ಮಂಗಳೂರು: ಕೊರೊನಾ ಸಂಕಷ್ಟದ ಸಮಯದಲ್ಲಿಯೂ ಕ್ಯಾಂಪ್ಕೋ ಸಂಸ್ಥೆ 32 ಕೋಟಿ ಲಾಭ ಗಳಿಸಿದೆ ಎಂದು ಕ್ಯಾಂಪ್ಕೋ ಅಧ್ಯಕ್ಷ ಎಸ್.ಆರ್ ಸತೀಶ್ಚಂದ್ರ ತಿಳಿಸಿದ್ದಾರೆ.
ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕೊರೊನಾ ಸಂದರ್ಭದಲ್ಲಿ ಅಡಕೆ ಬೆಲೆ ಏರಿಕೆ ಕಂಡಿದ್ದು, ಇದೀಗ 400 ರೂ. ಆಸುಪಾಸಿನಲ್ಲಿದೆ. ಕೃಷಿಕರ ಮತ್ತು ಕ್ಯಾಂಪ್ಕೋ ಸಿಬ್ಬಂದಿ ಸೇವೆಯಿಂದ ಈ ಸಾಧನೆ ಸಾಧ್ಯವಾಗಿದೆ ಎಂದರು.
ಕ್ಯಾಂಪ್ಕೋದಿಂದ ನಾನಾ ಮಾದರಿಯ ಚಾಕೊಲೇಟ್ ತಯಾರಿ ನಡೆಯುತ್ತಿದೆ. ಕಳೆದ ವರ್ಷ ಪೆಪ್ಪರ್ ಚಾಕೊಲೇಟ್ ಪರಿಚಯಿಸಲಾಗಿತ್ತು. ಈ ಬಾರಿ ರೋಗನಿರೋಧಕ ಶಕ್ತಿ ಹೆಚ್ಚಿಸುವ ಉದ್ದೇಶದಿಂದ ಅರಿಶಿಣ ಬಳಸಿ ಚಾಕೊಲೇಟ್ ತಯಾರಿಸುವ ಕಾರ್ಯ ಪ್ರಗತಿಯಲ್ಲಿದೆ. ಮುಂದಿನ ಫೆಬ್ರವರಿಯಲ್ಲಿ ಈ ಚಾಕೊಲೇಟ್ ಮಾರುಕಟ್ಟೆಗೆ ಬಿಡುಗಡೆಗೊಳಿಸಲಾಗುವುದು ಎಂದು ತಿಳಿಸಿದರು.
ಕ್ಯಾಂಪ್ಕೋ ಈ ಬಾರಿ 1,848 ಕೋಟಿಗಳ ಬೃಹತ್ ವಹಿವಾಟು ದಾಖಲಿಸಿದೆ. ಈ ಸಹಕಾರಿ ಸಂಸ್ಥೆ 1430.43 ಕೋಟಿ ರೂಪಾಯಿ ಮೌಲ್ಯದ 48,29,493 ಮೆಟ್ರಿಕ್ ಟನ್ ಅಡಕೆಯನ್ನು ಖರೀದಿಸಿದೆ. 1535.38 ಕೋಟಿ ರೂಪಾಯಿ ಮೌಲ್ಯದ 51,33,551 ಮೆಟ್ರಿಕ್ ಟನ್ ಅಡಕೆಯನ್ನು ಮಾರಾಟ ಮಾಡಿದೆ ಎಂದರು.
