ನ್ಯೂಯಾರ್ಕ್: ಫೋರ್ಬ್ಸ್ ನಿಯತಕಾಲಿಕೆ ಬಿಡುಗಡೆ ಮಾಡಿರುವ ವಿಶ್ವದ ಮಹಿಳಾ ಧನಿಕರ ಪಟ್ಟಿಯಲ್ಲಿ ಭಾರತೀಯ ಸಂಜಾತ ಅಮೆರಿಕನ್ನರಾದ ನಾಲ್ವರು ನಾರಿಯರು ಸ್ಥಾನ ಪಡೆದಿದ್ದಾರೆ. ಅಮೆರಿಕದ 100 ಅತ್ಯಂತ ಯಶಸ್ವಿ ಉದ್ಯಮಿಗಳು, ಸಿಇಒ ಮತ್ತು ಎಂಟರ್ಟೈನ್ಮೆಂಟ್ ಮಹಿಳೆಯರಲ್ಲಿ ಜಯಶ್ರೀ ಉಲ್ಲಾಲ್, ನೀರ್ಜಾ ಸೇಥಿ, ನೇಹಾ ನಾರ್ಖೆಡೆ ಮತ್ತು ಇಂದಿರಾ ನೂಯಿ ಅವರಿದ್ದಾರೆ.
ಕಂಪ್ಯೂಟರ್ ನೆಟ್‌ವರ್ಕಿಂಗ್ ಕಂಪನಿ ಅರಿಸ್ಟಾ ನೆಟ್‌ವರ್ಕ್‌ನ ಸಿಇಒ ಜಯಶ್ರೀ ಉಲ್ಲಾಲ್(62) ದಾಖಲೆಯ 4.4 ಬಿಲಿಯನ್ ಡಾಲರ್ ಆಸ್ತಿಯೊಂದಿಗೆ ಭಾರತೀಯ-ಅಮೆರಿಕನ್ನರ ಪಟ್ಟಿಯಲ್ಲಿ 15 ನೇ ಸ್ಥಾನ ಪಡೆದಿದ್ದಾರೆ. 2022 ರಲ್ಲಿ ಅವರ ಆಸ್ತಿ ಶೇಕಡಾ 12 ರಷ್ಟು ವೃದ್ಧಿಯಾಗಿತ್ತು. 2008 ರಲ್ಲಿ ಅವರು ಕಂಪನಿಯ ಸಿಇಒ ಆದ ನಂತರ ಕಂಪನಿಯು ಸತತ ಲಾಭ ಗಳಿಸುತ್ತಿದೆ. ಘಟಕಗಳ ಕೊರತೆ ಮತ್ತು ಪೂರೈಕೆ ಸವಾಲುಗಳ ಹೊರತಾಗಿಯೂ ಕಳೆದ ವರ್ಷಕ್ಕಿಂತ 48 ಪ್ರತಿಶತದಷ್ಟು ಆಸ್ತಿ ಹೆಚ್ಚಿದೆ ಎಂದು ಫೋರ್ಬ್ಸ್ ಹೇಳಿದೆ.
ಇನ್ನು ಇದೇ ಪಟ್ಟಿಯಲ್ಲಿರುವ ನೀರ್ಜಾ ಸೇಥಿ (68) ಅವರು 990 ಮಿಲಿಯನ್ ಆಸ್ತಿಯೊಂದಿಗೆ 25 ನೇ ಸ್ಥಾನದಲ್ಲಿದ್ದಾರೆ. 1980 ರಲ್ಲಿ ಪತಿ ಭರತ್ ದೇಸಾಯಿ ಅವರೊಂದಿಗೆ ಆರಂಭಿಸಿರುವ ಐಟಿ ಸಲಹಾ ಮತ್ತು ಹೊರಗುತ್ತಿಗೆ ಸಂಸ್ಥೆಯಾದ ಸಿಂಟೆಲ್ನ ಸಹ ಸಂಸ್ಥಾಪಕರಾಗಿದ್ದಾರೆ. 2018 ರಲ್ಲಿ ಅವರು ಅದನ್ನು ಫ್ರೆಂಚ್ ಐಟಿ ಸಂಸ್ಥೆ ಅಟೋಸ್ ಎಸ್‌ಇಗೆ 3.4 ಬಿಲಿಯನ್‌ಗೆ ಮಾರಾಟ ಮಾಡಿದ್ದಾರೆ.
