ನವದೆಹಲಿ: 2021ರ ಕೇಂದ್ರ ಬಜೆಟ್ಗೆ ಕ್ಷಣಗಣನೆ ಆರಂಭವಾಗಿದ್ದು, ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಸಾಂಪ್ರದಾಯಿಕ 'ಬಹಿ ಖಾತಾ' ಚೀಲ ಬಿಟ್ಟು ಟ್ಯಾಬ್ ಹಿಡಿದು ತಮ್ಮ ಮೂರನೇ ಬಜೆಟ್ ಮಂಡಿಸಲಿದ್ದಾರೆ.
ಸಾಂಪ್ರದಾಯಿಕ ಕೆಂಪು ಬಟ್ಟೆ 'ಬಹಿ-ಖತಾ'ಯೊಂದಿಗೆ ಕಳೆದ ವರ್ಷದ ಬಜೆಟ್ ಮಂಡಿಸಿದ್ದ ನಿರ್ಮಲಾ ಸೀತಾರಾಮನ್ ಅವರು ಡಿಸೆಂಬರ್ನ ಪೂರ್ವಸಿದ್ಧತೆ ವೇಳೆ ನೀಡಿದ್ದ ಆಶ್ವಾಸನೆಯಂತೆ 'ಹಿಂದೆಂದೂ ಇಲ್ಲದಂತೆ ಇರಲಿದೆ' ಎಂಬ ಲೆಕ್ಕಪತ್ರ ದೇಶದ ಮುಂದೆ ಇರಿಸಲಿದ್ದಾರೆ.
ಸಚಿವರ ಜೊತೆಗೆ ಹಣಕಾಸು ಖಾತೆ ರಾಜ್ಯ ಸಚಿವ ಅನುರಾಗ್ ಠಾಕೂರ್, ಹಣಕಾಸು ಸಚಿವಾಲಯದ ಹಿರಿಯ ಅಧಿಕಾರಿಗಳು ರಾಷ್ಟ್ರಪತಿಗಳ ಭವನಕ್ಕೆ ತೆರಳಿ ಸಂಸತ್ತಿನಲ್ಲಿ ಬಜೆಟ್ ಮಂಡನೆಗೆ ರಾಮ್ನಾಥ್ ಕೋವಿಂದ್ ಅವರಿಂದ ಒಪ್ಪಿಗೆ ಪಡೆದರು.
ಇದನ್ನೂ ಓದಿ: ಬಜೆಟ್ ಮಂಡನೆ ಹೊಸ್ತಿಲಲ್ಲಿ 350 ಅಂಕ ಜಿಗಿದ ಸೆನ್ಸೆಕ್ಸ್: 6 ದಿನಗಳ ಕುಸಿತಕ್ಕೆ ಬ್ರೇಕ್
ಬೆಳಗ್ಗೆ 10:15ಕ್ಕೆ ಕೇಂದ್ರ ಸಚಿವ ಸಂಪುಟ ಸಭೆ ನಡೆಸಲಾಗುತ್ತದೆ. ಸಾಮಾನ್ಯವಾಗಿ, ಬಜೆಟ್ ಪ್ರಸ್ತುತಿಯ ಅವಧಿ 90 ರಿಂದ 120 ನಿಮಿಷಗಳವರೆಗೆ ಇರುತ್ತದೆ. ಈ ವರ್ಷ ಕೇಂದ್ರ ಬಜೆಟ್ ಅನ್ನು ಮೊದಲ ಬಾರಿಗೆ ಕಾಗದರಹಿತ ರೂಪದಲ್ಲಿ ತರಲಾಗುತ್ತಿದೆ.
ಸಂಸತ್ತಿನ ಸದಸ್ಯರು (ಸಂಸದರು) ಮತ್ತು ಸಾರ್ವಜನಿಕರಿಂದ ಸರಳವಾದ ಡಿಜಿಟಲ್ ಅನುಕೂಲಕ್ಕಾಗಿ ಬಜೆಟ್ ದಾಖಲೆಗಳ ತೊಂದರೆಯಿಲ್ಲದೆ ಪಡೆಯಲು ಹಣಕಾಸು ಸಚಿವರು 'ಕೇಂದ್ರ ಬಜೆಟ್ ಮೊಬೈಲ್ ಅಪ್ಲಿಕೇಷನ್' ಅನ್ನು ಪ್ರಾರಂಭಿಸಿದ್ದರು ಎಂದು ಹಣಕಾಸು ಸಚಿವಾಲಯ ತಿಳಿಸಿದೆ.
ಬಜೆಟ್ ಬ್ರೀಫ್ ಕೇಸ್ ಹಿಂದಿನ ಮಹತ್ವದ ಸಂಗತಿಗಳು
* 1956-1958 ಮತ್ತು 1964-1966 ಅವಧಿಯಲ್ಲಿ ಅಂದಿನ ವಿತ್ತ ಸಚಿವ ಟಿ.ಟಿ. ಕೃಷ್ಣಮಾಚಾರಿ ಅವರು ಬಜೆಟ್ ಫೈಲ್ ಬ್ಯಾಗ್ ಹಿಡಿದು ಸಂಸತ್ ಪ್ರವೇಶಿಸಿದ್ದರು.
