ಹೈದರಾಬಾದ್: ತೆರಿಗೆ ವ್ಯಾಪ್ತಿಯನ್ನು ವಿಸ್ತರಿಸುವ ಉದ್ದೇಶದಿಂದ ಆದಾಯ ತೆರಿಗೆ ಇಲಾಖೆ ಕಣ್ಗಾವಲು ಇಡಬಹುದಾದ ಹಣಕಾಸು ವ್ಯವಹಾರಗಳಲ್ಲಿ ಆಭರಣ ಖರೀದಿ, ವಿದ್ಯುತ್ ಬಳಕೆ, ಬ್ಯುಸಿನೆಸ್ ಕ್ಲಾಸ್/ ವಿದೇಶಿ ಪ್ರಯಾಣ ಅಥವಾ ಹೆಚ್ಚಿನ ಮೌಲ್ಯದ ಖರ್ಚು ದಾಖಲಿಸಲು ಹಣಕಾಸು ವ್ಯವಹಾರಗಳ ಘೋಷಣೆ (ಎಸ್‌ಎಫ್‌ಟಿ) ವ್ಯಾಪ್ತಿ ವಿಸ್ತರಿಸಲು ಹಣಕಾಸು ಸಚಿವಾಲಯ ಗುರುವಾರ ಪ್ರಸ್ತಾಪಿಸಿದೆ.
20,000 ರೂ.ಗಿಂತ ಹೆಚ್ಚಿನ ಹೋಟೆಲ್ ಬಿಲ್, 1 ಲಕ್ಷ ರೂ.ಗಿಂತ ಹೆಚ್ಚಿನ ಶಿಕ್ಷಣ ಶುಲ್ಕ ಮತ್ತು ಡೊನೇಷನ್, 1 ಲಕ್ಷ ರೂ.ಗಿಂತ ಹೆಚ್ಚಿನ ಮೌಲ್ಯದ ಆಭರಣ ಹಾಗೂ ಬಿಳಿ ಸರಕುಗಳ ಖರೀದಿಯು ಆದಾಯ ತೆರಿಗೆ ಇಲಾಖೆಯ ಪರಿಶೀಲನೆ ಅಡಿಯಲ್ಲಿ ಬರಬಹುದು ಎಂದು ಪ್ರಸ್ತಾಪಿಸಲಾಗಿದೆ.
ಆದಾಯ ತೆರಿಗೆ ಇಲಾಖೆ ತನ್ನ ವಹಿವಾಟು ವರದಿ ಚೌಕಟ್ಟಿನಡಿ ಹೆಚ್ಚಿನ ಹಣಕಾಸು ವಹಿವಾಟುಗಳನ್ನು ಸೇರಿಸಲು ಎದುರು ನೋಡುತ್ತಿದೆ. ಹಣಕಾಸು ಸಂಸ್ಥೆಗಳು ಮತ್ತು ಇತರ ಸಂಸ್ಥೆಗಳು ನಿಗದಿತ ಮಿತಿಗಿಂತ ಹೆಚ್ಚಿನ ವಹಿವಾಟುಗಳನ್ನು ವರದಿ ಮಾಡಬೇಕಾಗಬಹುದು.
ತೆರಿಗೆ ಪಾವತಿಸದೆ ದೊಡ್ಡ ಖರೀದಿ ಮಾಡುತ್ತಿರುವ ಅಥವಾ ತೆರಿಗೆ ರಿಟರ್ನ್ಸ್ ಸಲ್ಲಿಸುವ ಜನರನ್ನು ಗುರುತಿಸಲು ಯತ್ನಿಸುತ್ತಿದೆ. ಇದು ತೆರಿಗೆ ಮೂಲವನ್ನು ವಿಸ್ತರಿಸುವ ಸರ್ಕಾರದ ಪ್ರಯತ್ನಗಳ ಒಂದು ಪ್ರಮುಖ ಭಾಗವಾಗಿದೆ.
ಪ್ರಸ್ತುತ, ಎಸ್‌ಎಫ್‌ಟಿ ಅಡಿಯಲ್ಲಿ ಹೆಚ್ಚಿನ ಮೊತ್ತದ ನಗದು ವಹಿವಾಟು ಅಥವಾ ಮ್ಯೂಚುವಲ್ ಫಂಡ್‌, ಷೇರು ಮತ್ತು ಬಾಂಡ್‌ಗಳ ಖರೀದಿ ಒಳಗೊಂಡಿದೆ. ತೆರಿಗೆ ವಂಚನೆ ತಡೆಗಟ್ಟುವ ಸಲುವಾಗಿ ಸರ್ಕಾರವು ಈಗ ಹೆಚ್ಚಿನ ಮೌಲ್ಯದ ವಹಿವಾಟುಗಳನ್ನು ಸೇರಿಸಲು ಮಾತ್ರವಲ್ಲದೆ, ಅಸ್ತಿತ್ವದಲ್ಲಿರುವ ವಹಿವಾಟಿನ ಮಿತಿ ಕಡಿಮೆ ಮಾಡಲು ಪ್ರಸ್ತಾಪಿಸಿದೆ.
ವಾರ್ಷಿಕ 20,000 ರೂ.ಗಿಂತ ಹೆಚ್ಚಿನ ಆಸ್ತಿ ತೆರಿಗೆ ಪಾವತಿ, ಜೀವ ವಿಮಾ ಪ್ರೀಮಿಯಂ 50,000 ರೂ., ಡಿಮ್ಯಾಟ್ ಖಾತೆಯಲ್ಲಿ ಷೇರು ವಹಿವಾಟು ಮತ್ತು ಚಾಲ್ತಿ ಖಾತೆಯಲ್ಲಿ 50 ಲಕ್ಷ ರೂ.ಗಿಂತ ಹೆಚ್ಚಿನ ಠೇವಣಿ / ಕ್ರೆಡಿಟ್‌ಗಳಂತಹ ವ್ಯವಹಾರಗಳನ್ನು ಎಸ್‌ಎಫ್‌ಟಿ ವರದಿಯಲ್ಲಿ ಸೇರಿಸಲು ಉದ್ದೇಶಿಸಲಾಗಿದೆ.
