ನವದೆಹಲಿ: ಭಾರತದಲ್ಲಿ ವಾಯುಯಾನವನ್ನು ಹೆಚ್ಚು ಪ್ರಚುರಗೊಳಿಸಲು, ಹಾಗೂ ಅಗ್ಗದ ದರದಲ್ಲಿ ಪ್ರಯಾಣಿಕರಿಗೆ ವಿಮಾನಯಾನ ಒದಗಿಸುತ್ತಿರುವ ಇಂಡಿಗೋ ಸಂಸ್ಥೆ, 500 ಏರ್ಬಸ್ ವಿಮಾನಗಳ ಖರೀದಿಗೆ ಆರ್ಡರ್ ಕೊಟ್ಟಿದೆ. ಈ ಬಗ್ಗೆ ಮಾತನಾಡಿರುವ ಕಂಪನಿ ಸಿಇಒ ಪೀಟರ್ ಎಲ್ಬರ್ಸ್ ಇದೊಂದು ಐತಿಹಾಸಿಕ ಕ್ಷಣ ಎಂದು ಹೇಳಿದ್ದಾರೆ.
ಏರ್‌ಬಸ್‌ನೊಂದಿಗಿನ ಒಪ್ಪಂದಕ್ಕೆ ಸಹಿ ಹಾಕಿದ ನಂತರ, ಇಂಡಿಗೋ ಸಿಇಒ ಪೀಟರ್ ಎಲ್ಬರ್ಸ್ ಅವರು ಪ್ಯಾರಿಸ್‌ನಲ್ಲಿ ಮಾತನಾಡಿದರು. "ನಾವು ಈ ಘೋಷಣೆಯಿಂದ ನಿಜವಾಗಿಯೂ ಸಂತಸಗೊಂಡಿದ್ದೇವೆ. ಇದು ಇಂಡಿಗೋದ ಅತಿದೊಡ್ಡ ಡೀಲ್ ಆಗಿದೆ. ಅಷ್ಟೇ ಅಲ್ಲ, ಏರ್ಬಸ್ನೊಂದಿಗೆ ಒಂದೇ ರೀತಿಯ ವಿಮಾನಗಳಿಗಾಗಿ ಇದುವರೆಗೆ ಮಾಡಿಕೊಳ್ಳಲಾದ ಅತಿ ದೊಡ್ಡ ಖರೀದಿ ಒಪ್ಪಂದ ಇದಾಗಿದೆ. ಅಷ್ಟೇ ಅಲ್ಲ ಭಾರತೀಯ ವಾಯುಯಾನದಲ್ಲಿ ಐತಿಹಾಸಿಕ ಕ್ಷಣವಾಗಿದೆ‘‘ ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ.
ಜೂನ್ 19 ರಂದು ಪ್ಯಾರಿಸ್ ಏರ್ ಶೋ 2023ರಲ್ಲಿ ಈ ಡೀಲ್ ಅಂತಿಮಗೊಳಿಸಲಾಗಿದೆ. ಇಂಡಿಗೋ ಮಂಡಳಿಯ ಅಧ್ಯಕ್ಷ ವಿ ಸುಮಂತ್ರನ್, ಇಂಡಿಗೋದ ಸಿಇಒ ಪೀಟರ್ ಎಲ್ಬರ್ಸ್, ಏರ್ಬಸ್ ಸಿಇಒ ಗಿಲ್ಲೌಮ್ ಫೌರಿ ಮತ್ತು ಏರ್‌ಬಸ್‌ನ ಮುಖ್ಯ ವಾಣಿಜ್ಯ ಅಧಿಕಾರಿ ಮತ್ತು ಅಂತಾರಾಷ್ಟ್ರೀಯ ಮುಖ್ಯಸ್ಥ ಕ್ರಿಶ್ಚಿಯನ್ ಸ್ಕೆರೆರ್ ಉಪಸ್ಥಿತಿಯಲ್ಲಿ ಖರೀದಿ ಒಪ್ಪಂದಕ್ಕೆ ಸಹಿ ಹಾಕಲಾಯಿತು.
"ಈ ಒಪ್ಪಂದ ಭಾರತದ ಬೆಳವಣಿಗೆಯ ಬಗ್ಗೆ ಮಾತನಾಡುವಂತೆ ಮಾಡಿದೆ. ಇದು ಭಾರತದ ಭವಿಷ್ಯದ ಬಗ್ಗೆ ಮಾತನಾಡುತ್ತದೆ ಮತ್ತು ಇದು ಇಂಡಿಗೋ ಭವಿಷ್ಯದ ಬಗ್ಗೆಯೂ ಹೇಳುತ್ತದೆ. ಆದ್ದರಿಂದ 500 ವಿಮಾನಗಳ ಖರೀದಿಯ ಈ ಆದೇಶವು ಒಟ್ಟು ವಿಮಾನಗಳ ಸಂಖ್ಯೆಯನ್ನು ದ್ವಿಗುಣಗೊಳಿಸುವಂತೆ ಮಾಡಿದೆ. ಈಗ ನಮ್ಮ ಬಳಿ 482 ವಿಮಾನಗಳಿವೆ‘‘ ಎಂದು 500 ವಿಮಾನಗಳ ಖರೀದಿ ಬಳಿಕ ಇಂಡಿಗೋ ಸಿಇಒ ಹೇಳಿದ್ದಾರೆ.
