ಯಲಹಂಕ : ಜಿಕೆವಿಕೆ ಅವರಣದಲ್ಲಿ ನಡೆಯುತ್ತಿರುವ ಕೃಷಿ ಮೇಳದಲ್ಲಿ ಕಲ್ಟಿವೇಟ್ ಕಂಪನಿ ಪ್ರಮುಖ ಕೃಷಿ ಬೆಳೆಗಳಿಗೆ ಸಂವೇದಕ ಆಧಾರಿತ ಸ್ವಯಂಚಾಲಿತ ನೀರಾವರಿ ತಂತ್ರಜ್ಞಾನದ ಸಂಶೋಧನೆ ಮಾಡಿದ್ದು, ಈ ಮೂಲಕ ಸ್ಮಾರ್ಟ್ ಇರಿಗೇಷನ್ನಲ್ಲಿ ಸ್ಮಾರ್ಟ್ ಕೃಷಿ ಮಾಡಲು ನೆರವಾಗಿದೆ.
ನೀರಿನ ಪ್ರಮಾಣ ಮತ್ತು ಕಾಲಾವಧಿ ಆಧಾರದ ಮೇಲೆ ರೈತರು ಬೆಳೆಗಳಿಗೆ ನೀರು ಹಾಯಿಸುತ್ತಾರೆ. ಆದರೆ ಇದರಿಂದ ಬೆಳೆಗಳಿಗೆ ಬೇಕಾದ ಪ್ರಮಾಣದಷ್ಟು ನೀರು ಒದಗಿಸಲು ಸಾಧ್ಯವಾಗುವುದಿಲ್ಲ. ಅಲ್ಲದೆ ಬೆಳೆಗಳಿಗೆ ನೀರು ಹೆಚ್ಚಾದರೆ, ಇಲ್ಲವೆ ಕಡಿಮೆಯಾದರೆ ಇಳುವರಿ ಮೇಲೆ ಪರಿಣಾಮ ಬೀರುತ್ತದೆ. ಸದ್ಯ ಇಂತಹ ಸಮಸ್ಯೆಯನ್ನು ಅರಿತ ಕಲ್ಟಿವೇಟ್ ಕಂಪನಿ ಬೆಳೆಗೆ ಬೇಕಾದಷ್ಟು ನೀರನ್ನು ಅವಶ್ಯಕ ಸಮಯದಲ್ಲಿ ಹರಿಸುವಂಥ ಸ್ವಯಂ ಚಾಲಿತ ತಂತ್ರಜ್ಞಾನವನ್ನು ಸಂಶೋಧನೆ ಮಾಡಿದೆ.
ಇದು ಕೃತಕ ಮತ್ತು ಇಂಟರ್ನೆಟ್ ಆಫ್ ಥಿಂಗ್ (IoT )ತಂತ್ರಜ್ಞಾನದ ಮೂಲಕ ಕಾರ್ಯ ನಿರ್ವಹಿಸುತ್ತದೆ. ಈ ತಂತ್ರಜ್ಞಾನ ಮಣ್ಣಿನ ಗುಣ ಆಧರಿಸಿ ಮತ್ತು ಬೆಳೆ ಹಾಕಿದ ಮೊದಲ ವಾರದ ನಂತರದ ವಾರಗಳಲ್ಲಿ ಬೆಳೆಗಳಿಗೆ ಬೇಕಾದ ಪ್ರಮಾಣದ ನೀರು ಒದಗಿಸುತ್ತದೆ. ಮೊದಲ ವಾರದಲ್ಲಿ ಒಂದರಿಂದ ಎರಡು ಲೀಟರ್, ನಂತರದ ವಾರಗಳಲ್ಲಿ 10 ಲೀಟರ್ ಹೀಗೆ ಬೆಳೆಗಳು ಬೆಳದಂತೆ ನೀರಿನ ಪ್ರಮಾಣ ಹೆಚ್ಚಾಗುತ್ತದೆ.
ಇದೊಂದು ಸ್ವಯಂಚಾಲಿತ ತಂತ್ರಜ್ಞಾನವಾಗಿದ್ದು, ಮಳೆ ಬಂದಾಗ ನೀರು ಹರಿಯುವಿಕೆ ನಿಲ್ಲಿಸಿ ಬಿಸಿಲು ಇದ್ದಾಗ ಹೆಚ್ಚಿನ ನೀರನ್ನು ಬೆಳೆಗೆ ಬಿಡುಗಡೆ ಮಾಡುತ್ತದೆ. ಇದರಿಂದ ಕಾರ್ಮಿಕರ ಉಳಿತಾಯ ಮತ್ತು ಶೇಕಡಾ 60ರಷ್ಟು ನೀರು ಉಳಿತಾಯ ಹಾಗೂ ಶೇಕಡಾ 20ರಷ್ಟು ಉಳಿತಾಯ ಪಡೆಯಬಹುದಾಗಿದೆ.
