ಬೆಂಗಳೂರು: ಗಂಭೀರ ಸ್ವರೂಪದ ಕೋವಿಡ್ ನ್ಯುಮೋನಿಯಾದಿಂದ ಬಳಲುತ್ತ ಜೀವನ್ಮರಣದ ಹೋರಾಟ ನಡೆಸುತ್ತಿದ್ದ ವ್ಯಕ್ತಿಯ ಪ್ರಾಣ ಉಳಿಸುವಲ್ಲಿ ವೈದ್ಯರು ಯಶಸ್ವಿಯಾಗಿದ್ದಾರೆ. ಸುಮಾರು 3 ವಾರಗಳ ಕಾಲ ಎಕ್ಮೊ ಬೆಂಬಲದಿಂದ ಚಿಕಿತ್ಸೆ ಪಡೆಯುತ್ತಾ ಬೆಂಗಳೂರಿನ 39 ವರ್ಷದ ರೋಗಿಯೊಬ್ಬರು ಬಿಜಿಎಸ್ ಗ್ಲೆನಿಗ್ಲೆಸ್ ಗ್ಲೋಬಲ್ ಆಸ್ಪತ್ರೆಯಲ್ಲಿ ಗುಣಮುಖರಾಗಿದ್ದಾರೆ.
ಕಳೆದ ನವೆಂಬರ್ 22 ರಂದು ಆಸ್ಪತ್ರೆಗೆ ಬಂದಾಗ ಅವರಲ್ಲಿ 103 - 104 ಡಿಗ್ರಿಯಷ್ಟು ಜ್ವರ, ಹೈಪೋಕ್ಸಿಯಾದಿಂದ ಬಳಲುತ್ತಿದ್ದರು. ಈ ಸಂದರ್ಭದಲ್ಲಿ ಸಿಟಿ ಸ್ಕ್ಯಾನ್ ನಡೆಸಿದಾಗ ರೋಗಿ ಗಂಭೀರ ಪರಿಸ್ಥಿತಿಯಲ್ಲಿದ್ದಾರೆ ಎಂಬುದು ವೈದ್ಯರಿಗೆ ತಿಳಿಯಿತು. ಆ ಕೂಡಲೇ ಅವರನ್ನು ಐಸಿಯುಗೆ ದಾಖಲು ಮಾಡಲಾಯಿತು.
ಮಹೇಶ್ ಕೋವಿಡ್ ಲಸಿಕೆ ಹಾಕಿಸಿಕೊಂಡಿದ್ದರೂ ಸಹ ಸುಮಾರು 7 ದಿನಗಳ ಕಾಲ ಉಸಿರಾಟದ ತೊಂದರೆ ಮತ್ತು ಅಧಿಕ ಜ್ವರದಿಂದ ಬಳಲುತ್ತಿದ್ದರು. ಸಿಟಿ ಸ್ಕ್ಯಾನ್ ಮಾಡಿದಾಗ ಗಂಭೀರ ಸ್ವರೂಪದ ಶ್ವಾಸಕೋಶ ಸೋಂಕಿನಿಂದ ಬಳಲುತ್ತಿದ್ದುದು ಪತ್ತೆಯಾಯಿತು.
ಅಂದರೆ 25 ರಲ್ಲಿ 22 ಪಾಯಿಂಟ್ನಷ್ಟು ಸೋಂಕು ಹರಡಿತ್ತು. ಈ ಹಿನ್ನೆಲೆಯಲ್ಲಿ ಸುದೀರ್ಘವಾದ ಸಮಾಲೋಚನೆ ಮತ್ತು ಇತರ ವೈದ್ಯರ ತಂಡಗಳ ಜೊತೆಗೆ ಚರ್ಚೆ ನಡೆಸಿದ ಬಳಿಕ ರೋಗಿಗೆ ಚಿಕಿತ್ಸಾ ಯೋಜನೆಯನ್ನು ರೂಪಿಸಲಾಯಿತು.
