ಬೆಂಗಳೂರು : ತಂಬಾಕು ಸೇವನೆಗೆ ಹುಕ್ಕಾ ಬಳಸಬಹುದಾಗಿದ್ದರೂ ಅದರ ಸೇವನೆಗೆ ಪ್ರತ್ಯೇಕ ವ್ಯವಸ್ಥೆ ಮಾಡಬೇಕು. ಸಂಬಂಧಪಟ್ಟ ಪ್ರಾಧಿಕಾರದಿಂದ ಅನುಮತಿ ಪಡೆದು ನಿರ್ದಿಷ್ಟ ಜಾಗದಲ್ಲಿ ಸ್ಮೋಕಿಂಗ್ ಝೋನ್ ನಿರ್ಮಿಸಬೇಕು. ಇದರಿಂದ ಇತರರಿಗೆ ತೊಂದರೆಯಾಗಬಾರದು ಎಂದು ಹೈಕೋರ್ಟ್ ಆದೇಶಿಸಿದೆ.
ಅಲ್ಲದೇ, ಸಾರ್ವಜನಿಕ ಸ್ಥಳಗಳಲ್ಲಿ ಧೂಮಪಾನ ನಿಷೇಧಿಸಿರುವುದರಿಂದ ರೆಸ್ಟೋರೆಂಟ್ ಮಾಲೀಕರು ಬಿಬಿಎಂಪಿಯಿಂದ ಅಗತ್ಯ ಅನುಮತಿ ಪಡೆದು ಆನಂತರ ಹೊಗೆರಹಿತ ಹುಕ್ಕಾ ಸೇವನೆಗೆ ನಿರ್ದಿಷ್ಟ ಸ್ಮೋಕಿಂಗ್ ಝೋನ್ ರಚಿಸಬೇಕು ಎಂದು ಸ್ಪಷ್ಟಪಡಿಸಿದೆ. ಬಸವನಗುಡಿಯಲ್ಲಿರುವ ಸೋಹೋ ಪಬ್ ಅಂಡ್ ಗ್ರಿಲ್‌ ಹೆಸರಿನ ರೆಸ್ಟೋರೆಂಟ್ ಮಾಲೀಕರು ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಸ್‌ ಜಿ ಪಂಡಿತ್‌ ಅವರಿದ್ದ ಪೀಠ ಈ ಆದೇಶ ಹೊರಡಿಸಿದೆ.
'ಸಾರ್ವಜನಿಕ ಸ್ಥಳಗಳಲ್ಲಿ ಧೂಮಪಾನ ನಿಷೇಧಿಸಿರುವುದರಿಂದ ಹುಕ್ಕಾ ಸೇವನೆ ಇತರೆ ಗ್ರಾಹಕರಿಗೆ ತೊಂದರೆ ಉಂಟು ಮಾಡಬಾರದು. ಹುಕ್ಕಾ ಸೇವನೆಗೆ ರೆಸ್ಟೋರೆಂಟ್ನಲ್ಲಿಯೇ ಪ್ರತ್ಯೇಕ ಜಾಗ ಮೀಸಲಿಡಬೇಕಾಗುತ್ತದೆ. ಇನ್ನು ಪಬ್ ಮಾಲೀಕರಿಗೆ ತಪಾಸಣೆ ಹೆಸರಿನಲ್ಲಿ ಪೊಲೀಸರು ಅನಗತ್ಯ ಕಿರುಕುಳ ನೀಡಬಾರದು.
ಹೈಕೋರ್ಟ್ ಈ ಹಿಂದೆಯೇ ತಂಬಾಕು ಸೇವನೆಗೆ ಹುಕ್ಕಾ ಯಂತ್ರ ಬಳಸುವುದನ್ನು ಸಮ್ಮತಿಸಿದೆ. ಹೀಗಾಗಿ, ತಂಬಾಕು ಹೊರತುಪಡಿಸಿ ಬೇರೆ ನಿಷೇಧಿತ ವಸ್ತುಗಳನ್ನು ಬಳಕೆ ಮಾಡಬಾರದು. ಆ ರೀತಿ ನಿಷೇಧಿತ ವಸ್ತುಗಳ ಬಳಕೆ ಕಂಡು ಬಂದಲ್ಲಿ ಅಥವಾ ಮಾಹಿತಿ ಸಿಕ್ಕಲ್ಲಿ ಪೊಲೀಸರು ಕಾನೂನು ರೀತಿ ಕ್ರಮ ಜರುಗಿಸಬಹುದು ಎಂದು ಪೀಠ ಆದೇಶದಲ್ಲಿ ತಿಳಿಸಿದೆ.
(ಇದನ್ನೂ ಓದಿ: ಹುಕ್ಕಾ-ಬಾರ್ ನಲ್ಲಿ ಸಿಕ್ಕಿಬಿದ್ದ ಅಪ್ರಾಪ್ತರು: ಅಧಿಕಾರಿಗಳಿಗೆ ಶಾಕ್)
