ಬೆಂಗಳೂರು: ವಿದ್ಯುತ್ ಕಂಬಗಳ‌ನ್ನು ಬಳಸಿಕೊಂಡು ಎಳೆಯಲಾಗಿರುವ ಅನಧಿಕೃತ ಇಂಟರ್ನೆಟ್, ಡಿಶ್ ಹಾಗು ಒಎಫ್ಸಿ ಕೇಬಲ್ಗಳ ವಿರುದ್ಧ ಬೆಸ್ಕಾಂ ಸಮರ ಸಾರಿದ್ದು, ಕೇಬಲ್ಗಳ ತೆರವಿಗೆ ಕಟ್ಟುನಿಟ್ಟಿನ ಕ್ರಮ ತೆಗೆದುಕೊಂಡಿದೆ. ಪಾದಚಾರಿಗಳ ಸುಗಮ ಸಂಚಾರಕ್ಕೆ ಅಡ್ಡಿಯಾಗಿರುವ ಹಾಗು ವಿದ್ಯುತ್ ಕಂಬಗಳ ಮೇಲೆ ಅಕ್ರಮವಾಗಿ ಅಳವಡಿಸಿರುವ ಕೇಬಲ್ಗಳನ್ನು ತ್ವರಿತವಾಗಿ ತೆರವುಗೊಳಿಸುವ ಕಾರ್ಯಾಚರಣೆಗೆ ಬೆಸ್ಕಾಂ ಚಾಲನೆ ನೀಡಿದೆ.
ಬಿಬಿಎಂಪಿ ಆದೇಶ ಹಾಗೂ ಇತ್ತೀಚೆಗೆ ಸಂಜಯನಗರದ ಸಮೀಪ ಒಎಫ್ಸಿ ಕೇಬಲ್ ತುಳಿದು ವಿದ್ಯುತ್ ಅಪಘಾತಕ್ಕೊಳಕ್ಕಾಗಿ ವ್ಯಕ್ತಿಯೊಬ್ಬರು ಮೃತಪಟ್ಟ ಘಟನೆ ಬಳಿಕ ಬೆಸ್ಕಾಂ ಎಚ್ಚೆತ್ತುಕೊಂಡಿದೆ. ವಿದ್ಯುತ್ ಕಂಬಗಳ ಮೇಲಿರುವ ಅನಧಿಕೃತ ಕೇಬಲ್ಗಳನ್ನು ತೆರವುಗೊಳಿಸುವ ಕೆಲಸಕ್ಕೆ ಇನ್ನಷ್ಟು ವೇಗ ನೀಡಿ, ಕೇಬಲ್ ಮತ್ತು ವೈರ್ಗಳನ್ನು ತೆರವುಗೊಳಿಸಲು ಅಧಿಕಾರಿಗಳಿಗೆ ಕಟ್ಟುನಿಟ್ಟಿನ ಆದೇಶ ನೀಡಿದೆ.
ಬೆಂಗಳೂರು ನಗರ ಜಿಲ್ಲೆಯ ನಾಲ್ಕು ವೃತ್ತಗಳಲ್ಲಿ ಮೇ ತಿಂಗಳ ಅಂತ್ಯದ ವೇಳೆಗೆ ಸುಮಾರು 1,46,281 ಮೀಟರ್ ಉದ್ದದ ಒಎಫ್ಸಿ ಕೇಬಲ್, 87665 ಮೀಟರ್ ಉದ್ದದ ಡಿಶ್ ಕೇಬಲ್, 87,007 ಮೀಟರ್ ಉದ್ದದ ವಿವಿಧ ಖಾಸಗಿ ಕಂಪನಿಗಳ ಇಂಟರ್ನೆಟ್ ಡೇಟಾ ಕೇಬಲ್ ಹಾಗು ಸುಮಾರು 928 ಟಿಸಿಗಳ ಬಳಿ ಇರುವ ಅಪಾಯಕಾರಿ ಕೇಬಲ್ಗಳನ್ನು ಬೆಸ್ಕಾಂ ಸಿಬ್ಬಂದಿ ತೆರವುಗೊಳಿಸಿದ್ದಾರೆ. ರಿಂಗ್ ಮೈನ್ ಯುನಿಟ್ (ಆರ್ ಎಂಯು) ಬಳಿ ಇರುವ 164 ನಿರುಪಯುಕ್ತ ಎಲೆಕ್ಟ್ರಾನಿಕ್ ವಸ್ತುಗಳನ್ನು ತೆರವುಗೊಳಿಸಲಾಗಿದೆ ಎಂದು ಬೆಸ್ಕಾಂ ಮುಖ್ಯ ಪ್ರಧಾನ ವ್ಯವಸ್ಥಾಪಕ (ಆಪರೇಷನ್ಸ್ ), ಎಂ.