ನವದೆಹಲಿ: ಕಾಶ್ಮೀರಿ ಪದ್ಯ ಹಾಗೂ ತಮಿಳಿನ ಪದ್ಯದ ಸಾಲುಗಳು ಮತ್ತು ಸರಸ್ವತಿ - ಸಿಂದೂ ನಾಗರಿಕತೆಯ ಉಲ್ಲೇಖಗಳೊಂದಿಗೆ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ 2020-21 ರ ಬಜೆಟ್ ಅನ್ನು ಇಂದು ಪೂರ್ವಾಹ್ನ 11:20ರ ಸುಮಾರಿಗೆ ಓದಲು ಆರಂಭಿಸಿದವರು. ಬರೋಬ್ಬರಿ 160 ನಿಮಿಷಗಳ ಕಾಲ ನಿರರ್ಗಳವಾಗಿ ಓದಿ ಮುಗಿಸಿದರು. ಜ್ವರದ ಹಿನ್ನೆಲೆಯ ಇನ್ನೆರಡು ಪೇಜ್ಗಳು ಓದುವುದನ್ನ ಕೈಬಿಟ್ಟು ಬಜೆಟ್ ಮಂಡನೆ ಮುಗಿಸಿದರು.
ಶುಭ್ರ ಪ್ರಕಾಶಮಾನವಾದ ಹಳದಿ ಸೀರೆ ಧರಿಸಿದ್ದ ಸಚಿವೆ ಸೀತಾರಾಮನ್, 2020-21ರ ಕೇಂದ್ರ ಬಜೆಟ್ನ್ನು ಮಂಡಿಸಿದ್ದು, ಈ ಬಜೆಟ್ನಲ್ಲಿ ವೈಯಕ್ತಿಕ ಆದಾಯ ತೆರಿಗೆ ದರವನ್ನು ಕಡಿತಗೊಳಿಸಿದ್ದು, ಸೇರಿದಂತೆ ಅನೇಕ ಪ್ರಕಟಣೆಗಳನ್ನ ಮಾಡಿದರು. ಸಚಿವರ ಈ ಘೋಷಣೆಗಳಿಗೆ ಪ್ರಧಾನಿ ನರೇಂದ್ರ ಮೋದಿ ಸೇರಿದಂತೆ ಪಕ್ಷದ ಇನ್ನಿತರರು ಸಹ ಚಪ್ಪಾಳೆ ತಟ್ಟುವ ಮೂಲಕ ಅಭಿನಂದಿಸಿದರು.
ಮಹತ್ವಾಕಾಂಕ್ಷೆಯ ಭಾರತ, ಸರ್ವ ಸಮಾಜದ ಆರ್ಥಿಕ ಅಭಿವೃದ್ಧಿ ಈ ಬಜೆಟ್ನ ಪ್ರಮುಖ ವಿಷಯಗಳಾಗಿದ್ದು ವಿಶೇಷ. ಭವ್ಯ ಭಾರತ ಕಟ್ಟುವ ಘೋಷಣೆ ಮಾಡಿದ ಸೀತಾರಾಮನ್, ಸುಮಾರು 150 ನಿಮಿಷಗಳ ನಿರಂತರ ಬಜೆಟ್ ಮಂಡನೆ ನಂತರ ಕೊಂಚ ಆರೋಗ್ಯ ಸಮಸ್ಯೆಯಿಂದಾಗಿ ದಣಿದಿದ್ದರು. ಈ ವೇಳೆ ಕೇಂದ್ರ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಸೀತಾರಾಮನ್ಗೆ ಕ್ಯಾಂಡಿ(ಸಿಹಿ ತಿನಿಸು) ನೀಡಿದರು. ಇದಾದ ಬಳಿಕ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಹಾಗೂ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಸೇರಿದಂತೆ ಕೆಲ ಕಾಂಗ್ರೆಸ್ ನಾಯಕರು ಸಹ ಸೀತಾರಾಮನ್ ಬಳಿ ಬಂದು ಅವರ ಆರೋಗ್ಯ ವಿಚಾರಿಸಿದರು.
ಕೊಂಚವೇ ಉಳಿದ ಬಜೆಟ್ ಮಂಡನೆ ಮಾಡಲು ಸಾಧ್ಯವಾಗದ ಹಿನ್ನೆಲೆ, ಸೀತಾರಮನ್ ಸ್ಪೀಕರ್ ಬಳಿ ಕಾಲಾವಕಾಶ ಕೇಳಿದರು. ನಂತರ ಆಯವ್ಯದ ಪಟ್ಟಿಯನ್ನು ಸ್ಪೀಕರ್ಗೆ ಸಲ್ಲಿಸಿ ಸದನದಿಂದ ಹೊರ ನಡೆದರು.
ವಿತ್ತ ಸಚಿವೆ ಮಂಡಿಸಿದ ಈ ಬಜೆಟ್ ಮಂಡನೆಯನ್ನು ಕಣ್ತುಂಬಿಕೊಳ್ಳಲು ಅವರ ಕುಟುಂಬದ ಸದಸ್ಯರು ಸದನದ ಗ್ಯಾಲರಿಯಲ್ಲಿ ಹಾಜರಿದ್ದರು. ಇನ್ನು ಈ ಬಜೆಟ್ ಮಂಡನೆ ವೇಳೆ, ಕಾಂಗ್ರೆಸ್ ಅಧ್ಯೆಕ್ಷೆ ಸೋನಿಯಾ ಗಾಂಧಿ ಹಾಗೂ ಸಮಾಜವಾದಿ ಪಕ್ಷದ ಮುಲಾಯಂ ಸಿಂಗ್ರ ಗೈರು ಹಾಜರಿ ಎದ್ದು ಕಾಣುತ್ತಿತ್ತು.
