ಮನೆ, ಕಂಪನಿ ಮೇಲೆ ದಾಳಿ ನಡೆಸಿದ ವೇಳೆ ಕಾನೂನು ರೀತಿಯ ಕ್ರಮ ಕೈಗೊಳ್ಳಲಾಗಿದೆ. ಆದರೆ ಅವರಿಗೆ ಯಾವುದೇ ತೊಂದರೆ ಕೊಟ್ಟಿಲ್ಲ ಎಂದು ಐಟಿ ಮೂಲಗಳು ಸ್ಪಷ್ಟಪಡಿಸಿವೆ.
ಐಟಿ ಅಧಿಕಾರಿಗಳ ಕಿರುಕುಳದಿಂದಲೇ ಸಿದ್ಧಾರ್ಥ್ ನಾಪತ್ತೆಯಾಗಿದ್ದಾರೆ ಎಂದು ಮಾಜಿ ಸಿಎಂ ಕುಮಾರಸ್ವಾಮಿ ಆರೋಪಿಸಿದ್ದರು. ಇದಕ್ಕೆ ಸ್ಪಷ್ಟನೆ ನೀಡಿರುವ ಆದಾಯ ತೆರಿಗೆ ಇಲಾಖೆ ಮೂಲಗಳು, ಮೈಂಡ್ ಟ್ರೀ ಕಂಪನಿ ಷೇರ್ ಡೀಲ್ನಲ್ಲೂ ಸಿದ್ಧಾರ್ಥ್ ಅವರಿಗೆ ತೊಂದರೆ ಕೊಟ್ಟಿಲ್ಲ. ಅವರ ಮನವಿಯಂತೆ ಷೇರು ರಿಲೀಸ್ ಮಾಡಿದ್ವಿ, ಆ ನಂತರ ಸಿದ್ದಾರ್ಥ್ ತಮ್ಮಿಚ್ಚೆ ಯಂತೆ ಷೇರು ಮಾರಾಟ ಮಾಡಿದ್ದಾರೆ ಎಂದಿದೆ.
'ಸಹಿ ಸಿದ್ಧಾರ್ಥ್ ಅವರದ್ದಲ್ಲ':
ಸಿದ್ಧಾರ್ಥ್ ಅವರು ಬರೆದಿದ್ದಾರೆ ಎನ್ನಲಾದ ಪತ್ರದಲ್ಲಿ ಮಾಡಲಾದ ಆರೋಪಗಳು ನಿರಾಧಾರವಾಗಿವೆ. ಕಾಫಿ ಡೇ ಕಂಪನಿ ಷೇರುಗಳ ವಿಚಾರದಲ್ಲೂ ಅವರಿಗೆ ತೊಂದರೆ ಕೊಟ್ಟಿಲ್ಲ.
ಸಿದ್ದಾರ್ಥ್ ಹೆಸರಿನಲ್ಲಿ ಸಿಕ್ಕಿರುವ ವಿದಾಯ ಪತ್ರ ಶುದ್ಧಸುಳ್ಳು. ಕಂಪೆನಿ ವರದಿಗಳಲ್ಲಿ ಸಿದ್ದಾರ್ಥ್ ಸಹಿ ನಮೂನೆಯೇ ಬೇರೆಯಾಗಿದೆ. ಆದರೆ ಸಿಕ್ಕಿರುವ ವಿದಾಯ ಪತ್ರದಲ್ಲಿನ ಸಹಿಯೇ ಬೇರೆಯಾಗಿದೆ ಎಂದು ಐಟಿ ಅಧಿಕಾರಿಗಳು ತಿಳಿಸಿದ್ದಾರೆ.
ಸಿದ್ಧಾರ್ಥ್ ಮನೆ, ಕಂಪೆನಿ ಮೇಲೆ ಐಟಿ ರೇಡ್ ಆದಾಗ 480.13 ಕೋಟಿ ರೂ ಅಕ್ರಮ ಹಣ ಪತ್ತೆಯಾಗಿತ್ತು. ಈ ಹಣಕ್ಕೆ ತೆರಿಗೆ ಪಾವತಿಸದ ಕಾರಣ ಅಘೋಷಿತ ಹಣ ಎಂದು ಐಟಿ ನೋಟೀಸ್ ನೀಡಿತ್ತು. ಆ ನಂತರವೂ ಸಿದ್ಧಾರ್ಥ್ 480.13 ಕೋಟಿ ರೂಗಳಿಗೆ ಲೆಕ್ಕ ಕೊಟ್ಟಿರಲಿಲ್ಲ ಎಂದು ವಿವರಿಸಿದ್ದಾರೆ.
