ನವದೆಹಲಿ: 2025ರ ವೇಳೆಗೆ ದೇಶದ ಆರ್ಥಿಕತೆಯನ್ನು 5 ಟ್ರಿಲಿಯನ್ ಡಾಲರ್ಗೆ ತಲುಪಿಸುವ ಕೇಂದ್ರದ ಮಹತ್ವಾಕಾಂಕ್ಷ ಯೋಜನೆಗೆ ಆರೋಗ್ಯ ಮತ್ತು ರಫ್ತು ಉದ್ಯಮಗಳು ಪ್ರಮುಖ ಕೀಗಳು ಎಂದು ನೀತಿ ಆಯೋಗದ ಉಪಾಧ್ಯಕ್ಷ ರಾಜೀವ್ ಕುಮಾರ್ ಹೇಳಿದ್ದಾರೆ.
ಒಪಿ ಜಿಂದಾಲ್ ಗ್ಲೋಬಲ್ ವಿಶ್ವವಿದ್ಯಾನಿಲಯದ (ಜೆಜಿಯು) ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ದೇಶವು ತನ್ನ ಜನರನ್ನು ಆರೋಗ್ಯಕರವಾಗಿರಿಸಲು ತಳಮಟ್ಟದಿಂದಲೇ ಗಮನಹರಿಸಬೇಕು ಮತ್ತು ಸರಕು ಮತ್ತು ಸೇವೆಗಳ ರಫ್ತು ಸುಧಾರಿಸುವತ್ತ ಗಮನಕೊಡಬೇಕಾಗಿದೆ. 6 ರಿಂದ 24 ತಿಂಗಳ ನಡುವಿನ ಮಕ್ಕಳಿಗೆ ಅಗತ್ಯವಾದ ಪೋಷಣೆ ಸಿಗುತ್ತಿಲ್ಲ. ಶೇ 38ರಷ್ಟು ಜನರು ಅಪೌಷ್ಟಿಕತೆಯಿಂದ ಬಳಲುತ್ತಿದ್ದಾರೆ ಹಾಗೂ ಶೇ 50ರಷ್ಟು ಮಹಿಳೆಯರು ರಕ್ತಹೀನತೆಗೆ ತುತ್ತಾಗುತ್ತಿದ್ದಾರೆ ಎಂದು ಹೇಳಿದರು.
ದೇಶದ ಆರ್ಥಿಕತೆಯ ಜೊತೆಗೆ ನಮ್ಮ ಮಾನವ ಸಂಪನ್ಮೂಲದತ್ತ ಸಹ ಗಮನ ಹರಿಸಬೇಕು. ಇದುವೇ ದೇಶದ ಅತ್ಯಂತ ಅಮೂಲ್ಯವಾದ ಸಂಪನ್ಮೂಲವಾಗಿದೆ. ಇಲ್ಲಿಂದಲೇ 5 ಟ್ರಿಲಿಯನ್ ಡಾಲರ್ ಆರ್ಥಿಕತೆಯ ಗುರಿ ತಲುಪುವುದನ್ನು ಆರಂಭಿಸಬೇಕು. ಜೊತೆಗೆ ಸರಕು ಮತ್ತು ಸೇವೆಗಳ ರಫ್ತಿನತ್ತ ದೃಷ್ಟಿಹಾಯಿಸಿ ಅವುಗಳನ್ನು ಸುಧಾರಣೆ ಮಾಡಿದರೆ ಉದ್ದೇಶಿತ ಗುರಿ ಸಾಧಿಸಬಹುದು ಎಂದರು.
ಕೃಷಿಯಲ್ಲಿನ ಶೇ 43- 44ರಷ್ಟು ಶ್ರಮವು ಜಿಡಿಪಿಯಲ್ಲಿ ಶೇ 16ರಷ್ಟು ಉತ್ಪಾದನೆಗೆ ನೆರವಾಗಿದೆ. ಆದರೆ, ರಫ್ತು ಪರಿಗಣನೆ ಮಾತ್ರ ನಗಣ್ಯವಾಗಿದೆ. ಸ್ಥಳೀಯವಾಗಿ ಮತ್ತು ಜಾಗತಿಕವಾಗಿ ನಮಗೆ ಅಪಾರ ಬೇಡಿಕೆಯಿದೆ. ನಾವು ಇದನ್ನು ಸಾಮರ್ಥ್ಯವಾಗಿ ಬಳಸಿಕೊಳ್ಳಬೇಕಿದೆ ಎಂದು ರಾಜಿವ್ ಕುಮಾರ್ ಸಲಹೆ ನೀಡಿದರು.
