ಜಸ್ಟ್​ 2 ದಿನದ ಜಿಎಸ್​ಟಿ ಸಭೆಗೆ ಬರೋಬ್ಬರಿ ₹ 3.26 ಕೋಟಿ ಖರ್ಚು.. ಫೋಟೋ ಜಾಹೀರಾತಿಗೆ ₹2 ಕೋಟಿ..

ಗೋವಾದ ಪಣಜಿಯಲ್ಲಿ ಎರಡು ದಿನಗಳ ಕಾಲ ನಡೆದ ಜಿಎಸ್​ಟಿ ಮಂಡಳಿ ಸಭೆಗೆ ಗೋವಾ ರಾಜ್ಯ ಸರ್ಕಾರ ಬರೋಬ್ಬರಿ ₹ 3.26 ಕೋಟಿ ವಿನಿಯೋಗಿಸಿದೆ. ವಕೀಲರಾದ ಐರೀಸ್ ರೋಡ್ರಿಗಸ್​ ಎಂಬುವರು ಸಲ್ಲಿಸಿದ ಮಾಹಿತಿ ಹಕ್ಕು ಕಾಯ್ದೆ (ಆರ್​ಟಿಐ) ಅಡಿ ಕೋರಲಾದ ಅರ್ಜಿಗೆ ವಾಣಿಜ್ಯ ತೆರಿಗೆ ಇಲಾಖೆ ಈ ಮಾಹಿತಿ ನೀಡಿದ್ದು, ಸರ್ಕಾರದ ದುಂದು ವೆಚ್ಚ ಬಹಿರಂಗವಾಗಿದೆ.

ಪಣಜಿ: ಕಳೆದ ತಿಂಗಳು ನಡೆದ ಎರಡು ದಿನಗಳ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್​ಟಿ) ಮಂಡಳಿ ಸಭೆಗೆ ಗೋವಾ ರಾಜ್ಯ ಸರ್ಕಾರ ಬರೋಬ್ಬರಿ ₹ 3.26 ಕೋಟಿ ಖರ್ಚು ಮಾಡಿದೆ.

ಇಲ್ಲಿನ ವಕೀಲರಾದ ಐರೀಸ್ ರೋಡ್ರಿಗಸ್​ ಎಂಬುವರು ಸಲ್ಲಿಸಿದ ಮಾಹಿತಿ ಹಕ್ಕು ಕಾಯ್ದೆ (ಆರ್​ಟಿಐ) ಅಡಿ ಕೋರಲಾದ ಅರ್ಜಿಗೆ ವಾಣಿಜ್ಯ ತೆರಿಗೆ ಇಲಾಖೆ ಈ ಮಾಹಿತಿ ನೀಡಿದ್ದು, ಸರ್ಕಾರದ ದುಂದು ವೆಚ್ಚ ಬಹಿರಂಗವಾಗಿದೆ. ಗೋವಾ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮದೊಂದಿಗೆ (ಜಿಟಿಡಿಸಿ) ಸಹಭಾಗಿತ್ವದಲ್ಲಿ ವಾಸ್ಕೋ ಮೂಲದ ಕಂಪನಿ, ಜಿಎಸ್​ಟಿ ಮಂಡಳಿ ಸಭೆ, ಜಾಹೀರಾತು, ಹೋರ್ಡಿಂಗ್​ಗಳು ಮತ್ತು ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಹಾಗೂ ಮುಖ್ಯಮಂತ್ರಿ ಪ್ರಮೋದ್ ಸಾವಂತ್​ ಅವರ ಭಾವಚಿತ್ರಗಳನ್ನು ಜಾಹೀರಾತಿನಲ್ಲಿ ಲಗತ್ತಿಸಲು ಸುಮಾರು 1.95 ಕೋಟಿ ರೂ. ಮೊತ್ತದ ಬಿಲ್​ ನೀಡಿತ್ತು.

ಜಿಎಸ್​ಟಿ ಸಭೆ ನಡೆದ ಡಬಲ್​ ಟ್ರೀ ರೆಸಾರ್ಟ್​ನಲ್ಲಿನ ವಸತಿ, ಆಹಾರಕ್ಕೆ ₹ 50 ಲಕ್ಷ ವೆಚ್ಚವಾಗಿದೆ. ಇದಲ್ಲದೆ ಸರ್ಕಾರ ಗಣ್ಯರ ವಸತಿಗಾಗಿ ಹೆಚ್ಚುವರಿಯಾಗಿ ₹ 30 ಲಕ್ಷ ವ್ಯಯಿಸಿದೆ ಎಂದು ಇಲಾಖೆ ಮಾಹಿತಿ ನೀಡಿದೆ.