ಸಿನಿಮಾ ರೀತಿಯಲ್ಲಿ ಕಾರ್​ ಚೇಸಿಂಗ್​: ಗುಂಡು ಹಾರಿಸಿ, ಖದೀಮರ ಬಂಧನ -

ದರೋಡೆ ಮಾಡಲು ಯತ್ನಿಸುತ್ತಿದ್ದ ಗ್ಯಾಂಗ್ ಮೇಲೆ ದಾಳಿ ನಡೆಸಿದ ಪೊಲೀಸರು ಗುಂಡು ಹಾರಿಸಿ ಮೂವರನ್ನು ಬಂಧಿಸಿದ್ದಾರೆ.

ಬೆಂಗಳೂರು: ಸಿನಿಮೀಯ ರೀತಿಯಲ್ಲಿ ದರೋಡೆಕೋರರನ್ನು ಚೇಸ್​ ಮಾಡಿದ ಪೊಲೀಸರು ಗುಂಡಿನ ದಾಳಿ ನಡೆಸಿ, ಮೂವರು ಖದೀಮರನ್ನು ಬಂಧಿಸಿರುವ ಘಟನೆ ಅನೇಕಲ್​ನಲ್ಲಿ ನಡೆದಿದೆ.

ದರೋಡೆ ಮಾಡಲು ಯತ್ನಿಸುತ್ತಿದ್ದ ಗ್ಯಾಂಗ್​ ಮೇಲೆ ಕಣ್ಣಿಟ್ಟಿದ್ದ ಪೊಲೀಸರು ಅನಿವಾರ್ಯವಾಗಿ ಗುಂಡಿನ ದಾಳಿ ನಡೆಸಿದ್ದಾರೆ. ಘಟನೆಯಲ್ಲಿ ಓರ್ವ ದರೋಡೆಕೋರನ ಕಾಲಿಗೆ ಗಾಯವಾಗಿದೆ. ಈ ವೇಳೆ ಮೂವರನ್ನು ಹಿಡಿಯುವಲ್ಲಿ ಪೊಲೀಸರು ಸಫಲರಾಗಿದ್ದಾರೆ ಎಂದು ತಿಳಿದುಬಂದಿದೆ.

ಆನೇಕಲ್ ಪಟ್ಟಣದ ವೆಂಕಟರಾಜು/ತುಕಡಿ (22) , ಗಿರಿಜಾ ಶಂಕರ್ ಬಡಾವಣೆಯ ಅಭಿಲಾಷ್/ಅಭಿ(19) , ಬಿಡದಿಯ ಸಂತೋಷ್(23) ಸಿಕ್ಕಿಬಿದ್ದಿದ್ದು, ಉಳಿದ ನಾಲ್ವರ ಪತ್ತೆಗೆ ಪೊಲೀಸರು ಬಲೆ ಬೀಸಿದ್ದಾರೆ.

ಆಗಿದ್ದೇನು?

ಇದೇ ತಿಂಗಳ 13 ನೇ ತಾರೀಖಿನಂದು ಆನೇಕಲ್-ಹೊಸೂರು ರಸ್ತೆಯ ಹೊಂಪಲಘಟ್ಟ-ಮುತ್ತುಗಟ್ಟೆ ಕ್ರಾಸ್ ಬಳಿ ಏಳು ಮಂದಿಯ ಗ್ಯಾಂಗ್​ ದರೋಡೆ ಮಾಡಲು ಹೊಂಚು ಹಾಕಿದ್ದರು. ಈ ಬಗ್ಗೆಮಾಹಿತಿ ಪಡೆದ ಆನೇಕಲ್ ಪಿಎಸ್ಐ ಹೇಮಂತ್ ಕುಮಾರ್, ತಮ್ಮ ಸಿಬ್ಬಂದಿ ಶಿವಣ್ಣ, ಲೋಕೇಶ್, ನರೇಂದ್ರ ಮತ್ತು ಈಶ್ವರ್ ಜತೆ ದಾಳಿ ನಡೆಸಿದ್ದಾರೆ. ಕೂಡಲೇ ​ ಕಾರಿನಲ್ಲಿದ್ದ ಐದು ದರೋಡೆಕೋರರು ಬೈಕ್​​ನಲ್ಲಿ ಕುಳಿತಿದ್ದ ಇಬ್ಬರು ಪೊಲೀಸರ ಮೇಲೆ ಕಾರು ಹತ್ತಿಸಲು ಮುಂದಾಗಿದ್ದರು. ಈ ವೇಳೆ ಆತ್ಮರಕ್ಷಣೆಗಾಗಿ ಕಾರಿನ ಬಲ ಚಕ್ರಕ್ಕೆ ಎಸ್ಐ ಹೇಮಂತ್​ ಗುಂಡು ಹೊಡೆದಿದ್ದಾರೆ ಎನ್ನಲಾಗಿದೆ. ಆರೋಪಿಗಳಿದ್ದ ಕಾರಿನ ಬಾಗಿಲಿಗೆ ಗುಂಡು ಹೊಡೆದಾಗ ಅದು ಚಾಲಕನ ಕಾಲಿಗೆ ತಾಗಿ ಕಾರು ನಿಂತಿದೆ. ಈ ವೇಳೆ ಕಾರಿನಲ್ಲಿದ್ದ ನಾಲ್ವರು ಪರಾರಿಯಾಗಿದ್ದಾರೆ. ಮತ್ತೊಂದು ಕಡೆಯಿಂದ ದಾಳಿ ನಡೆಸಿದ ಮೂವರು ಆರೋಪಿಗಳು ಸಿಕ್ಕಿಬಿದ್ದಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಕೃತ್ಯಕ್ಕಾಗಿ ಬಳಸಿರುವ ಕಾರು

ದರೋಡೆಗೆ ಮುಂದಾದ ಈ ಗುಂಪಿನ ಹಿಂದೆ ದೊಡ್ಡ ಜಾಲವೇ ಇದೆ ಎಂದು ಪೊಲೀಸರು ಶಂಕೆ ವ್ಯಕ್ತಪಡಿಸಿದ್ದು, ತನಿಖೆ ಮುಂದುವರೆಸಿದ್ದಾರೆ.