ಬೆಳಗಾವಿ: 1980 ರಲ್ಲಿ ರಾಜ್ಯದಲ್ಲಿ ಗುಂಡೂರಾವ್ ಸರ್ಕಾರವಿದ್ದಾಗ ರಾಜ್ಯ ವಿಧಾನಸಭೆಯಲ್ಲಿ ವಿಷಯವೊಂದರ ಮೇಲೆ ಗಹನವಾದ ಚರ್ಚೆ ನಡೆದಿತ್ತು. ಈ ಬಗ್ಗೆ ಕುತೂಹಲಕಾರಿ ಮಾಹಿತಿ ಇಲ್ಲಿದೆ ನೋಡಿ.
ಲಕ್ಷ್ಮೇಶ್ವರದ ಶಾಸಕ ಕಾಂಗ್ರೆಸ್ನ ಗೂಳಪ್ಪ ಉಪನಾಳ ಮತ್ತು ಸವದತ್ತಿ ಕಾಂಗ್ರೆಸ್ ಶಾಸಕ ದಿ. ಜಿ. ಕೆ. ಟಕ್ಕೇದ ಒಂದೇ ಕಡೆಗೆ ಕುಳಿತಿದ್ದರು. ದೊಡ್ಡ ಪೇಟಾ, ಅದರಲ್ಲಿ ಎಲೆ-ಅಡಿಕೆ, ಸುಣ್ಣದ ಕಟ್ಟು ಇರಿಸಿಕೊಂಡಿರುತ್ತಿದ್ದ ಉಪನಾಳ, ಅಪ್ಪಟ ಗ್ರಾಮೀಣ ಶೈಲಿಯ ಶಾಸಕ. ಅವರಿಗೆ ಸದನದಲ್ಲಿ ಏನಾದರೂ ಮಾತನಾಡಿ ಸದನದ ಗಮನ ಸೆಳೆಯಬೇಕೆಂಬ ಆಸೆಯಾಗಿತ್ತಂತೆ. ತಮ್ಮ ಆಸೆಯನ್ನು ಅವರು, ಅವರ ಬದಿಗೇ ಕುಳಿತಿದ್ದ ಹಾಸ್ಯ ಪ್ರಜ್ಞೆಗೆ ಹೆಸರಾಗಿದ್ದ ಟಕ್ಕೇದರ ಕಿವಿಯಲ್ಲಿ ಹೇಳಿಯೇ ಬಿಟ್ಟಿದ್ದರು...!
ಟಕ್ಕೇದರು ತಮ್ಮ ಅಮೂಲ್ಯ ಸಲಹೆ ನೀಡುತ್ತಾ, ಗೂಳಪ್ಪ, ನೀನು ಎದ್ದು ನಿಂತು ಪಾಯಿಂಟ್ ಆಫ್ ಆರ್ಡರ್ ಎಂದು ಬಿಡು. ಅದರ ಹೊಡ್ತಾ ನೋಡು ಎಂದಿದ್ದರಂತೆ. ಗೂಳಪ್ಪ ಎದ್ದು ನಿಂತು, ಸಭಾಧ್ಯಕ್ಷರೇ ಪಾಯಿಂಟ್ ಆಫ್ ಅಡರ್(ಆರ್ಡರ್) ಎಂದು ಕೂಗಿಬಿಟ್ಟರು. ಸಭಾಧ್ಯಕ್ಷರು, ಹೇಳ್ರಿ, ಏನು ಹೇಳ್ರಿ ಎಂದು ಗೂಳಪ್ಪರನ್ನು ಕೇಳಿದ್ದರು. ಆದರೆ ಗೂಳಪ್ಪ, ಪಾಯಿಂಟ್ ಆಫ್ ಅಡರ್ ಅಡರ್ ಎಂದು ಪುನರುಚ್ಛಾರ ಮಾಡತೊಡಗಿದರು. ಇಡೀ ಸದನ ನಗೆಗಡಲದಲ್ಲಿ ಮುಳುಗಿತ್ತು. ಮುಖ್ಯಮಂತ್ರಿ ಗುಂಡೂರಾವ್ ಅವರೂ ನಕ್ಕಿದ್ದರು. ಅವರಿಗೆ ಗೊತ್ತಾಯಿತು ಇದು ಟಕ್ಕೇದರ ಕಿರಿಕ್ ಎಂದು. ಅಲ್ಲಿಂದ ಟಕ್ಕೇದರನ್ನು ಎಬ್ಬಿಸಿ ಬೇರೆ ಕಡೆಗೆ ಕೂರಿಸಿದರು. ಟಕ್ಕೇದರು ತಮಗೆಷ್ಟು ಕಲಿಸಿದ್ದರೊ ಅಷ್ಟನ್ನೇ ಗೂಳಪ್ಪ ಹೇಳಿದ್ದರು.
ದಿ .ಟಕ್ಕೇದರು ಶಾಸಕರಾಗಿದ್ದಾಗ ಬೆಳಗಾವಿ ಪತ್ರಕರ್ತರೊಂದಿಗೆ ವಾರ್ತಾ ಇಲಾಖೆಯ ವಾಹನನದಲ್ಲೇ ಕುಳಿತು ಪ್ರಯಾಣ ಮಾಡುತ್ತಿದ್ದರು. ಆಗ ಪಾಯಿಂಟ್ ಆಫ್ ಅಡರ್ ಪ್ರಸಂಗವನ್ನು ನೆನಪಿಸಿಕೊಳ್ಳುತ್ತಿದ್ದರು. ಟಕ್ಕೇದ 1978 ರಲ್ಲಿ ಸವದತ್ತಿಯಿಂದ ಶಿವಾನಂದ ಕೌಜಲಗಿ ಅವರನ್ನು ಸೋಲಿಸಿ ಆಯ್ಕೆಯಾಗಿದ್ದರು.
