ವಾಷಿಂಗ್ಟನ್ : ಫಿನ್ಲೆಂಡ್ ಮೂಲದ ಬಹುರಾಷ್ಟ್ರೀಯ ಕಂಪನಿ ನೋಕಿಯಾ 60 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ತನ್ನ ಲೋಗೊ ಬದಲಾವಣೆ ಮಾಡಿದೆ. ಹೊಸ ಮಾರುಕಟ್ಟೆಯ ಅಗತ್ಯಗಳಿಗೆ ತಕ್ಕಂತೆ ವೇಗದ ಬೆಳವಣಿಗೆ ಹಾಗೂ ತನ್ನ ಕಾರ್ಯಶೈಲಿಯಲ್ಲಿ ಬದಲಾವಣೆ ಸೂಚಿಸಲು ನೋಕಿಯಾ ಲೋಗೊ ಬದಲಾವಣೆ ಮಾಡಿಕೊಂಡಿದೆ. ತಂತ್ರಜ್ಞಾನ ವರದಿ ಮಾಡುವ ಅಂತಾರಾಷ್ಟ್ರೀಯ ಮಾಧ್ಯಮಗಳ ಪ್ರಕಾರ, ಪೆಕ್ಕಾ ಲುಂಡ್‌ಮಾರ್ಕ್ ಇವರು ನೋಕಿಯಾದ ಟೆಲಿಕಾಂ ಉಪಕರಣಗಳ ವಿಭಾಗದ ಸಿಇಒ ಆಗಿ ಅಧಿಕಾರ ವಹಿಸಿಕೊಂಡ ನಂತರ ಈ ಪ್ರಮುಖ ಬದಲಾವಣೆಯಾಗಿದೆ. ಕಂಪನಿಯ ಉನ್ನತಿಗಾಗಿ ಮರು ಹೊಂದಾಣಿಕೆ, ವೇಗವರ್ಧನೆ ಮತ್ತು ಪ್ರಮಾಣ ಹೀಗೆ ಮೂರು ಹಂತದ ಕಾರ್ಯಯೋಜನೆಯನ್ನು ಹೊಸ ಸಿಇಒ ಪೆಕ್ಕಾ ಲುಂಡ್‌ಮಾರ್ಕ್ ರೂಪಿಸಿದ್ದಾರೆ ಎಂದು ವರದಿಗಳು ತಿಳಿಸಿವೆ.
ತನ್ನ ಹೆಸರು ಹಾಗೂ ಲೋಗೊದಲ್ಲಿ ನೀಲಿ ವರ್ಣವನ್ನು ಇನ್ನು ಮುಂದೆ ನೋಕಿಯಾ ಬಳಸುವುದಿಲ್ಲ. ಬದಲಾಗಿ, ಸಂದರ್ಭಗಳಿಗೆ ತಕ್ಕಂತೆ ಯಾವ ಶೇಡ್ ಉತ್ತಮವಾಗಿ ಹೊಂದಿಕೊಳ್ಳುತ್ತದೆಯೋ ಅದಕ್ಕೆ ತಕ್ಕಂತೆ ಬಳಸಲಾಗುತ್ತದೆ. ಹೀಗಾಗಿ ಯಾವುದೇ ನಿರ್ದಿಷ್ಟ ಬಣ್ಣದ ಯೋಜನೆ ಇಟ್ಟುಕೊಳ್ಳಲಾಗಿಲ್ಲ. ನೋಕಿಯಾ ಇನ್ನು ಮುಂದೆ ಕೇವಲ ಸ್ಮಾರ್ಟ್ಫೋನ್ ಕಂಪನಿಯಲ್ಲ, ಇದು ವಾಣಿಜ್ಯ ತಂತ್ರಜ್ಞಾನ ಕಂಪನಿ ಎಂದು ಲುಂಡ್‌ಮಾರ್ಕ್ ಹೇಳಿದ್ದಾರೆ.
ನೋಕಿಯಾ ತನ್ನ ಟೆಲಿಕಾಂ ಸಲಕರಣೆ ವ್ಯಾಪಾರವನ್ನು ವಿಸ್ತರಿಸುವುದರ ಜೊತೆಗೆ ಇತರ ವ್ಯವಹಾರಗಳಿಗೆ ಉಪಕರಣಗಳನ್ನು ಮಾರಾಟ ಮಾಡುವತ್ತ ಗಮನಹರಿಸಲಿದೆ. ಇವುಗಳಲ್ಲಿ ಅಟೊಮೇಟೆಡ್ ಮ್ಯಾನುಪ್ಯಾಕ್ಚರಿಂಗ್ ಮತ್ತು ಖಾಸಗಿ 5G ನೆಟ್‌ವರ್ಕ್‌ಗಳ ಪರಿಕರಗಳು ಸೇರಿವೆ. ಇದರಿಂದ ನೋಕಿಯಾ ಮಾರುಕಟ್ಟೆಯಲ್ಲಿ ಮೈಕ್ರೋಸಾಫ್ಟ್ ಮತ್ತು ಅಮೆಜಾನ್‌ನೊಂದಿಗೆ ನೇರ ಸ್ಪರ್ಧೆಗಿಳಿಯಲಿದೆ. ನೋಕಿಯಾ ಮತ್ತಷ್ಟು ವಲಯಗಳಿಗೆ ತನ್ನ ಕಾರ್ಯಕ್ಷೇತ್ರ ವಿಸ್ತರಿಸಲು ಮತ್ತು ಅಭಿವೃದ್ಧಿಪಡಿಸಲು ಚಿಂತಿಸುತ್ತಿದೆ ಎಂದು ಲುಂಡ್‌ಮಾರ್ಕ್ ಹೇಳಿದ್ದಾರೆ.
