ದೊಡ್ಡಬಳ್ಳಾಪುರ: ದಾಂಪತ್ಯ ಕಲಹದಿಂದ ವಿಚ್ಚೇದನ ಪಡೆದು ಪತಿ - ಪತ್ನಿ ದೂರವಾಗಿದ್ದರು. ಇನ್ನು ದೂರವಾದ ಪತ್ನಿಗೆ ಜೀವನಾಂಶ ನೀಡಬೇಕು ಎಂದು ನ್ಯಾಯಾಲಯ ಆದೇಶ ನೀಡಿತ್ತು. ಆದರೆ, ಜೀವನಾಂಶವಾಗಿ ಹಣ ಕೊಡಲಾಗದೇ ಜೈಲಿಗೆ ಹೋಗುವ ಭಯದಿಂದ ವಿಷ ಕುಡಿದು ಪತಿ ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ನಗರದ ಪ್ರಿಯದರ್ಶಿನ ಲೇಔಟ್ನಲ್ಲಿ ನಡೆದಿದೆ.
ಅಮೀರ್ (30) ಆತ್ಮಹತ್ಯೆಗೆ ಶರಣಾದ ದುರ್ದೈವಿ. ದಾಂಪತ್ಯ ಕಲಹದಿಂದ ಮೃತ ಅಮೀರ್ ಪತ್ನಿ ದೂರವಾಗಿದ್ದರು. ವಿಚ್ಛೇದನ ಪಡೆದ ಅಮೀರ್ ಪತ್ನಿಗೆ ಜೀವನಾಂಶವಾಗಿ ಒಂದು ಲಕ್ಷ ರೂ. ಕೊಡಬೇಕಾಗಿತ್ತು. ಹಣ ಹೊಂದಿಸಲಾಗದೇ ಪರಿತಪಿಸುತ್ತಿದ್ದ ಅಮೀರ್ ಕೋರ್ಟ್ನಲ್ಲಿ ಹಣ ಕಟ್ಟಲಾಗದಿದ್ದರೆ ಜೈಲಿಗೆ ಹೋಗಬೇಕು ಎನ್ನುವ ಭಯದಿಂದ ವಿಷ ಕುಡಿದು ಆತ್ಮಹತ್ಯೆಗೆ ಶರಣಾಗಿದ್ದಾನೆ.
ಘಟನೆ ವಿವರ:
ಮೃತ ಅಮೀರ್ ಶಿಡ್ಲಘಟ್ಟ ಮೂಲದ ನೂರ್ ಜಾನ್ ಎಂಬಾಕೆಯನ್ನು 8 ವರ್ಷಗಳ ಹಿಂದೆ ಮದುವೆಯಾಗಿದ್ದ. ಇವರಿಗೆ ಇಬ್ಬರು ಮಕ್ಕಳಿದ್ದಾರೆ. ಇನ್ನು ವೆಲ್ಡಿಂಗ್ ಕೆಲಸ ಮಾಡುತ್ತಿದ್ದ ಅಮೀರ್ ಸಂಸಾರ ನೋಡಿಕೊಳ್ಳುತ್ತಿದ್ದ. ಈ ನಡುವೆ ಅಮೀರ್ ಮತ್ತು ನೂರ್ ಜಾನ್ ಸಂಸಾರದಲ್ಲಿ ಕಲಹ ಶುರುವಾಗಿದೆ. ಈ ಜಗಳ ಕೋರ್ಟ್ ಮೆಟ್ಟಿಲೇರಿ ಬಳಿಕ ಇಬ್ಬರು ವಿಚ್ಚೇದನ ಪಡೆದಿದ್ದರು.
ವಿಚ್ಛೇದನದ ಸಂದರ್ಭದಲ್ಲಿ ಪತ್ನಿಗೆ 1 ಲಕ್ಷ ರೂಪಾಯಿ ಹಣವನ್ನ ಜೀವನಾಂಶವಾಗಿ ಕೊಡಬೇಕಿತ್ತು. ನಾಳೆ ಜೀವನಾಂಶದ ಹಣವನ್ನ ಕೋರ್ಟ್ನಲ್ಲಿ ಕಟ್ಟಬೇಕಿತ್ತು. ಆದರೆ, ಹಣ ಹೊಂದಿಸಲಾಗದೇ ಸೋತು ಹೋಗಿದ್ದ ಅಮೀರ್ ಒಂದು ವೇಳೆ ಕೋರ್ಟ್ನಲ್ಲಿ ಹಣ ಕಟ್ಟದಿದ್ದರೆ ಜೈಲಿಗೆ ಹೋಗಬೇಕು ಎನ್ನುವ ಭಯದಿಂದ ಮನೆಯ ಕೊಠಡಿಯಲ್ಲಿ ವಿಷ ಕುಡಿದು ಆತ್ಮಹತ್ಯೆಗೆ ಯತ್ನಿಸಿದ್ದಾನೆ. ವಿಷ ಕುಡಿದು ಅಸ್ವಸ್ಥರಾಗಿದ್ದ ಅಮೀರ್ನನ್ನು ಬೆಂಗಳೂರಿನ ಆಸ್ಪತ್ರೆಗೆ ಸಾಗಿಸಲಾಗಿತು. ಆದರೆ ಚಿಕಿತ್ಸೆ ಫಲಕಾರಿಯಾಗದೇ ಸಾವನ್ನಪ್ಪಿದ್ದಾನೆ.
ಸದ್ಯ ದೊಡ್ಡಬಳ್ಳಾಪುರ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
