ನವದೆಹಲಿ: ಸರಕು ಮತ್ತು ಸೇವಾ ತೆರಿಗೆಯ (ಜಿಎಸ್ಟಿ) ಅಕ್ಟೋಬರ್ ಮಾಸಿಕದಲ್ಲಿ ಕುಸಿತ ಉಂಟಾಗಿದ್ದು, ಕೇಂದ್ರ ಸರ್ಕಾರಕ್ಕೆ ಆರ್ಥಿಕ ಹೊಡೆತದ ಚಿಂತೆ ಎದುರಾಗಿದೆ.
ಅಕ್ಟೋಬರ್ನಲ್ಲಿ ಜಿಎಸ್ಟಿ ಸಂಗ್ರಹದಲ್ಲಿ ಶೇ 5.59ರಷ್ಟು ಇಳಿಕೆ ಕಂಡಿದ್ದು, ₹ 95,380 ಕೋಟಿ ಹರಿದು ಬಂದಿದೆ. ಕಳೆದ ವರ್ಷ ಇದೇ ವರ್ಷದಲ್ಲಿ ₹ 1,00,710 ಕೋಟಿಯಷ್ಟು ಸಂಗ್ರಹವಾಗಿತ್ತು ಎಂದು ಸರ್ಕಾರ ಬಿಡುಗಡೆ ಮಾಡಿದ ಅಂಕಿ- ಅಂಶಗಳು ತಿಳಿಸಿವೆ.
ಸಿಜಿಎಸ್ಟಿ ₹ 17,582 ಕೋಟಿ, ಎಸ್ಜಿಎಸ್ ಟಿ ₹ 23, 674 ಕೋಟಿ, ಐಜಿಎಸ್ಟಿ ₹ 46,517 ಕೋಟಿ (₹ 21,446 ಕೋಟಿ ಆಮದು ತೆರಿಗೆ ಸೇರಿ) ಮತ್ತು ಸೆಸ್ ₹ 7,607 ಕೋಟಿಯಷ್ಟು (ಆಮದು ಮೇಲಿನ ಸಂಗ್ರಹ ₹ 774 ಕೋಟಿ ಸೇರಿ) ಸಂಗ್ರಹವಾಗಿದೆ. ಸೆಪ್ಟೆಂಬರ್ನಿಂದ ಅಕ್ಟೋಬರ್ 31ರ ವರೆಗೆ ₹ 73.83 ಲಕ್ಷ ಕೋಟಿ ಜಿಎಸ್ಟಿಆರ್ 3ಬಿ ರಿಟರ್ನ್ಸ್ ದಾಖಲಾಗಿದೆ. ಅಕ್ಟೋಬರ್ ಮಾಸಿಕದಲ್ಲಿ ಸಾಲು-ಸಾಲು ಹಬ್ಬಗಳು ಇದ್ದರೂ ಜಿಎಸ್ಟಿ ಸಂಗ್ರಹ ಕುಸಿದಿದೆ.
ಜಿಎಸ್ಟಿ ಕುಸಿತವು ಸರ್ಕಾರಕ್ಕೆ ಕಠಿಣ ಪರಿಸ್ಥಿತಿ ತಂದೊಡ್ಡಲಿದೆ. ಆದಾಯ ಸಂಗ್ರಹಣೆ ಸುಧಾರಿಸಲು ಇನ್ನೂ ಹಲವು ಉತ್ತೇಜನ ಕ್ರಮಗಳನ್ನು ತೆಗೆದುಕೊಳ್ಳಬೇಕಾಗುತ್ತದೆ. ತೆರಿಗೆದಾರರ ಪಾವತಿಯ ಸಂಖ್ಯೆ ಹೆಚ್ಚಳಕ್ಕೆ ಸರ್ಕಾರ ಖಚಿತವಾದ ನಿರ್ಧಾರ ತೆಗೆದುಕೊಳ್ಳಬೇಕು ಎಂದು ಧ್ರುವ ಅಡ್ವೈಸರ್ಸ್ ಪಾಲುದಾರ ಅಮಿತ್ ಭಗತ್ ಹೇಳಿದ್ದಾರೆ.