ಪ್ರಸ್ತುತ ದೇಶದಲ್ಲಿ ಇಂಡಿಗೋದ 300 ಕ್ಕೂ ಹೆಚ್ಚು ವಿಮಾನಗಳನ್ನು ಕಾರ್ಯನಿರ್ವಹಿಸುತ್ತಿವೆ. ಈ ದಶಕದ ಅಂತ್ಯದ ವೇಳೆಗೆ ಒಟ್ಟು 480 ವಿಮಾನಗಳನ್ನು ನಮಗೆ ಹಸ್ತಾಂತರವಾಗಬೇಕಿದೆ ಎಂದು ಎಲ್ಬರ್ಸ್ ವಿವರಿಸಿದ್ದಾರೆ.
"ಅಂದರೆ ನಮಗೆ ಹಸ್ತಾಂತರ ಆಗಬೇಕಿರುವ ವಿಮಾನಗಳೂ ಸೇರಿದಂತೆ ಸಾವಿರ ವಿಮಾನಗಳು ದೇಶವನ್ನು ಮುನ್ನಡೆಸಲು ಸಹಾಯ ಮಾಡುತ್ತದೆ. ಇಂಡಿಗೋ ಸಂಸ್ಥೆ ಸಹ ಮುಂದೆ ಸಾಗಲು ಈ ನಿರ್ಣಯ ಸಹಾಯ ಮಾಡುತ್ತದೆ. ನಾವು ನಮ್ಮ ಭರವಸೆಯನ್ನು ಪೂರೈಸುತ್ತೇವೆ ಮತ್ತು ದೇಶೀಯ ಮತ್ತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ನಮ್ಮ ಅಪ್ರತಿಮ ನೆಟ್‌ವರ್ಕ್ ಅನ್ನು ನಿರ್ಮಿಸುವುದನ್ನು ಮುಂದುವರಿಸಲು ಈ ಒಪ್ಪಂದ ನಮ್ಮ ಸಹಾಯಕ್ಕೆ ಬರಲಿದೆ ಎಂದು ಇಂಡಿಗೋ ಸಿಇಒ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಕಂಪನಿಯು ವೈಡ್ ಬಾಡಿ ಏರ್‌ಕ್ರಾಫ್ಟ್‌ಗಳನ್ನು ಆರ್ಡರ್ ಮಾಡಲು ಬಯಸುತ್ತಿದೆಯಾ ಎಂಬ ಪತ್ರಕರ್ತರ ಪ್ರಶ್ನೆ ಉತ್ತರಿಸಿದ ಎಲ್ಬರ್ಸ್ "ಐತಿಹಾಸಿಕ ಕ್ಷಣ ಮತ್ತು ಉತ್ಸಾಹವನ್ನು ಆನಂದಿಸಲು ನಮಗೆ ಅವಕಾಶ ನೀಡಿ, ವೈಡ್-ಬಾಡಿಸ್ ವಿಮಾನಗಳ ಬಗ್ಗೆ ನಾಳೆ ನನ್ನನ್ನು ಕೇಳಿ" ಎಂದು ಹಾಸ್ಯ ಚಟಾಕಿಯನ್ನೂ ಹಾರಿಸಿದರು.
ಇತ್ತೀಚೆಗಷ್ಟೆ ಏರ್ ಇಂಡಿಯಾ ಸಹ ಹೊಸ ವಿಮಾನಗಳ ಖರೀದಿಗೆ ಅಮೆರಿಕದ ಕಂಪನಿ ಜತೆ ಒಪ್ಪಂದ ಮಾಡಿಕೊಂಡಿತ್ತು ಈ ಮೂಲಕ ಭಾರತದಲ್ಲಿ ದೇಶಿಯ ವಿಮಾನ ಹಾರಾಟಕ್ಕೆ ಸಾಕಷ್ಟು ಅವಕಾಶಗಳು ತೆರೆದುಕೊಂಡಂತಾಗಿದೆ.
ಇದನ್ನು ಓದಿ: 500 ಏರ್ಬಸ್ ವಿಮಾನ ಖರೀದಿಗೆ ಮುಂದಾದ ಇಂಡಿಗೋ; ವಿಮಾನಯಾನ ಕ್ಷೇತ್ರದಲ್ಲಿ ಅತಿ ದೊಡ್ಡ ಡೀಲ್!
