ನವದೆಹಲಿ : ಕಾಲ್ ಸೆಂಟರ್, ಡೆಲಿವರಿ ಎಕ್ಸೆಕ್ಯುಟಿವ್ಗಳು ಮತ್ತು ನುರಿತ ಕುಕ್ಗಳನ್ನು ನೇಮಕ ಮಾಡಿಕೊಳ್ಳುವ ವಿಷಯದಲ್ಲಿ ಮುಂಬೈ, ಚೆನ್ನೈ ಮತ್ತು ಬೆಂಗಳೂರು 2020ರಿಂದ ಮುಂಚೂಣಿಯಲ್ಲಿವೆ ಎಂದು ಅಧ್ಯಯನ ವರದಿ ಹೇಳಿದೆ. ಮೇ 2020 ರಿಂದ ಮೇ 2023 ರವರೆಗಿನ ಮಾಹಿತಿಯ ಪ್ರಕಾರ, ಈ ಮೂರು ಮೆಟ್ರೋ ನಗರಗಳು ಆನ್‌ಲೈನ್ ಇ-ಕಾಮರ್ಸ್ ಮತ್ತು ಫುಡ್ ಡೆಲಿವರಿ ವಿಭಾಗದಲ್ಲಿನ ಬ್ಲೂ ಕಾಲರ್ ಉದ್ಯೋಗಿಗಳನ್ನು ನೇಮಕ ಮಾಡಿಕೊಳ್ಳುವ ಮೂರು ಅಗ್ರ ನಗರಗಳಾಗಿ ಹೊರಹೊಮ್ಮಿವೆ ಎಂದು ಜಾಬ್ ಪೋರ್ಟಲ್ ಇಂಡೀಡ್ ಇಂಡಿಯಾ ಹೇಳಿದೆ.
ಪ್ಲಾಟ್‌ಫಾರ್ಮ್ ಪ್ರಕಾರ, ಕಾಲ್ ಸೆಂಟರ್ ಪ್ರತಿನಿಧಿಯ ಸರಾಸರಿ ವೇತನ ಬೆಂಗಳೂರಿನಲ್ಲಿ ವರ್ಷಕ್ಕೆ 2,52,483 ರೂ. ಆಗಿದೆ. ಚೆನ್ನೈನಲ್ಲಿನ ಡೆಲಿವರಿ ಎಕ್ಸಿಕ್ಯೂಟಿವ್ ವರ್ಷಕ್ಕೆ ಸರಾಸರಿ ಮೂಲ ವೇತನ ರೂ 2,02,586 ಗಳಿಸುತ್ತಾನೆ. ವಿಕಸನಗೊಳ್ಳುತ್ತಿರುವ ಆರ್ಥಿಕ ಪರಿಸ್ಥಿತಿಗಳಿಂದಾಗಿ ಕೆಲ ಕೈಗಾರಿಕೆಗಳು ಇತರರಿಗಿಂತ ಹೆಚ್ಚಿನ ಲಾಭ ಪಡೆದಿವೆ ಮತ್ತು ಬ್ಲೂ ಕಾಲರ್ ಉದ್ಯೋಗಿಗಳಿಗೆ ಆಕರ್ಷಕ ಉದ್ಯೋಗಾವಕಾಶಗಳನ್ನು ಒದಗಿಸುತ್ತಿವೆ.
ಕಾಲ್ ಸೆಂಟರ್ ಉದ್ಯೋಗಗಳಲ್ಲಿ ಮುಂಬೈ ಅಗ್ರಸ್ಥಾನದಲ್ಲಿದೆ (ಶೇ 12). ಬೆಂಗಳೂರು (ಶೇ 11.86) ಮತ್ತು ಚೆನ್ನೈ (ಶೇ 8) ನಂತರದ ಸ್ಥಾನದಲ್ಲಿವೆ. ಇದರ ಜೊತೆಗೆ ಕುಕ್ಗಳ ನೇಮಕಾತಿಯಲ್ಲೂ ಮುಂಬೈ (ಶೇ 13) ಮುಂಚೂಣಿಯಲ್ಲಿದೆ. ಕುಕ್ಗಳ ನೇಮಕಾತಿಯಲ್ಲಿ ಬೆಂಗಳೂರು (ಶೇ. 7.47) ಮತ್ತು ಚೆನ್ನೈ (ಶೇ. 7) ನಂತರದ ಸ್ಥಾನದಲ್ಲಿವೆ. ಹಾಗೆಯೇ ಡೆಲಿವರಿ ಎಕ್ಸೆಕ್ಯೂಟಿವ್ ನೇಮಕಾತಿ ವಿಚಾರದಲ್ಲಿ ಚೆನ್ನೈ (ಶೇ 12) ಮುಂದಿದೆ. ಬೆಂಗಳೂರು (ಶೇ 8) ಮತ್ತು ಮುಂಬೈ (ಶೇ 5) ನಂತರದ ಸ್ಥಾನದಲ್ಲಿವೆ.
