ಬೀಜಿಂಗ್: ಚೀನಾದ ಅತಿದೊಡ್ಡ ಇ- ಕಾಮರ್ಸ್‌ ವಾಣಿಜ್ಯ ಸಂಸ್ಥೆಯಾದ ಅಲಿಬಾಬಾ ಮುಖ್ಯಸ್ಥ ಜಾಕ್ ಮಾ ಅವರು ಮಂಗಳವಾರ ಸಂಸ್ಥೆಯ ಅಧ್ಯಕ್ಷ ಸ್ಥಾನದಿಂದ ಕೆಳಗಿಳಿದಿದ್ದಾರೆ.
55 ವರ್ಷದ ಜಾಕ್ ಮಾ ಅವರು 1999ರಲ್ಲಿ ಅಲಿಬಾಬಾ ಸಂಸ್ಥೆಯನ್ನು ಆರಂಭಿಸಿದ್ದರು. ಇದಕ್ಕೂ ಮೊದಲು ಶಿಕ್ಷಕರಾಗಿ ಕೆಲ ಕಾಲ ಸೇವೆ ಸಲ್ಲಿಸಿದ್ದರು. ಉದ್ಯಮಿ ಜೀವನದ ಸುದೀರ್ಘ ಪಯಣದಲ್ಲಿ ಯಶಸ್ವಿ ಉದ್ಯಮಿಯಾಗಿ ನಿವೃತ್ತಿ ಜೀವನ ಆರಂಭಿಸಿದ್ದಾರೆ.
20ನೇ ವರ್ಷಾಚರಣೆ ಸಂಭ್ರಮದ ನಡುವೆಯೂ ಜಾಕ್ ಮಾ ಸಂಸ್ಥೆಯ ಉನ್ನತ ಹುದ್ದೆಯನ್ನು ತೊರೆಯುತ್ತಿದ್ದಾರೆ. ಅವರಿಂದ ತೆರವಾದ ಸ್ಥಾನಕ್ಕೆ ಸಿಇಒ ಡೇನಿಯಲ್ ಜಾಂಗ್ ಅವರು ಮುಖ್ಯಸ್ಥರಾಗಿ ನೇಮಕವಾಗಿದ್ದಾರೆ.
ಅಮೆರಿಕ- ಚೀನಾ ವ್ಯಾಪಾರ ಯುದ್ಧದ ಅನಿಶ್ಚಿತತೆಯ ನಡುವೆ ಜಾಕ್ ಮಾ ಅವರು ರಾಜೀನಾಮೆ ನೀಡುತ್ತಿದ್ದಾರೆ. ಇಂಟರ್ನೆಟ್ ದೈತ್ಯ ಅಲಿಬಾಬಾ ಸಂಸ್ಥಾಪಕ ಮಾ ಅವರದ್ದು ಸಂಸ್ಥೆಯೊಂದಿಗೆ ಮಗು- ಪೋಷಕನಂತಹ ಸಂಬಂಧವೆಂದು ಇಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ.
1999ರಲ್ಲಿ ಅಲಿಬಾಬಾ ಆರಂಭಿಸುವುದಕ್ಕೂ ಮೊದಲು ಜಾಕ್ ಅವರು ಇಂಗ್ಲಿಷ್ ಶಿಕ್ಷಕರಾಗಿದ್ದರು. ಇದೀಗ ತಮ್ಮ ನೆಚ್ಚಿನ ಕ್ಷೇತ್ರವಾದ ಶಿಕ್ಷಣದಲ್ಲಿ ತೊಡಗಿಸಿಕೊಳ್ಳಲಿದ್ದಾರೆ. ಆಲಿಬಾಬಾ ಕಂಪನಿಯು ಒಟ್ಟು 2.9 ಲಕ್ಷ ಕೋಟಿ ರೂ. ಮೌಲ್ಯದ (41 ಬಿಲಿಯನ್ ಡಾಲರ್) ಸಂಪತ್ತು ಹೊಂದಿದೆ.
