ನವದೆಹಲಿ : 2020-21ರ ಬಜೆಟ್ ಬಗ್ಗೆ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಸಂತಸ ವ್ಯಕ್ತಪಡಿಸಿದ್ದು, ಇಂದಿನ ಬಜೆಟ್ ಆರ್ಥಿಕ ಬೆಳವಣಿಗೆಯನ್ನು ಪುನರುಜ್ಜೀವನಗೊಳಿಸುವುದರ ಜೊತೆಗೆ ಆರ್ಥಿಕತೆಯಲ್ಲಿ ಬೇಡಿಕೆ ಪ್ರಮಾಣ ಹೆಚ್ಚಿಸುವಂತಿದೆ ಎಂದಿದ್ದಾರೆ.
ಕೇವಲ ಪೂರಕ ಬಂಡವಾಳ ಹೂಡಿಕೆ ಹೆಚ್ಚಳ ಮಾತ್ರವಲ್ಲದೇ ಇಂದಿನ ಬಜೆಟ್ನಲ್ಲಿರುವ ಅಂಶಗಳು ದೀರ್ಘಾವಧಿಯಲ್ಲಿ ರೈತರ ಆದಾಯ ದ್ವಿಗುಣಗೊಳಿಸಲು ಮತ್ತು ನಷ್ಟದಲ್ಲಿರುವ ಕೈಗಾರಿಕೆಗಳನ್ನು ಪುನಶ್ಚೇತಗೊಳಿಸಲು ಸಹಕಾರಿಯಾಗಲಿವೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಮಂಡಿಸಿದ ಈ ಬಜೆಟ್ ''ವಿಶ್ವಾಸಾರ್ಹ ಭಾರತ''ಕ್ಕೆ ಹೊಸರೂಪುರೇಷೆ ಬರೆಯಲಿದ್ದು, ಮುಂದಿನ ವರ್ಷಗಳಲ್ಲಿ ಭಾರತವನ್ನು ಶ್ರೀಮಂತಗೊಳಿಸುವ ಮತ್ತು ಆರ್ಥಿಕತೆಯನ್ನು ಸುಸ್ಥಿರಗೊಳಿಸುವ ಪ್ರಗತಿಪರ ಬಜೆಟ್ ಇದಾಗಿದೆ ಎಂದು ಕೇಂದ್ರ ರಕ್ಷಣಾ ಸಚಿವ ರಾಜ್ನಾಥ್ ಸಿಂಗ್ ಹೇಳಿದ್ರು. ವಿಶೇಷವಾಗಿ ರೈತರನ್ನು ದೃಷ್ಟಿಯಲ್ಲಿಟ್ಟುಕೊಂಡು ಎಲ್ಲ ವಲಯಗಳ ಸರ್ವತೋಮುಖ ಅಭಿವೃದ್ಧಿಗೆ ಈ ಬಾರಿಯ ಬಜೆಟ್ನಲ್ಲಿ ಗಮನ ಹರಿಸಲಾಗಿದೆ ಎಂದು ತಿಳಿಸಿದ್ರು. ಜೊತೆಗ ಹೆಚ್ಚಿನ ಉದ್ಯೋಗ ಸೃಷ್ಟಿಗೆ ಆದ್ಯತೆ ನೀಡಲಾಗಿದೆ ಎಂದ್ರು.
ಇಂದಿನ ಬಜೆಟ್ ತೆರಿಗೆದಾರರು, ಹೂಡಿಕೆದಾರರು ಮತ್ತು ಬಂಡವಾಳಗಾರರಿಗೆ ತೆರಿಗೆ ಕಿರುಕುಳದಿಂದ ರಕ್ಷಣೆ ಒದಗಿಸಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ರು. ಈ ಬಾರಿಯ ಬಜೆಟ್ನಲ್ಲಿ ಪರಿಚಯಿಸಲಾಗಿರುವ ನೂತನ ತೆರಿಗೆ ಸುಧಾರಣೆಗಳು ಅತ್ಯಂತ ಪ್ರಗತಿದಾಯಕವಾಗಿದ್ದು, ಸಾಮಾನ್ಯ ಜನರ ತೆರಿಗೆ ಹೊರೆ ಕಡಿಮೆ ಮಾಡಲಿವೆ ಎಂದು ತಿಳಿಸಿದ್ರು. ಉತ್ತಮ ತೆರಿಗೆ ವ್ಯವಸ್ಥೆಗೆ ಈ ಬಜೆಟ್ ಸೂಕ್ತ ಹಾದಿ ನಿರ್ಮಿಸಿದೆ ಎಂದು ಹೇಳಿದ್ರು.
ಹೊಸ ತಂತ್ರಜ್ಞಾನ ಕ್ಷೇತ್ರದಲ್ಲಿ ಬಂಡವಾಳ ಹೂಡುವ ಮೂಲಕ ಜ್ಞಾನಾಧಾರಿತ ಆರ್ಥಿಕತೆ ರೂಪಿಸಲು ಹಸ್ತಕ್ಷೇಪ ನೀತಿ ಪ್ರಸ್ತಾವನೆ ಮಾಡಿದ್ದಕ್ಕಾಗಿ ರಾಜ್ನಾಥ್ ಸಿಂಗ್ ಸಚಿವೆ ನಿರ್ಮಲಾ ಸೀತಾರಾಮನ್ ಅವರನ್ನು ಅಭಿನಂದಿಸಿದ್ರು. ಈ ಹೊಸ ನೀತಿ ನವಭಾರತದ ನಿರ್ಮಾಣಕ್ಕೆ ಭದ್ರ ಬುನಾದಿಯಾಗಲಿದೆ ಎಂದು ಬಣ್ಣಿಸಿದರು. 2024-25 ರ ವೇಳೆಗೆ 5 ಟ್ರಿಲಿಯನ್ ಯುಎಸ್ಡಿ ಯಷ್ಟು ಆರ್ಥಿಕ ಪ್ರಗತಿ ಸಾಧಿಸುವ ಗುರಿಯತ್ತ ಇಂದಿನ ಬಜೆಟ್ ಹೆಚ್ಚಿನ ಒತ್ತು ನೀಡಿದೆ ಎಂದು ತಿಳಿಸಿದ್ರು.
ಹಾಗೆಯೇ ದೇಶದ ಗುರಿ ಸಾಧನೆಗೆ ಅಗತ್ಯವಿರುವಂತ ಅಂಶಗಳುಳ್ಳ ಇಂತಹ ಉತ್ತಮ ಬಜೆಟ್ ನೀಡಿದ್ದಕ್ಕಾಗಿ ಇದೇ ವೇಳೆ ಪ್ರಧಾನಿ ಮೋದಿಯವರಿಗೆ ಕೃತಜ್ಞತೆ ಸಲ್ಲಿಸಿದ್ರು.