ಬಿಜಿಎಸ್ ಗ್ಲೆನಿಗ್ಲೆಸ್ ಗ್ಲೋಬಲ್ ಹಾಸ್ಪಿಟಲ್ನ ಐಸಿಯು ಮತ್ತು ಕೋವಿಡ್ ಐಸಿಯು ವಿಭಾಗದ ವೈದ್ಯಕೀಯ ಮುಖ್ಯಸ್ಥ ಡಾ.ಗೌರೀಶಂಕರ್ ರೆಡ್ಡಿ ಮಾನೆ ಮಾತನಾಡಿ, ರೋಗಿಯ ಕುಟುಂಬ ಸದಸ್ಯರ ಅನುಮತಿ ಪಡೆದು ವೈದ್ಯರು ನವೆಂಬರ್ 26 ರ ಮಧ್ಯರಾತ್ರಿ ರೋಗಿ ಮಹೇಶ್ ಗೆ ವೆಂಟಿಲೇಟರ್ ಅಳವಡಿಸಿದರು. ಆದರೆ, ಚಿಕಿತ್ಸೆಗೆ ಸ್ಪಂದಿಸಲಿಲ್ಲ.
ಇದನ್ನೂ ಓದಿ: ರಾಜ್ಯದಲ್ಲಿಂದು 321 ಮಂದಿಗೆ ಕೋವಿಡ್ ದೃಢ, ನಾಲ್ವರು ಸೋಂಕಿತರ ಸಾವು
ಸೋಂಕು ಕಡಿಮೆ ಮಾಡಲು ಮತ್ತು ಜೀವಾಣುಗಳನ್ನು ಸುಧಾರಣೆ ಮಾಡುವ ನಿಟ್ಟಿನಲ್ಲಿ ವೈದ್ಯರು ರೋಗಿಯನ್ನು ಎಕ್ಸ್ಟ್ರಾಕಾರ್ಪೋರಿಯಲ್ ಮೆಂಬ್ರೇನ್ ಆಕ್ಸಿಜನೇಷನ್ ಅನ್ನು ಅಳವಡಿಸಲು ನಿರ್ಧರಿಸಿದರು. ಇದೊಂದು ಜೀವ ರಕ್ಷಕವಾಗಿದ್ದು, ನವೆಂಬರ್ 27 ರ ಬೆಳಗಿನ ಜಾವ 3 ಗಂಟೆಗೆ ಎಕ್ಮೊಗೆ ಒಳಪಡಿಸಿದರು.
ರೋಗಿಯನ್ನು 15 ದಿನಗಳಿಗೂ ಅಧಿಕ ಕಾಲದವರೆಗೆ ಎಕ್ಮೊ ಮತ್ತು ಐಸಿಯು ಸಪೋರ್ಟ್ನಲ್ಲಿಡಲಾಯಿತು. ಆದರೆ, ರೋಗಿಯು ಸೋಂಕು ಮತ್ತು ರಕ್ತಸ್ರಾವದಂತಹ ಸಮಸ್ಯೆಗಳನ್ನು ಎದುರಿಸುತ್ತಿದ್ದರು. ಈ ಕಾರಣದಿಂದ ಎಕ್ಮೊ ನಿರೀಕ್ಷಿಸಿದಷ್ಟು ಸುಲಭವಾಗಿರಲಿಲ್ಲ. ಈ ಹಿನ್ನೆಲೆಯಲ್ಲಿ ರೋಗಿಯ ಮೇಲೆ ನಿರಂತರವಾಗಿ ನಿಗಾ ಇಡುವ ಅಗತ್ಯವಿತ್ತು. ಬಳಿಕ ಚೇತರಿಸಿಕೊಂಡ ರೋಗಿ ಇದೀಗ ಗುಣಮುಖರಾಗಿದ್ದಾರೆ ಎಂದರು.