ಎಲ್. ನಾಗರಾಜ್ ತಿಳಿಸಿದ್ದಾರೆ. ಬೆಸ್ಕಾಂನಿಂದ ಅನುಮತಿ ಪಡೆಯದೆ ಮತ್ತು ಯಾವುದೇ ಸುರಕ್ಷಿತ ಕ್ರಮಗಳನ್ನು ಅಳವಡಿಸದೆ ವಿದ್ಯುತ್ ಕಂಬಗಳ ಮೇಲೆ ಜೋತು ಬಿಟ್ಟಿರುವ ಒಎಫ್ಸಿ ಮತ್ತು ಇಂಟರ್ನೆಟ್ ಡೇಟಾ ಕೇಬಲ್ಗಳನ್ನು ತೆರವುಗೊಳಿಲಾಗುತ್ತಿದೆ ಎಂದು ಮಾಧ್ಯಮ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಅನಧಿಕೃತ ಕೇಬಲ್ಗಳ ತೆರವು ಕಾರ್ಯಾಚರಣೆ ನಿರಂತರವಾಗಿ ನಡೆಯುತ್ತಿದ್ದು, ಇತ್ತೀಚೆಗೆ ಸಂಜಯನಗರ ಮತ್ತು ಹೆಬ್ಬಾಳದಲ್ಲಿ ಸಂಭವಿಸಿದ ಪ್ರತ್ಯೇಕ ಇಲಾಖೇತರ ವಿದ್ಯುತ್ ಅಪಘಾತದಲ್ಲಿ ಇಬ್ಬರು ಮೃತಪಟ್ಟ ಹಿನ್ನೆಲೆಯಲ್ಲಿ ವಿದ್ಯುತ್ ಕಂಬಗಳ ಮೇಲಿರುವ ಅನಧಿಕೃತ ಕೇಬಲ್ಗಳ ತೆರವು ಕಾರ್ಯಾಚರಣೆಯನ್ನು ತೀವ್ರಗೊಳಿಸಲಾಗಿತ್ತು ಎಂದು ಬೆಸ್ಕಾಂ ತಿಳಿಸಿದೆ.
ಬೆಸ್ಕಾಂನ ವ್ಯವಸ್ಥಾಪಕ ನಿರ್ದೇಶಕ ಪಿ. ರಾಜೇಂದ್ರ ಚೋಳನ್ ಮತ್ತು ನಿರ್ದೇಶಕ (ತಾಂತ್ರಿಕ) ಡಿ. ನಾಗಾರ್ಜುನ ಅವರ ಸೂಚನೆ ಮೇರೆಗೆ ಬೆಸ್ಕಾಂ ಮುಖ್ಯ ಪ್ರಧಾನ ವ್ಯವಸ್ಥಾಪಕ (ಆಪರೇಷನ್ಸ್ ), ಎಲ್ಲ ವಲಯಗಳ ಮುಖ್ಯ ಇಂಜಿನಿಯರ್ಗಳಿಗೆ ವಿದ್ಯುತ್ ವಿತರಣಾ ಕಂಬಗಳ ಮೇಲೆ ಅಳವಡಿಸಿರುವ ಅನಧಿಕೃತ ಕೇಬಲ್ಗಳು ಮತ್ತು ವೈರ್ಗಳನ್ನು ಜೂನ್ ತಿಂಗಳ ಒಳಗೆ ತೆರವುಗೊಳಿಸಲು ಕಟ್ಟುನಿಟ್ಟಿನ ಸೂಚನೆ ನೀಡಿದ್ದಾರೆ.