ಸಾಫ್ಟ್‌ವೇರ್ ಇಂಜಿನಿಯರ್ ಆಗಿರುವ ಉದ್ಯಮಿ ನೇಹಾ ನಾರ್ಖೆಡೆ(38) ಅವರು ಇದೇ ಮಾರ್ಚ್‌ನಲ್ಲಿ 'ಆಸಿಲರ್' ಎಂಬ ಹೊಸ ವಂಚನೆ ಜಾಲ ಪತ್ತೆ ಸಂಸ್ಥೆಯನ್ನು ಅವರು ಘೋಷಿಸಿದ್ದರು, 2021 ರಿಂದ ಅವರು ತಮ್ಮ ಪತಿಯೊಂದಿಗೆ ಬ್ಯುಸಿನೆಸ್ ವುಮೆಟ್ ಆಗಿ ಗುರುತಿಸಿಕೊಂಡಿದ್ದಾರೆ. ಸದ್ಯ ಅವರು 520 ಮಿಲಿಯನ್ ಡಾಲರ್ ಆಸ್ತಿಯೊಂದಿಗೆ ಫೋರ್ಬ್ಸ್ ಪಟ್ಟಿಯಲ್ಲಿ 50 ನೇ ಸ್ಥಾನ ಪಡೆದಿದ್ದಾರೆ.
ಇನ್ನು ಅಮೆರಿಕದ 50 ದೈತ್ಯ ಕಂಪನಿಗಳಲ್ಲಿ ಒಂದಾದ ಪೆಪ್ಸಿಕೋ ನಿರ್ಗಮಿತ ಮುಖ್ಯಸ್ಥರಾಗಿರುವ ಇಂದಿರಾ ನೂಯಿ ಅವರು 350 ಮಿಲಿಯನ್ ಆಸ್ತಿಯೊಂದಿಗೆ 77 ನೇ ಸ್ಥಾನ ಗಳಿಸಿದ್ದಾರೆ. ಅವರು ಸಂಸ್ಥೆಯ ಮೊದಲ ಕಪ್ಪು ಮತ್ತು ವಲಸಿಗ ಮಹಿಳೆಯಾಗಿದ್ದಾರೆ. ಸದ್ಯ ಅವರು ಅಮೆಜಾನ್ ಮತ್ತು ಹೆಲ್ತ್ ಟೆಕ್ ಸಂಸ್ಥೆಯ ಫಿಲಿಪ್ಸ್‌ನ ನಿರ್ದೇಶಕರಾಗಿದ್ದಾರೆ.
ಈ ಪಟ್ಟಿಯಲ್ಲಿ ಎಬಿಸಿ ಸಪ್ಲೈನ 76 ವರ್ಷದ ಡಯೇನ್ ಹೆಂಡ್ರಿಕ್ಸ್ ಅವರು 15 ಬಿಲಿಯನ್ ಆಸ್ತಿಯೊಂದಿಗೆ ಅಗ್ರಸ್ಥಾನದಲ್ಲಿದ್ದಾರೆ. "ಈ ಪಟ್ಟಿಯು ಮಹಿಳೆಯರ ಕಠಿಣ ಪರಿಶ್ರಮ ಮತ್ತು ಯಶಸ್ಸಿಗೆ ಸಾಕ್ಷಿಯಾಗಿದೆ" ಎಂದು ಫೋರ್ಬ್ಸ್ ನಿಯತಕಾಲಿಕೆಯ ಸಹಾಯಕ ವ್ಯವಸ್ಥಾಪಕ ಸಂಪಾದಕರಾದ ಕೆರ್ರಿ ಎ. ಡೋಲನ್ ಅಭಿಪ್ರಾಯಪಟ್ಟಿದ್ದಾರೆ.
ಇದನ್ನೂ ಓದಿ: ಮಳೆ ಕೊರತೆ.. ಕಡಿಮೆ ಬಿತ್ತನೆಯಿಂದ ಅಕ್ಕಿ ಬೆಲೆಯೂ ಆಗಲಿದೆ ದುಬಾರಿ
