ನವದೆಹಲಿ: ಮುಂದಿನ ದಿನಗಳಲ್ಲಿ ಟಾಟಾ ಮೋಟಾರ್ಸ್ ತನ್ನ ಸಣ್ಣ ಡೀಸೆಲ್ ಕಾರುಗಳ ಉತ್ಪನ್ನದ ಮೇಲಿನ ಬಂಡವಾಳವನ್ನು ಹಿಂತೆಗೆದುಕೊಳ್ಳಲು ಮುಂದಾಗಿದೆ.
ಮುಂಬರುವ ದಿನಗಳಲ್ಲಿ ಬಿಎಸ್-6 ಗುಣಮಟ್ಟಕ್ಕೆ ಹೊಂದುವಂಥ ವಾಹನಗಳ ತಯಾರಿಕೆ ಮಾಡುವುದು ಕಡ್ಡಾಯವಾಗಿದೆ. ಈ ಮಾದರಿ ತಯಾರಿಕೆಯಿಂದ ಕಾರುಗಳ ಬೆಲೆ ಏರಿಕೆಯಾಗಲಿದ್ದು, ಬೇಡಿಕೆಯ ಪ್ರಮಾಣ ತಗ್ಗಲಿದೆ. ಹೀಗಾಗಿ, ಬಂಡವಾಳವನ್ನು ಹಿಂತೆಗೆದುಕೊಳ್ಳಲಾಗುತ್ತಿದೆ ಎಂದು ಕಂಪನಿಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ದೇಶದ ಅತಿದೊಡ್ಡ ಕಾರು ತಯಾರಕ ಕಂಪನಿಯಾದ ಮಾರುತಿ ಸುಜುಕಿ ಇಂಡಿಯಾ (ಎಂಎಸ್ಐ), ಡೀಸೆಲ್ ಕಾರುಗಳ ಉತ್ಪನ್ನ ಸ್ಥಗಿತಗೊಳಿಸುವುದಾಗಿ ಕಳೆದ ತಿಂಗಳಾಂತ್ಯದಲ್ಲಿ ಘೋಷಿಸಿತ್ತು.
ಕಾರ್ಬನ್ ಮಟ್ಟ ತಗ್ಗಿಸಿ ವಾಯುಮಾಲಿನ್ಯ ನಿಯಂತ್ರಿಸಲು ಕೇಂದ್ರ ಸರ್ಕಾರವು 'ಭಾರತ್ ಸ್ಟೇಜ್' ಮಾಲಿನ್ಯ ನಿಯಮಾವಳಿಗಳನ್ನು ರೂಪಿಸಿದೆ. ಸದ್ಯ ಬಿಎಸ್-4 ವ್ಯವಸ್ಥೆ ಜಾರಿಯಲ್ಲಿದ್ದು, ಬಿಎಸ್-5 ಬದಲಿಗೆ ಬಿಎಸ್-6 ಗುಣಮಟ್ಟದ ವಾಹನಗಳು ಮಾರಾಟ ವ್ಯವಸ್ಥೆಯನ್ನು 2021ರ ವೇಳೆಗೆ ಪರಿಚಯಿಸಲಾಗುತ್ತಿದೆ. ಬಿಎಸ್-6 ನಿಯಮಗಳಿಗೆ ತಕ್ಕಂತ ವಾಹನಗಳನ್ನಷ್ಟೇ ಕಂಪನಿಗಳು ತಯಾರಿಸಬೇಕಾಗಿದೆ. 2020ರ ಏಪ್ರಿಲ್ 1ರಿಂದ ದೇಶಾದ್ಯಂತ ಭಾರತ್ ಸ್ಟೇಜ್-4 ವಾಹನಗಳನ್ನು ಮಾರಾಟ ಹಾಗೂ ನೋಂದಣಿ ಮಾಡದಂತೆ ಸುಪ್ರೀಂಕೋರ್ಟ್ ಆದೇಶಿಸಿದೆ. ಈ ನಿಯಮ ಪಾಲನೆಗೆ ಕಂಪನಿಗಳು ಆರ್ಥಿಕವಾಗಿ ಹೊರೆಯಾಗುವ ಉತ್ಪನ್ನಗಳನ್ನು ಸ್ಥಗಿತಗೊಳಿಸಲು ನಿರ್ಧರಿಸಿವೆ.
ಟಾಟಾ ಮೋಟಾರ್ಸ್ 1 ಲೀಟರ್ ಡೀಸೆಲ್ ಇಂಜಿನ್ ಸಾಮರ್ಥ್ಯದ 'ಟಿಯಾಗೋ', ಸೆಡನ್ ಶ್ರೇಣಿಯ 1.05 ಲೀಟರ್ನ 'ಟಿಗೊರ್' ಹಾಗೂ ಹಳೆ ಮಾದರಿಯ 'ಬೋಲ್ಟಾ' ಮತ್ತು 'ಝೆಸ್ಟ್'ನಂತಹ ಕಾರುಗಳ ಉತ್ಪನ್ನ ಸ್ಥಗಿತವಾಗಲಿದೆ.
ಸಣ್ಣ ಮತ್ತು ಮಧ್ಯಮ ಗಾತ್ರದ ಕಾರುಗಳ ತಯಾರಿಕೆಗೆ ಅಗತ್ಯವಾದ ಸುಧಾರಿತ ಇಂಜಿನ್ ಅಭಿವೃದ್ಧಿಪಡಿಸುವುದು ದುಬಾರಿ ಆಗಲಿದೆ. ಒಂದೇ ತಯಾರಿಸಿದ್ದರೂ ಈ ಕಾರುಗಳಿಗೆ ಹೆಚ್ಚಿನ ದರ ವಿಧಿಸಬೇಕಾಗುತ್ತದೆ. ಇದರಿಂದ ಮುಂದಿನ ದಿನಗಳಲ್ಲಿ ಬೇಡಿಕೆ ಕುಸಿಯಲಿದೆ. ಹೀಗಾಗಿ, ಸಣ್ಣ ಕಾರುಗಳ ಮೇಲಿನ ಬಂಡವಾಳ ವಾಪಸ್ ತೆಗೆದುಕೊಳ್ಳುತ್ತಿದ್ದೇವೆ ಎಂದು ಟಾಟಾ ಮೋಟಾರ್ಸ್ನ ಪ್ಯಾಸೆಂಜರ್ ವಾಹನಗಳ ಅಧ್ಯಕ್ಷ ಮಾಯಾಂಕ್ ಪಾರೀಕ್ ಹೇಳಿದ್ದಾರೆ.
ಈ ಮಾದರಿಯ ವಾಹನಗಳಲ್ಲಿ ಶೇ 80ರಷ್ಟು ಬೇಡಿಕೆ ಪೆಟ್ರೋಲ್ ಚಾಲಿತ ಇಂಜಿನ್ಗಳಿಗೆ ಬರುತ್ತಿದೆ. ಅಗತ್ಯಕ್ಕಿಂತ ಹೆಚ್ಚುವರಿ ಬಂಡವಾಳ ಹೂಡುವುದು ಕಾರ್ಯಸಾಧ್ಯ ಆಗುವುದಿಲ್ಲ ಎಂದು ಸ್ಪಷ್ಟನೆ ನೀಡಿದ್ದಾರೆ.
