ಮುಂಬೈ : ಐಟಿ ಷೇರು ಮೌಲ್ಯಗಳ ತೀವ್ರ ಏರಿಕೆಯಿಂದಾಗಿ ಶುಕ್ರವಾರ ಮೊದಲ ಬಾರಿಗೆ ಸೆನ್ಸೆಕ್ಸ್ 66,000 ಅಂಕಗಳ ಗಡಿ ದಾಟಿ ಮುಕ್ತಾಯವಾಗಿದೆ. ಬಿಎಸ್ಇ ಸೆನ್ಸೆಕ್ಸ್ 502 ಪಾಯಿಂಟ್‌ಗಳ ಏರಿಕೆಯೊಂದಿಗೆ 66,060 ಕ್ಕೆ ಮುಕ್ತಾಯಗೊಂಡಾಗ ಬೃಹತ್ ಐಟಿ ಕಂಪನಿಗಳು ರ‍್ಯಾಲಿಯನ್ನು ಮುನ್ನಡೆಸಿದವು. ಐಟಿ ದಿಗ್ಗಜರ ಪೈಕಿ ಟಿಸಿಎಸ್ ಶೇ 5.1, ಟೆಕ್ ಮಹೀಂದ್ರಾ ಶೇ 4.4, ಇನ್ಫೋಸಿಸ್ ಶೇ 4.4ರಷ್ಟು ಏರಿಕೆ ಕಂಡಿವೆ. ಎಚ್‌ಸಿಎಲ್ ಟೆಕ್ ಶೇ 3.8ರಷ್ಟು ಮತ್ತು ವಿಪ್ರೋ ಶೇ 2.6 ರಷ್ಟು ಏರಿಕೆಯಾಗಿವೆ.
ಅಮೆರಿಕದಲ್ಲಿ ನಿಯಂತ್ರಿತ ಹಣದುಬ್ಬರವು ಹೂಡಿಕೆದಾರರಲ್ಲಿ ಆಶಾವಾದ ಹುಟ್ಟುಹಾಕಿದೆ. ಅಮೆರಿಕ ಆರ್ಥಿಕತೆಯನ್ನು ಸ್ಥಿರಗೊಳಿಸಲು 25 ಬಿಪಿಎಸ್ ದರ ಹೆಚ್ಚಳವು ಸಾಕಾಗುತ್ತದೆ. ಈ ಸುಧಾರಿತ ನಿರೀಕ್ಷೆಯು ಪ್ರಥಮ ತ್ರೈಮಾಸಿಕದ ಗಳಿಕೆಗಳನ್ನು ಸ್ಥಿರಗೊಳಿಸಿದ ಹೊರತಾಗಿಯೂ ಭಾರತೀಯ ಐಟಿ ಷೇರುಗಳ ಖರೀದಿಗೆ ಉತ್ತಮ ಕೊಡುಗೆ ನೀಡಿದೆ ಎಂದು ಜಿಯೋಜಿತ್ ಫೈನಾನ್ಶಿಯಲ್ ಸರ್ವಿಸಸ್‌ನ ಸಂಶೋಧನಾ ಮುಖ್ಯಸ್ಥ ವಿನೋದ್ ನಾಯರ್ ಹೇಳಿದರು. ಅಲ್ಲದೇ, ಎಫ್‌ಐಐಗಳ ಸಕಾರಾತ್ಮಕ ಒಳಗೊಳ್ಳುವಿಕೆಯೊಂದಿಗೆ ಸಗಟು ಬೆಲೆಗಳಲ್ಲಿ ಸತತ ಮೂರನೇ ತಿಂಗಳ ಇಳಿಕೆಯು ದೇಶೀಯ ಮಾರುಕಟ್ಟೆಯಲ್ಲಿನ ವಿಶಾಲ ಆಧಾರಿತ ರ‍್ಯಾಲಿಗೆ ಬೆಂಬಲ ನೀಡಿದೆ ಎಂದು ಅವರು ಹೇಳಿದರು.
