ಹೈದರಾಬಾದ್: ಮಹಿಳೆಯರು ಎಲ್ಲ ಕ್ಷೇತ್ರದಲ್ಲೂ ಸಾಧನೆ ಮಾಡಿದ್ದಾರೆ. ಅದೆಂತಹ ತೊಂದರೆಗಳು ಎದುರಾದರೂ, ಅದೆಲ್ಲವನ್ನೂ ಮೆಟ್ಟಿ ನಿಂತು ಮುಂದೆ ಸಾಗುತ್ತಿದ್ದಾರೆ. ಹೀಗೊಂದು ಉದಾಹರಣೆಯಾಗಿ ಪಾರ್ಲೆ ಆಗ್ರೋದ ಸಿಇಒ ಸೌನಾ ಚೌಹಾಣ್ ಅವರಿದ್ದಾರೆ.
"ನಾವೇನು ಮಾಡುತ್ತಿದ್ದೇವೆ ಅಥವಾ ನಾವೇನು ಮಾಡಬೇಕು ಎಂಬ ಸ್ಪಷ್ಟತೆ ನಮಗಿರಬೇಕು. ಹೀಗಿರುವಾಗಿ ಗುರಿ ಎಷ್ಟೇ ಕಠಿಣವಾಗಿದ್ದರೂ ಅದನ್ನು ಛಲದಿಂದ ಸಾಧಿಸಬಹುದು. ನಾನು 22 ನೇ ವಯಸ್ಸಿನಲ್ಲಿ ಪಾರ್ಲೆ ಆಗ್ರೋ ಕಂಪನಿಗೆ ನಿರ್ದೇಶಕಳಾಗಿ ಸೇರಿಕೊಂಡೆ. ಬಳಿಕ 2006ರಲ್ಲಿ ಕಂಪನಿಯ ಸಿಇಒ ಆಗಿ ಜವಾಬ್ದಾರಿ ವಹಿಸಿಕೊಂಡೆ.
ಆಗ ನನಗಿದ್ದ ಸವಾಲುಗಳು ಅನೇಕ. ನನ್ನ ತಂದೆಯಿಂದ ಕಂಪನಿ ಅಧಿಕಾರ ವಹಿಸಿಕೊಳ್ಳುವ ಸಮಯಕ್ಕೆ 600 ಕೋಟಿ ವಹಿವಾಟು ಸಾಧಿಸಿತ್ತು. ಮುಂದೆಯೂ ಇದಕ್ಕಿಂತ ಚೆನ್ನಾಗಿ ನಡೆಸಿಕೊಂಡು ಹೋಗಬೇಕು ಎಂಬ ಜವಾಬ್ದಾರಿ ನನ್ನಲ್ಲಿತ್ತು. ಎಲ್ಲವೂ ಬದಲಾಗುತ್ತಿರಬಹುದು. ಆದರೆ, ಹಿರಿಯರು ಹಾಕಿಕೊಟ್ಟ ತತ್ತ್ವ ಅಥವಾ ಮಾರ್ಗದರ್ಶನ ಏನಿದೆಯೂ ಅದನ್ನು ಮರೆಯಬಾರದು. ಆ ದಿಕ್ಕಿನೆಡೆಗೆ ನನ್ನ ಹೆಜ್ಜೆಯನ್ನಿಟ್ಟೆ."
"ಈಗಾಗಲೇ ಮಾರುಕಟ್ಟೆಯಲ್ಲಿ ಅನೇಕ ತಂಪು ಪಾನೀಯಗಳು ಸ್ಪರ್ಧೆಯನ್ನು ನೀಡುತ್ತಿವೆ. ಇವೆಲ್ಲವನ್ನೂ ತಡೆದುಕೊಳ್ಳುವುದು ಅಷ್ಟು ಸುಲಭದ ಕೆಲಸವಲ್ಲ. ಆದರೆ, ಇಂತಹ ವಿಷಯಗಳಲ್ಲಿ ನಾನೆಂದಿಗೂ ರಾಜಿ ಮಾಡಿಕೊಳ್ಳುವುದಿಲ್ಲ. ಯಾವುದೇ ಉತ್ಪನ್ನವಾಗಲಿ, ಅದು ಗ್ರಾಹಕರಿಗೆ ತೃಪ್ತಿಯಾಗಬೇಕು ಎಂಬುದು ನನ್ನ ನಂಬಿಕೆ.
ಇದಕ್ಕೆ ಉದಾಹರಣೆಯೇ ಓಪಿ, ಫ್ರೂಟಿ, ಫಿಜ್, ಬೈಲಿ, ಫ್ರಿಯೊ, ಡಿಶ್ಯೂಮ್ ಇತ್ಯಾದಿ. ಇತ್ತೀಚೆಗೆ ನಮ್ಮ ವಹಿವಾಟು ಹತ್ತು ಸಾವಿರ ಕೋಟಿ ಸಮೀಪಿಸುತ್ತಿದೆ. ವ್ಯಾಪಾರ ಕ್ಷೇತ್ರದಲ್ಲಿ ಮಿಂಚುವುದು ಅಷ್ಟು ಸುಲಭವಲ್ಲ. ಅದರಲ್ಲೂ ಮಹಿಳೆಯರಿಗಂತೂ ಸ್ವಲ್ಪ ಕಷ್ಟವೇ. ಆದರೂ ಮಹಿಳೆಯರು ಯಾವುದರಲ್ಲೂ ಕಡಿಮೆಯಲ್ಲ. ಹಾಗೆ ಅಂದುಕೊಳ್ಳಲೂಬಾರದು. ನಾನು ಎಂದಿಗೂ ಈ ರೀತಿಯಾಗಿ ಅಂದುಕೊಂಡಿಲ್ಲ. ಯಾವತ್ತೂ ಅಭದ್ರತೆಯೊಂದಿಗೆ ಜೀವನದಲ್ಲಿ ಹೆಜ್ಜೆ ಇಟ್ಟಿಲ್ಲ." ಎಂದು ಪಾರ್ಲೆ ಆಗ್ರೋದ ಸಿಇಒ ಸೌನಾ ಚೌಹಾಣ್ ಹೇಳಿದ್ದಾರೆ.
ಇದನ್ನೂ ಓದಿ: ಸಾಮೂಹಿಕ ಉದ್ಯೋಗ ಕಡಿತ: ವೆಫಾಕ್ಸ್‌ನ ಸಿಇಒ ಜೂಲಿಯನ್ ಟೈಕ್ ಟೀಕೆ