"ಉದ್ಯೋಗಗಳ ಸೃಷ್ಟಿಯಲ್ಲಿ ಇ-ಕಾಮರ್ಸ್ ಮತ್ತು ಕ್ವಿಕ್ ಕಾಮರ್ಸ್ನ ಬೆಳವಣಿಗೆಯು ನಿಜವಾಗಿಯೂ ಗಮನಾರ್ಹವಾಗಿದೆ. ಆಹಾರ ವಿತರಣಾ ಉದ್ಯಮವು ಅನೇಕ ರೆಸ್ಟೋರೆಂಟ್‌ಗಳು ಮತ್ತು ಕ್ಲೌಡ್ ಕಿಚನ್‌ಗಳನ್ನು ಹುಟ್ಟುಹಾಕಿದೆ. ನುರಿತ ಅಡುಗೆಯವರು ಮತ್ತು ಬಾಣಸಿಗರಿಗೆ ಹೆಚ್ಚಿನ ಬೇಡಿಕೆಯನ್ನು ಸೃಷ್ಟಿಸಿದೆ" ಎಂದು ಇಂಡೀಡ್ನಲ್ಲಿ ವೃತ್ತಿ ತಜ್ಞರಾಗಿರುವ ಸೌಮಿತ್ರ ಚಂದ್ ಹೇಳಿದರು. "ಆನ್‌ಲೈನ್ ಆರ್ಡರ್‌ಗಳಿಗೆ ಸಂಬಂಧಿಸಿದಂತೆ ಗ್ರಾಹಕರ ಪ್ರಶ್ನೆಗಳನ್ನು ನಿರ್ವಹಿಸಲು ಕಂಪನಿಗಳಿಗೆ ದೊಡ್ಡ ಪ್ರಮಾಣದ ಕಸ್ಟಮರ್ ಸಪೋರ್ಟ್ ತಂಡಗಳ ಅಗತ್ಯವಿರುವುದರಿಂದ ಕಾಲ್ ಸೆಂಟರ್ ಎಕ್ಸೆಕ್ಯೂಟಿವ್ ಉದ್ಯೋಗಗಳಲ್ಲಿ ಹೆಚ್ಚಳವಾಗುತ್ತಿದೆ" ಎಂದು ಅವರು ತಿಳಿಸಿದರು.
ಬ್ಲೂ ಕಾಲರ್ ಜಾಬ್ ಎಂಬುದು ದೈಹಿಕ ಶ್ರಮ ಅಥವಾ ಕೌಶಲ್ಯದ ಕೆಲಸವನ್ನು ಒಳಗೊಂಡಿರುವ ಉದ್ಯೋಗಗಳನ್ನು ಉಲ್ಲೇಖಿಸುವ ಒಂದು ಹಳೆಯ ಸ್ಟೀರಿಯೊಟೈಪ್ ಆಗಿದೆ. ವೈಟ್ ಕಾಲರ್ ಉದ್ಯೋಗಿಗಳು ಸಾಮಾನ್ಯವಾಗಿ ಕಚೇರಿ ವ್ಯವಸ್ಥೆಯಲ್ಲಿ ಕೆಲಸ ಮಾಡಿದರೆ, ಬ್ಲೂ ಕಾಲರ್ ಉದ್ಯೋಗಿಗಳು ನಿರ್ಮಾಣ, ಉತ್ಪಾದನೆ, ಗಣಿಗಾರಿಕೆ, ನಿರ್ವಹಣೆ ಅಥವಾ ಇತರ ದೈಹಿಕ ಶ್ರಮ ಬೇಕಾಗುವ ಪಾತ್ರಗಳಲ್ಲಿ ಕೆಲಸ ಮಾಡುತ್ತಾರೆ. ಬ್ಲೂ ಕಾಲರ್ ಜಾಬ್ಗಳಿಗೆ ಕಾಲೇಜು ಪದವಿ ಅಗತ್ಯವಿಲ್ಲದಿರಬಹುದು, ಆದರೆ ವಿಶೇಷ ಕೌಶಲ್ಯಗಳು ಅಥವಾ ಪರಿಣತಿ ಅಗತ್ಯವಿರುತ್ತದೆ.
ಇದನ್ನೂ ಓದಿ : ಜರ್ಮನ್ ಮಾಧ್ಯಮ ಸಂಸ್ಥೆ ಆಕ್ಸೆಲ್ ಸ್ಪ್ರಿಂಗರ್ನಲ್ಲಿ ಶೇ 20ರಷ್ಟು ಉದ್ಯೋಗ ಕಡಿತ: ಮಾನವರ ಬದಲು AI ನಿಂದ ಕೆಲಸ!