* 1958ರಲ್ಲಿ ದೇಶದ ಪ್ರಥಮ ಪ್ರಧಾನಿ ಪಂಡಿತ್ ಜವಾಹಾರ್ ಲಾಲ್ ನೇಹರು ಕಪ್ಪು ಬಣ್ಣದ ಬ್ರೀಫ್ ಕೇಸ್ ಒಯ್ದು ಬಜೆಟ್ ಮಂಡಿಸಿದ್ದರು.
* 1970ರ ದಶಕದ ನಂತರ ಹಣಕಾಸು ಸಚಿವರು ಕ್ಲಾಸಿಕ್ ಹಾರ್ಡ್‌ಟಾಪ್ ಅಟ್ಯಾಚ್ ಬ್ರೀಪ್ ಕೇಸ್ ತೆಗೆದುಕೊಂಡು ಹೋಗುವ ಸಂಪ್ರದಾಯಕ್ಕೆ ನಾಂದಿ ಹಾಡಿದ್ದರು.
* ಬ್ರಿಟನ್ನಲ್ಲಿ ಬಳಸಲಾಗುತ್ತಿದ್ದ ಕೆಂಪು ವರ್ಣ ಮಾದರಿಯ ಬಜೆಟ್ ಬಾಕ್ಸ್ ಅನ್ನು ವಿತ್ತ ಸಚಿವರಾಗಿದ್ದ ಯಶ್ವಂತ ಸಿನ್ಹಾ ಅವರು ಒಯ್ದರು.
* ಡಾ. ಮನಮೋಹನ್ ಸಿಂಗ್ ಅವರು ವಿಲಿಯಂ ಎವಾರ್ಟ್ ಗ್ಲಾಡ್ ಸ್ಟೋನ್ ಅವರ ಬ್ರೀಫ್ ಕೇಸ್ ಅನ್ನೇ ಹೋಲುವ ಕಪ್ಪು ಪೆಟ್ಟಿಗೆ ಬಳಸಿದ್ದರು.
* ಪ್ರಣಬ್ ಮುಖರ್ಜಿ ಅವರು ಚೆರ್ರಿ ಕೆಂಪು ಬಣ್ಣದ ಬ್ರೀಫ್ ಕೇಸ್ ಕೊಂಡೊಯ್ಯುತ್ತಿದ್ದುದು ಬಹಳಷ್ಟು ಜನರ ಗಮನ ಸೆಳೆದಿತ್ತು.
* ಬ್ರಿಟನ್ನ ಮಾಜಿ ಪ್ರಧಾನಿ ಗ್ಲ್ಯಾಡ್‌ಸ್ಟೋನ್ ಅವರ ಶೈಲಿಯನ್ನು ಅನುಕರಿಸಿದ ಪಿ. ಚಿದಂಬರಂ ಅವರು, ಸರಳ ಕಂದು ಮತ್ತು ಕೆಂಪು ಕಂದು ಬಣ್ಣದ ಬ್ರೀಫ್ ಕೇಸ್ ಬಳಸಿದ್ದರು.
* ಅರುಣ್ ಜೇಟ್ಲಿ ಅವರು 2014ರ ತಮ್ಮ ಪ್ರಥಮ ಬಜೆಟ್ ಮಂಡನೆಗೆ ಕಂದು ಬಣ್ಣದ ಮತ್ತು 2017ರಲ್ಲಿ ಗಾಢ ಕಂದು ಬಣ್ಣದ ಬ್ರೀಫ್ ಕೇಸ್ ಬಳಸಿದ್ದರು.
* 2019 ಲೇಖಾನುದಾನ ಮಂಡಿಸಿದ್ದ ಹಂಗಾಮಿ ವಿತ್ತ ಸಚಿವ ಪಿಯೂಷ್ ಗೋಯಲ್ ಕಪ್ಪು ಬಣ್ಣದ ಬಜೆಟ್ ಪೆಟ್ಟಿಗೆ ತೆಗೆದುಕೊಂಡು ಹೋಗಿದ್ದರು.
* 2019ರ ಚುನಾವಣೆ ಬಳಿಕ ಚೊಚ್ಚಲ ಬಜೆಟ್ ಅನ್ನು ನಿರ್ಮಲಾ ಸೀತಾರಾಮನ್ ಅವರು 'ಬ್ರೀಫ್ ಕೇಸ್' ಬಿಟ್ಟು, 'ಬಹಿ ಖಾತಾ' ಚೀಲ ಹಿಡಿದಿದ್ದು. ಈ ವರ್ಷ ಟ್ಯಾಬ್ ಹಿಡಿದಿದ್ದಾರೆ.
