ಬೆಂಗಳೂರು: ಪುಡಿ ರೌಡಿಯೊಬ್ಬ ಪೊಲೀಸ್ ಪೇದೆಗೆ ಕಪಾಳಮೋಕ್ಷ ಮಾಡಿದ್ದಾನೆ. ಅಲ್ಲದೆ ಈ ಬಗ್ಗೆ ಪೊಲೀಸ್ ಕಂಪ್ಲೇಂಟ್ ಕೊಟ್ಟರೆ ಕೊಲೆ ಮಾಡುವುದಾಗಿ ಧಮ್ಕಿ ಹಾಕಿರುವ ಪ್ರಕರಣ ಪುಟ್ಟೇನಹಳ್ಳಿ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.
ಪುಟ್ಟೇನಹಳ್ಳಿ ಠಾಣೆಯ ಪೊಲೀಸ್ ಕಾನ್ಸ್ಟೇಬಲ್ ಭರಮಗೌಡ ಸಿದ್ದೇಶ್ ಹಲ್ಲೆಗೆ ಒಳಗಾದವರು. ಭರಮಗೌಡ ಸಿದ್ದೇಶ್ ಅವರು ಕರ್ತವ್ಯದಲ್ಲಿರದ ವೇಳೆ ಸಾರಕ್ಕಿ ಗಾರ್ಡನ್ ಸಮೀಪದ ತ್ರಿಶೂಲ್ ಸ್ಕೂಲ್ ಬಳಿ ಇರುವ ತಮ್ಮ ಸಂಬಂಧಿಕರೊಬ್ಬರ ಅಂಗಡಿ ಮುಂದೆ ನಿಂತು ರಸ್ತೆಗೆ ಉಗುಳಿದ್ದರಂತೆ. ಅದು ಅಲ್ಲಿಯೇ ಬರ್ತಿದ್ದ ಪುಡಿ ರೌಡಿ ರಿಷಿ ಎಂಬುವನಿಗೆ ಅಚಾನಕ್ಕಾಗಿ ಸಿಡಿದಿತ್ತು. ಇಷ್ಟಕ್ಕೆ ಕಿಡಿಕಾರಿದ ರಿಷಿ, ಏಕಾಏಕಿ ಪೇದೆ ಮೇಲೆ ಹಲ್ಲೆ ನಡೆಸಿದ್ದಾನೆ. ಈ ವೇಳೆ ಪೇದೆ ಭರಮಗೌಡ, ನಾನು ಪೊಲೀಸ್ ನನ್ನ ಮೇಲೆ ಹೀಗೆ ಪೌರುಷ ತೋರಿಸ್ತಿಯಾ, ಸ್ಥಳೀಯರ ಕಥೆ ಏನು? ಎಂದು ಪ್ರಶ್ನಿಸಿದ್ದಾರೆ. ಆಗ ರೊಚ್ಚಿಗೆದ್ದ ರೌಡಿ ರಿಷಿ, ಪೇದೆ ಮೇಲೆ ಮತ್ತೆ ಹಲ್ಲೆ ನಡೆಸಿ ಪರಾರಿ ಆಗಿದ್ದಾನೆ.
ಘಟನೆ ಸಂಬಂಧ ಪುಟ್ಟೇನಹಳ್ಳಿ ಪೊಲೀಸ್ ಠಾಣೆಯಲ್ಲಿ ಎಫ್ಐಆರ್ ದಾಖಲಾಗಿದ್ದು, ತನಿಖೆ ನಡೆಯುತ್ತಿದೆ. ವಿಚಾರಣೆ ವೇಳೆ ಪೇದೆ ಭರಮಗೌಡನ ಮೇಲೆ ಹಲ್ಲೆ ನಡೆಸಿರುವ ರಿಷಿ, ಕಾರ್ಪೊರೇಟರೊಬ್ಬರ ಸಂಬಂಧಿ ಎಂಬುವುದು ಗೊತ್ತಾಗಿದೆ. ಸದ್ಯ, ತಲೆಮರೆಸಿಕೊಂಡಿರುವ ರಿಷಿ ಪತ್ತೆಗೆ ಕಾರ್ಯಾಚರಣೆ ನಡೆದಿದೆ ಎಂದು ಬೆಂಗಳೂರು ದಕ್ಷಿಣ ವಿಭಾಗದ ಡಿಸಿಪಿ ರೋಹಿಣಿ ಕಟೋಚ್ ತಿಳಿಸಿದ್ದಾರೆ.