ಖಾಸಗಿ ಕಂಪನಿಗಳ ವಿರುದ್ಧ ಕ್ರಿಮಿನಲ್ ಮೊಕದ್ದಮೆ: ಅನಧಿಕೃತ ಕೇಬಲ್ಗಳನ್ನು ಅಳವಡಿಸಿರುವ ಖಾಸಗಿ ಕಂಪನಿಗಳ ವಿರುದ್ಧ ಕ್ರಿಮಿನಲ್ ಮೊಕದ್ದಮೆ ದಾಖಲಿಸಲು ಕೂಡ ಅಧಿಕಾರಿಗಳಿಗೆ ಸೂಚನೆ ನೀಡಲಾಗಿದೆ. ಅನಧಿಕೃತ ಮತ್ತು ಸರಿಯಾಗಿ ನಿರ್ವಹಣೆ ಮಾಡದ ಕೇಬಲ್ಗಳಿಂದ ಸಾರ್ವಜನಿಕರ ಸುಗಮ ಸಂಚಾರಕ್ಕೆ ಅಡಚಣೆ ಮತ್ತು ಮಳೆಗಾಲದಲ್ಲಿ ವಿದ್ಯುತ್ ಅಪಘಾತಗಳು ಸಂಭವಿಸುತ್ತಿವೆ. ಇವುಗಳನ್ನು ಕೂಡಲೇ ತೆರವುಗೊಳಿಸದಿದ್ದರೆ ಸಂಬಂಧಪಟ್ಟ ಅಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಸಲಾಗಿದೆ.
ಉದ್ಯಾನವನ, ಬಸ್ ನಿಲ್ದಾಣ ಮತ್ತು ಇತರ ಸಾರ್ವಜನಿಕ ಸ್ಥಳಗಳಲ್ಲಿ ಹಾಕಿರುವ ಜಾಹೀರಾತು ಫಲಕ ಮತ್ತು ಹೋರ್ಡಿಂಗ್ಸ್ಗಳಿಂದುಂಟಾಗುವ ವಿದ್ಯುತ್ ಅವಘಡ ತಪ್ಪಿಸಲು ಅರ್ಥಿಂಗ್ ಅಳವಡಿಸಿರುವುದನ್ನು ಖಾತರಿ ಪಡಿಸಿಕೊಳ್ಳಬೇಕು. ತೆರವುಗೊಳಿಸಿರುವ ಕುರಿತು ಪ್ರಗತಿ ವರದಿಯನ್ನು ಕೂಡ ಸಲ್ಲಿಸಲು ಬೆಸ್ಕಾಂ ನಿಗಮ ಕಚೇರಿ ಎಲ್ಲ ವಲಯಗಳ ಮುಖ್ಯ ಇಂಜಿನಿಯರ್ಗಳಿಗೆ ಸೂಚಿಸಲಾಗಿದೆ. ಅನಧಿಕೃತ ಕೇಬಲ್ಗಳನ್ನು ತೆರವುಗೊಳಿಸಿದ ಮೇಲೂ ಮತ್ತೆ ಅದನ್ನು ವಿದ್ಯುತ್ ಕಂಬಗಳ ಮೇಲೆ ಅಳವಡಿಸುವ ಖಾಸಗಿ ಕಂಪನಿಗಳ ವಿರುದ್ಧ ಪ್ರಕರಣ ದಾಖಲಿಸಲು ಸಂಬಂಧಪಟ್ಟ ಅಧಿಕಾರಿಗಳಿಗೆ ಸೂಚಿಸಲಾಗಿದೆ ಎಂದು ಬೆಸ್ಕಾಂ ಮುಖ್ಯ ಪ್ರಧಾನ ವ್ಯವಸ್ಥಾಪಕರು (ಆಪರೇಷನ್ಸ್ ) ತಿಳಿಸಿದ್ದಾರೆ.
