ಬೆಂಗಳೂರು: ರಾಜ್ಯದಲ್ಲಿ ಕೊರೊನಾ ಸಾಂಕ್ರಾಮಿಕ ವ್ಯಾಪಕವಾಗಿ ಹರಡುತ್ತಿದ್ದು ಲಾಕ್ಡೌನ್ ಘೋಷಿಸಲಾಗಿತ್ತು. ಬರೋಬ್ಬರಿ ಒಂದೂವರೆ ತಿಂಗಳು ಎಲ್ಲೂ ಅಲ್ಲಾಡದೆ, ಬಸ್ಗಳು ಡಿಪೋದಲ್ಲಿ ಬಂಧಿಯಾಗಿದ್ದವು. ಇದೀಗ ಕೊರೊನಾ ಸೋಂಕಿತರ ಸಂಖ್ಯೆ ಕ್ರಮೇಣ ಇಳಿಕೆಯಾಗುತ್ತಿದ್ದು, ಸರ್ಕಾರ ಬೆಂಗಳೂರು ಸೇರಿದಂತೆ 17 ಜಿಲ್ಲೆಗಳಲ್ಲಿ ಅನ್ಲಾಕ್ ಘೋಷಣೆ ಮಾಡಿದೆ.
ಹೀಗಾಗಿ, ಡಿಪೋ ಸೇರಿದ್ದ ಬಸ್ಗಳು ರಸ್ತೆಗಿಳಿಯುತ್ತಿವೆ. ಬಸ್ಗಳ ಸಂಚಾರ ಆರಂಭವಾಗಿದ್ದೇ ತಡ ಮೆಜೆಸ್ಟಿಕ್ನ ಬಿಎಂಟಿಸಿ ನಿಲ್ದಾಣಕ್ಕೆ ಪ್ರಯಾಣಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸುತ್ತಿದ್ದಾರೆ. ಬೆಳಗ್ಗೆ 6 ಗಂಟೆಯಿಂದ ಬಸ್ಗಳ ಸಂಚಾರ ಶುರುವಾಗಿದ್ದರೂ ಬೆರಳೆಣಿಕೆಯಷ್ಟು ಬಸ್ಗಳು ಮಾತ್ರ ಓಡಾಡ್ತಿವೆ. ಇದರಿಂದಾಗಿ ಪ್ರಯಾಣಿಕರಿದ್ದರೂ ಬಸ್ಗಳಿಲ್ಲದ ಪರಿಸ್ಥಿತಿ ನಿರ್ಮಾಣವಾಗಿದೆ. ಸರಿಯಾದ ಸಮಯಕ್ಕೆ ಬಸ್ ಬಾರದಿರುವುದರಿಂದ ಹಲವರು ಆಟೋ, ಟ್ಯಾಕ್ಸಿ ಮೊರೆ ಹೋಗುತ್ತಿದ್ದಾರೆ.
ಮೈಸೂರು, ದಕ್ಷಿಣಕನ್ನಡ ಜಿಲ್ಲೆಗಳಿಗೆ ಬಸ್ ಸಂಚಾರವಿಲ್ಲ
ಕೊರೊನಾ ಸೋಂಕು ಉಲ್ಬಣಗೊಂಡಿರುವ ಕಾರಣ ಮೈಸೂರಿನಲ್ಲಿ ಲಾಕ್ಡೌನ್ ಮುಂದುವರೆಸಲಾಗಿದೆ. ಹೀಗಾಗಿ, ಮೈಸೂರು ಮಾರ್ಗಕ್ಕೆ ಯಾವುದೇ ಬಸ್ಗಳನ್ನು ನಿಯೋಜನೆ ಮಾಡಿಲ್ಲ. ಆ ಮುಖೇನ ಹೊರಡುವ ಬಸ್ಗಳು ಯಾವುದೇ ಪ್ರಯಾಣಿಕರನ್ನ ಹತ್ತಿಸುವ, ಇಳಿಸುವ ಕೆಲಸ ಮಾಡುವಂತಿಲ್ಲ. ಹಾಗೆಯೇ, ದಕ್ಷಿಣಕನ್ನಡ ಜಿಲ್ಲಾಡಳಿತವು ಬಸ್ ಸಂಚಾರ ಇರುವುದಿಲ್ಲ ಎಂದು ಆದೇಶ ಹೊರಡಿಸಿದೆ. ಹೀಗಾಗಿ, ಮುಂದಿನ ಆದೇಶದವರೆಗೂ ದಕ್ಷಿಣಕನ್ನಡ ಜಿಲ್ಲೆಗೂ ಬಸ್ ಸಂಚಾರ ಇರೋದಿಲ್ಲ.
ಲಸಿಗೆ ಪಡೆದ ಸಿಬ್ಬಂದಿಗಷ್ಟೇ ಪ್ರವೇಶ
ಚಾಲಕರು ಮತ್ತು ನಿರ್ವಾಹಕರಿಗೆ 2 ಡೋಸ್ ಕೋವಿಡ್ ವ್ಯಾಕ್ಸಿನ್ ಕಡ್ಡಾಯ ಮಾಡಲಾಗಿದೆ. ಹೆಚ್ಚಿನನವರು ಎರಡನೇ ಡೋಸ್ ಲಸಿಕೆ ಪಡೆದಿಲ್ಲ. ಅಂತವರಿಗೆ ಮೊದಲ ಡೋಸ್ನ ಸರ್ಟಿಫಿಕೇಟ್ ಹಾಗೂ ಆರ್‌ಟಿಪಿಸಿ‌ಆರ್ ನೆಗಟಿವ್ ವರದಿ ಕಡ್ಡಾಯವಾಗಿದೆ. ಈ ಎರಡು ವರದಿ ಇಲ್ಲದ ಸಿಬ್ಬಂದಿಗೆ ಡಿಪೋ ಒಳಗೆ ಪ್ರವೇಶವಿಲ್ಲ ಎಂದು ಬಿಎಂಟಿಸಿ ಆದೇಶಿಸಿತ್ತು. ಆದರೆ, ಬೆಂಗಳೂರಿನಲ್ಲಿ ಹಲವು ಸಿಬ್ಬಂದಿ 15 ದಿನಗಳ ಹಿಂದಿನ ಟೆಸ್ಟ್ ರಿಪೋರ್ಟ್ ತೋರಿಸುತ್ತಿದ್ದು, ಅವರಿಗೆ ಮತ್ತೊಮ್ಮೆ ಕೋವಿಡ್ ರಿಪೋರ್ಟ್ ತರುವಂತೆ ಸೂಚಿಸಲಾಗುತ್ತಿದೆ.
ಇದನ್ನೂ ಓದಿ: Covid-19 Vaccination: ಇಂದಿನಿಂದ 18 ವರ್ಷ ಮೇಲ್ಪಟ್ಟವರಿಗೆ 'ಉಚಿತ' ಕೋವಿಡ್ ಲಸಿಕೆ
