ನವದೆಹಲಿ: ಪಂಜಾಬ್ ನ್ಯಾಷನಲ್ ಬ್ಯಾಂಕ್ ಹಗರಣದ ಆರೋಪಿಗಳಾದ ವಜ್ರದ ಉದ್ಯಮಿ ನೀರವ್ ಮೋದಿ ಹಾಗೂ ಮೆಹುಲ್ ಚೋಕ್ಸಿ ಅವರಿಗೆ ಸೇರಿದ್ದ 12 ಐಷಾರಾಮಿ ಕಾರುಗಳನ್ನು ಜಾರಿ ನಿರ್ದೇಶನಾಲಯ (ಇಡಿ) ಹರಾಜು ಹಾಕಿದೆ.
ಅಕ್ರಮ ಹಣ ವರ್ಗಾವಣೆ ನಿಯಂತ್ರಣ ಕಾಯ್ದೆಯಡಿ ಈ ಕಾರುಗಳನ್ನು ಜಾರಿ ನಿರ್ದೇಶನಾಲಯ ತನ್ನ ವಶಕ್ಕೆ ಪಡೆದುಕೊಂಡಿದೆ. ನ್ಯಾಯಾಲಯ ಕೂಡ 13 ಕಾರುಗಳ ಹರಾಜಿಗೆ ಸಮ್ಮತಿ ಸೂಚಿಸಿತ್ತು. ಎಂಎಸ್ಟಿಸಿ ಕಂಪನಿಯಿಂದ ಇ- ಹರಾಜು ಮಾಡಲಾಗಿದ್ದು, ಕಾರುಗಳು ಒಟ್ಟು ₹ 3.029 ಕೋಟಿಗೆ ಬಿಕರಿಯಾಗಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ.
ಬ್ಯಾಂಕುಗಳಿಗೆ ಹಣ ವಂಚನೆ ಪ್ರಕರಣದಲ್ಲಿ, 2 ಬಿಲಿಯನ್ ಅಮೆರಿಕನ್ ಡಾಲರ್ ಹಣ ವರ್ಗಾವಣೆ ತನಿಖೆಯ ಭಾಗವಾಗಿ ಮೋದಿ ಹಾಗೂ ಚೋಕ್ಸಿಗೆ ಸೇರಿದ ಈ ಕಾರುಗಳನ್ನು ವಶಕ್ಕೆ ಪಡೆಯಲು ಮಾರ್ಚ್ ತಿಂಗಳಲ್ಲಿ ಮುಂಬೈನ ಪಿಎಂಎಲ್ಎ ಸ್ಪೆಷಲ್ ಕೋರ್ಟಿನಿಂದ ಇಡಿ ಅನುಮತಿ ಪಡೆದುಕೊಂಡಿತ್ತು.
13 ಕಾರುಗಳ ಪೈಕಿ 11 ಕಾರುಗಳು ನೀರವ್ ಮೋದಿ ಗ್ರೂಪಿಗೆ ಸೇರಿದರೆ, 2 ಕಾರುಗಳು ಮೆಹುಲ್ ಚೋಕ್ಸಿ ಸಮೂಹಕ್ಕೆ ಸೇರಿವೆ. ಈ 13 ಕಾರುಗಳ ಪೈಕಿ 12 ಕಾರುಗಳಿಗೆ ₹ 3,28,94,293 ಬಿಡ್ ಮಾಡಲಾಗಿದೆ.
ಆದಾಯ ತೆರಿಗೆ ಇಲಾಖೆ ಕಳೆದ ತಿಂಗಳು ನೀರವ್ ಮೋದಿಗೆ ಸೇರಿರುವ ಕೆಲವು ಕಲಾಕೃತಿಗಳನ್ನು ₹ 59. 37 ಕೋಟಿಗೆ ಹರಾಜು ಮಾಡಿತ್ತು.