ಕೇಬಲ್ ತೆರವು ಎಷ್ಟಾಗಿದೆ? ಬೆಸ್ಕಾಂ ಉತ್ತರ ವೃತ್ತದಲ್ಲಿ 33,217 ಮೀಟರ್ ಒಎಫ್ಸಿ ಕೇಬಲ್ ತೆರವು ಮಾಡಲಾಗಿದ್ದು, ಈ ಪೈಕಿ ಅತೀ ಹೆಚ್ಚು 16,565 ಮೀಟರ್ ಉದ್ದದ ಕೇಬಲ್ನ್ನು ಹೆಬ್ಬಾಳ ವಿಭಾಗ ಒಂದರಲ್ಲಿಯೇ ತೆರವುಗೊಳಿಸಲಾಗಿದೆ. ಹಾಗೆಯೇ 13,517 ಮೀಟರ್ ಉದ್ದದ ಡಿಶ್ ಕೇಬಲ್ ಮತ್ತು 10,532 ಮೀಟರ್ ಉದ್ದದ ಇಂಟರ್ನೆಟ್ ಡೇಟಾ ಕೇಬಲ್ಗಳನ್ನು ಉತ್ತರ ವೃತ್ತದಲ್ಲಿ ತೆರವು ಮಾಡಲಾಗಿದೆ.
ಅದೇ ರೀತಿ ಪೂರ್ವ ವೃತ್ತದಲ್ಲಿ 61,304 ಮೀಟರ್ ಒಎಫ್ಸಿ, 45,037 ಮೀಟರ್ ಡಿಶ್, 52,530 ಮೀಟರ್ ಇಂಟರ್ನೆಟ್ ಡೇಟಾ ಕೇಬಲ್ಗಳನ್ನು ತೆರವುಗೊಳಿಸಲಾಗಿದೆ. ಪಶ್ಚಿಮ ವೃತ್ತದಲ್ಲಿ 7,605 ಮೀಟರ್ ಒಎಫ್ಸಿ, 8,625 ಮೀಟರ್ ಡಿಶ್, 8,345 ಮೀಟರ್ ಇಂಟರ್ನೆಟ್ ಡೇಟಾ ಕೇಬಲ್ಗಳನ್ನು ತೆರವು ಮಾಡಲಾಗಿದೆ. ದಕ್ಷಿಣ ವೃತ್ತದಲ್ಲಿ 44,163 ಮೀಟರ್ ಒಎಫ್ಸಿ, 20,486 ಮೀಟರ್ ಡಿಶ್, 15,600 ಮೀಟರ್ ಇಂಟರ್ನೆಟ್ ಡೇಟಾ ಕೇಬಲ್ಗಳನ್ನು ತೆರವುಗೊಳಿಸಲಾಗಿದೆ.
ದಾವಣಗೆರೆ ವೃತ್ತದಲ್ಲಿ 1,320 ಮೀಟರ್ ಒಎಫ್ಸಿ, 47,259 ಮೀಟರ್ ಡಿಶ್, 238 ಮೀಟರ್ ಇಂಟರ್ನೆಟ್ ಡೇಟಾ ಕೇಬಲ್ಗಳನ್ನು ತೆರವುಗೊಳಿಸಲಾಗಿದ್ದು, ತುಮಕೂರು ವೃತ್ತದಲ್ಲಿ 450 ಮೀಟರ್ ಒಎಫ್ಸಿ, 13400 ಮೀಟರ್ ಡಿಶ್, 1,522 ಮೀಟರ್ ಇಂಟರ್ನೆಟ್ ಡೇಟಾ ಕೇಬಲ್ಗಳನ್ನು ತೆರವುಗೊಳಿಸಲಾಗಿದೆ.
ದಾವಣಗೆರೆ ಮತ್ತು ತುಮಕೂರು ಬೆಸ್ಕಾಂ ವೃತ್ತಗಳಿಗೆ ಒಳಪಡುವ ಚಿತ್ರದುರ್ಗದ ವಲಯದಲ್ಲಿ ಇದುವರೆಗೆ ಒಟ್ಟು 1,770 ಮೀಟರ್ ಉದ್ದದ ಮೀಟರ್ ಒಎಫ್ಸಿ, 60,659 ಮೀಟರ್ ಡಿಶ್, 1,750 ಮೀಟರ್ ಇಂಟರ್ನೆಟ್ ಡೇಟಾ ಕೇಬಲ್ಗಳನ್ನು ತೆರವುಗೊಳಿಸಲಾಗಿದೆ.
ಇದನ್ನೂ ಓದಿ: ಬೆಂಗಳೂರು: ತುಂಡಾಗಿ ಬಿದ್ದಿದ್ದ ವಿದ್ಯುತ್ ತಂತಿ ತುಳಿದು ಯುವಕ ಸಾವು..ಬೆಸ್ಕಾಂ ವಿರುದ್ಧ ಜನರ ಆಕ್ರೋಶ
