ಮುಂಬೈ: ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಮಂಗಳವಾರ ಪಂಜಾಬ್ ಮತ್ತು ಮಹಾರಾಷ್ಟ್ರ ಸಹಕಾರಿ ಬ್ಯಾಂಕ್ ಲಿಮಿಟೆಡ್ (ಪಿಎಂಸಿ) ಗ್ರಾಹಕರಿಗೆ ವಿಧಿಸಿದ ಎಟಿಎಂ ಹಣ ವಿತ್ ಡ್ರಾ ಮಿತಿಯನ್ನು ಸಡಿಲಗೊಳಿಸಿದೆ.
ಸೆಪ್ಟೆಂಬರ್ 23ರಂದು ಕಾರ್ಯಚರಣೆ ನಿರ್ಬಂಧದ ಆದೇಶ ಹೊರಡಿಸಿದ್ದ ಆರ್ಬಿಐ, ಗ್ರಾಹಕರಿಗೆ ದಿನಕ್ಕೆ ವಿತ್ ಡ್ರಾ ಮೊತ್ತವನ್ನು ₹ 1,000ಕ್ಕೆ ನಿಗದಿ ಪಡಿಸಿತ್ತು. ಬ್ಯಾಂಕ್ ಗ್ರಾಹಕರು ಈ ಬಗ್ಗೆ ಆಕ್ಷೇಪ ಹಾಗೂ ವಿರೋಧ ವ್ಯಕ್ತಪಡಿಸಿದರು. ಇದರಿಂದ ಎಚ್ಚೆತುಕೊಂಡ ಆರ್ಬಿಐ, ವಿತ್ ಡ್ರಾ ಮಿತಿಯನ್ನು ₹ 1,000ದಿಂದ ₹ 10,000ಕ್ಕೆ ಏರಿಕೆ ಮಾಡಿದೆ.
ಠೇವಣಿದಾರರಿಗೆ ಆಗುತ್ತಿರುವ ಹಣಕಾಸಿನ ಅಡಚಣೆಯನ್ನು ತಗ್ಗಿಸುವ ಉದ್ದೇಶದಿಂದ ವಿತ್ ಡ್ರಾ ಮಿತಿಯನ್ನು ಏರಿಕೆ ಮಾಡುತ್ತಿದ್ದೇವೆ. ಶೇ 60ರಷ್ಟು ಠೇವಣಿದಾರರು ತಮ್ಮ ಬಾಕಿ ಹಣ ಪಡೆಯಲು ಅನುಕೂಲವಾಗಲಿದೆ. ಆರ್ಬಿಐ ತನ್ನ ಸ್ಥಾನವನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದು, ಠೇವಣಿದಾರರ ಹಿತಾಸಕ್ತಿಗಳನ್ನು ಕಾಪಾಡಲು ಅಗತ್ಯವಾದ ಕ್ರಮಗಳನ್ನು ಮುಂದುವರಿಸಲಿದೆ. ಪಿಎಂಸಿಯ ವಿತ್ ಡ್ರಾ ಮಿತಿ ₹ 10,000 ನಿಗದಿಯ ಹೊರತಪಡಿಸಿ ಉಳಿದ ಷರತ್ತುಗಳು ಯಥಾವತ್ತಾಗಿ ಇರಲಿವೆ ಎಂದು ಆರ್ಬಿಐ ತಿಳಿಸಿದೆ.
