ನವದೆಹಲಿ: ಕಳೆದ ಕೆಲ ತಿಂಗಳಿಂದ ದೇಶಿಯ ಚಿನಿವಾರ ಪೇಟೆಯಲ್ಲಿ ಚಿನ್ನ- ಬೆಳ್ಳಿ ಧಾರಣಿಯಲ್ಲಿ ಪೈಪೋಟಿ ಏರ್ಪಟ್ಟಂತೆ ಕಾಣುತ್ತಿದೆ. ಕಳೆದ ಗುರುವಾರ ಬಂಗಾರ ಬೆಲೆ ಸರ್ವಕಾಲಿಕ ಏರಿಕೆ ದಾಖಲಿಸಿ ವಾರ ಕಳೆಯುವುದರೊಳಗೆ ಬೆಳ್ಳಿಯ ಧಾರಣಿ ದಾಖಲೆಯ ಜಿಗಿತ ಕಂಡಿದೆ.
ಮಂಗಳವಾರ ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಪ್ರತಿ ಕೆ.ಜೆ. ಬೆಳ್ಳಿಯ ಮೇಲೆ ₹ 2,000 ಏರಿಕೆಯಾಗಿ ₹ 45,000 ಮಾರಾಟ ಆಗುತ್ತಿದೆ. ಪ್ರತಿ 10 ಗ್ರಾಂ. ಚಿನ್ನಾಭರಣ ದರದಲ್ಲಿ ₹100 ಇಳಿಕೆಯಾಗಿ ಒಟ್ಟು ₹ 38,370ರಲ್ಲಿ ವಹಿವಾಟು ನಡೆಸುತ್ತಿದೆ ಎಂದು ಆಲ್ ಇಂಡಿಯಾ ಸರಫ ಅಸೋಸಿಯೇಷನ್ ತಿಳಿಸಿದೆ.
ಸಾಗರೋತ್ತರ ಮಾರುಕಟ್ಟೆಗಳಲ್ಲಿ ಕಂಡುಬರುತ್ತಿರುವ ಖರೀದಿಯ ಪ್ರವೃತ್ತಿಯಿಂದ ಬೆಳ್ಳಿ ಬೆಲೆಯಲ್ಲಿ ಸಾರ್ವಕಾಲಿಕ ಗರಿಷ್ಠ ಏರಿಕೆ ದಾಖಲಿಸಿದೆ. ಕೈಗಾರಿಕಾ ಘಟಕಗಳು ಮತ್ತು ನಾಣ್ಯ ತಯಾರಕರು ದರ ಹೆಚ್ಚಿಸುವುದರ ಜೊತೆಗೆ ಜಾಗತಿಕ ಬೆಳವಣಿಗೆಗಳು ಬಿಳಿ ಲೋಹದ ಏರಿಕೆಗೆ ಕಾರಣವಾಗಿದೆ ಎಂದು ಆಲ್ ಇಂಡಿಯಾ ಸರಫ ಅಸೋಸಿಯೇಷನ್ನ ಉಪಾಧ್ಯಕ್ಷ ಸುರೇಂದ್ರ ಜೈನ್ ಹೇಳಿದರು.