ನಿಫ್ಟಿ ವಹಿವಾಟಿನ ಉದ್ದಕ್ಕೂ ಧನಾತ್ಮಕವಾಗಿ ವಹಿವಾಟು ನಡೆಸಿತು ಮತ್ತು ಕೊನೆಯ ಅರ್ಧ ಗಂಟೆಯಲ್ಲಿ 19,565 ಗೆ (151 ಪಾಯಿಂಟ್‌ ಏರಿಕೆ; +0.8 ಶೇಕಡಾ) ತಲುಪಿತು. ನಂತರ ಸೂಚ್ಯಂಕವು 19,595 ಇಂಟ್ರಾಡೇ ಯ ಮತ್ತೊಂದು ಹೊಸ ಗರಿಷ್ಠವನ್ನು ಮುಟ್ಟಿತು. ನಿಫ್ಟಿಯಲ್ಲಿ ಟಿಸಿಎಸ್, ಇನ್ಫೋಸಿಸ್, ಟೆಕ್ ಮಹೀಂದ್ರಾ, ಎಲ್‌ ಎಂಡ್‌ ಟಿ ಮತ್ತು ಎಚ್‌ಸಿಎಲ್ ಟೆಕ್ನಾಲಜೀಸ್ ಅತಿ ಹೆಚ್ಚು ಲಾಭ ಗಳಿಸಿದರೆ, ಎಚ್‌ಡಿಎಫ್‌ಸಿ ಲೈಫ್, ಎಂ & ಎಂ, ಪವರ್ ಗ್ರಿಡ್ ಕಾರ್ಪೊರೇಷನ್, ಟೈಟಾನ್ ಕಂಪನಿ ಮತ್ತು ಡಾ ರೆಡ್ಡೀಸ್ ಲ್ಯಾಬೊರೇಟರೀಸ್‌ಗಳು ಇಳಿಕೆಯಾದವು. ಒಟ್ಟು 2,206 ಷೇರುಗಳು ಏರಿಕೆಯಾದರೆ, 1,212 ಕುಸಿತ ಕಂಡವು ಮತ್ತು 149 ಬದಲಾಗದೇ ಉಳಿದಿವೆ.
ಏಷ್ಯಾದ ಮಾರುಕಟ್ಟೆಗಳ ಪೈಕಿ ನೋಡುವುದಾದರೆ ಸಿಯೋಲ್, ಶಾಂಘೈ ಮತ್ತು ಹಾಂಗ್ ಕಾಂಗ್ ಮಾರುಕಟ್ಟೆಗಳು ಏರಿಕೆಯಲ್ಲಿ ಕೊನೆಗೊಂಡರೆ, ಟೋಕಿಯೊ ಮಾರುಕಟ್ಟೆ ಕೆಳಮಟ್ಟದಲ್ಲಿಯೇ ಉಳಿಯಿತು. ಯುರೋಪ್‌ನಲ್ಲಿನ ಈಕ್ವಿಟಿ ಮಾರುಕಟ್ಟೆಗಳು ಲಾಭದೊಂದಿಗೆ ವಹಿವಾಟು ನಡೆಸುತ್ತಿವೆ. ಗುರುವಾರ ಅಮೆರಿಕದ ಮಾರುಕಟ್ಟೆಗಳು ಸಕಾರಾತ್ಮಕವಾಗಿ ಕೊನೆಗೊಂಡಿವೆ.
ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್‌ಐಐ) ಗುರುವಾರ ಪ್ರಮುಖ ಖರೀದಿದಾರರಾಗಿದ್ದರು. ಎಫ್ಐಐಗಳು ಒಂದು ದಿನದ ಬಿಡುವಿನ ನಂತರ 2,237.93 ಕೋಟಿ ರೂಪಾಯಿ ಮೌಲ್ಯದ ಷೇರುಗಳನ್ನು ಖರೀದಿಸಿದರು ಎಂದು ವಿನಿಮಯದ ಮಾಹಿತಿ ತಿಳಿಸಿದೆ. ಜಾಗತಿಕ ತೈಲ ಮಾನದಂಡ ಬ್ರೆಂಟ್ ಕಚ್ಚಾ ತೈಲ ಸೂಚ್ಯಂಕವು ಶೇಕಡಾ 0.09 ರಷ್ಟು ಕುಸಿದು ಬ್ಯಾರೆಲ್‌ಗೆ USD 81.29 ಕ್ಕೆ ತಲುಪಿದೆ.
ಇದನ್ನೂ ಓದಿ : BSE Sensex: ಮೊದಲ ಬಾರಿಗೆ 66,000 ಗಡಿ ಮೀರಿ ಹೊಸ ದಾಖಲೆ!