ನೋಕಿಯಾ ಹೊಸ ಮೊಬೈಲ್ ಅನಾವರಣ: ಮನೆಯಲ್ಲಿಯೇ ದುರಸ್ತಿ ಮಾಡಲು ಸಾಧ್ಯವಾಗುವಂತೆ ವಿನ್ಯಾಸಗೊಳಿಸಲಾದ ಮೊದಲ ಬಜೆಟ್ ಆಂಡ್ರಾಯ್ಡ್ ಸ್ಮಾರ್ಟ್ಫೋನ್ Nokia G22 ಅನ್ನು ನೋಕಿಯಾ ಘೋಷಿಸಿದೆ. ಇದು ಬಳಕೆದಾರರಿಗೆ iFixit ಸಹಭಾಗಿತ್ವದಲ್ಲಿ ಐದು ನಿಮಿಷಗಳಲ್ಲಿ ಬ್ಯಾಟರಿ ಬದಲಾಯಿಸಲು ಅನುವು ಮಾಡಿಕೊಡುತ್ತದೆ. ನೋಕಿಯಾ G22 ತೆಗೆಯಬಹುದಾದ ಬ್ಯಾಕ್ ಕವರ್ ಮತ್ತು ಆಂತರಿಕ ವಿನ್ಯಾಸ ಹೊಂದಿದ್ದು ಬ್ಯಾಟರಿ, ಸ್ಕ್ರೀನ್ ಮತ್ತು ಚಾರ್ಜಿಂಗ್ ಪೋರ್ಟ್ ಸೇರಿದಂತೆ ಘಟಕಗಳನ್ನು ಸುಲಭವಾಗಿ ಬಿಚ್ಚಲು ಮತ್ತು ಬದಲಾಯಿಸಲು ಸಾಧ್ಯವಿದೆ.
G22 ಫೋನನ್ನು ಭಾಗಶಃ ಮರುಬಳಕೆಯ ಪ್ಲಾಸ್ಟಿಕ್‌ನಿಂದ ತಯಾರಿಸಲಾಗಿದೆ ಮತ್ತು 6.53 ಇಂಚ್ ಸ್ಕ್ರೀನ್, ದೊಡ್ಡ ಸಾಮರ್ಥ್ಯದ ಬ್ಯಾಟರಿ, 50 ಮೆಗಾಪಿಕ್ಸೆಲ್ ಕ್ಯಾಮೆರಾ ಮತ್ತು ಫಿಂಗರ್‌ಪ್ರಿಂಟ್ ಸ್ಕ್ಯಾನರ್ ಅನ್ನು ಹೊಂದಿದೆ. ಇದು ಆ್ಯಂಡ್ರಾಯ್ಡ್ 12 ಮೇಲೆ ನಡೆಯುತ್ತದೆ. ಮೂರು ವರ್ಷಗಳ ಕಾಲ ಪ್ರತಿ ತಿಂಗಳು ಸೆಕ್ಯೂರಿಟಿ ಅಪ್ಡೇಟ್ಸ್ ಮತ್ತು ಎರಡು ಪ್ರಮುಖ ಆ್ಯಂಡ್ರಾಯ್ಡ್ ವರ್ಷನ್ಗಳನ್ನು ಅಪ್‌ಗ್ರೇಡ್‌ ನೀಡಲಾಗುವುದು. ಶನಿವಾರ ಬಾರ್ಸಿಲೋನಾದಲ್ಲಿ ಆರಂಭವಾದ ಮೊಬೈಲ್ ವರ್ಲ್ಡ್ ಕಾಂಗ್ರೆಸ್‌ಗೆ ಮುನ್ನ ನೋಕಿಯಾ ಈ ಫೋನ್ ಪರಿಚಯಿಸಿದೆ.
ಜನರು ದೀರ್ಘಕಾಲ ಬಾಳಿಕೆ ಬರುವ ಗುಣಮಟ್ಟದ ಸಾಧನಗಳನ್ನು ಬಯಸುತ್ತಾರೆ. ಆದರೆ, ಹಾಗಂತ ಅವುಗಳಿಗಾಗಿ ಈಗ ಅವರು ತೀರಾ ದುಬಾರಿ ಬೆಲೆ ನೀಡಬೇಕಿಲ್ಲ. ಹೊಸ ನೋಕಿಯಾ G22 ಅನ್ನು ಉದ್ದೇಶಪೂರ್ವಕವಾಗಿ ದುರಸ್ತಿ ಮಾಡಬಹುದಾದ ವಿನ್ಯಾಸದೊಂದಿಗೆ ನಿರ್ಮಿಸಲಾಗಿದೆ. ಹೀಗಾಗಿ ನೀವು ಇದನ್ನು ಬಹಳ ಕಾಲದವರೆಗೆ ಬಳಸಬಹುದು ಎಂದು HMD ಗ್ಲೋಬಲ್‌ನ ಪ್ರಾಡಕ್ಟ್ ಮಾರ್ಕೆಟಿಂಗ್ ಮುಖ್ಯಸ್ಥ ಆಡಮ್ ಫರ್ಗುಸನ್ ಹೇಳಿದರು.
ಇದನ್ನೂ ಓದಿ : ವಿದ್ಯಾರ್ಥಿಗಳ ಜ್ಞಾನಾಭಿವೃದ್ಧಿಗಾಗಿ ಮೊಬೈಲ್ ಲೈಬ್ರರಿ.. ಚೆನ್ನೈನ ಅಣ್ಣಾ ವಿವಿ ವಿನೂತನ ಪ್ರಯತ್ನ
