ನವದೆಹಲಿ: ಏರ್‌ಇಂಡಿಯಾದ ಚೆಕ್ಇನ್ ಸಾಫ್ಟ್ವೇರ್ ಶನಿವಾರ ಬೆಳಿಗ್ಗೆ 5 ಗಂಟೆಗಳ ಕಾಲ ಸ್ಥಗಿತಗೊಂಡ ಪರಿಣಾಮ ದೇಶಾದ್ಯಂತ 137 ವಿಮಾನಗಳ ಹಾರಾಟದಲ್ಲಿ ವಿಳಂಬವಾಗಿದ್ದು, ಭಾನುವಾರವೂ ಈ ವಿಳಂಬ ಮುಂದುವರಿದಿದೆ.
ಶನಿವಾರ ಬೆಳಿಗಿನಿಂದಲೇ ಏರ್ ಇಂಡಿಯಾದ ಪ್ಯಾಸೆಂಜರ್ ಸರ್ವಿಸ್ ಸಿಸ್ಟಂ (ಪಿಎಸ್ಎಸ್) ತಂತ್ರಾಂಶ ಸರಿಯಾಗಿ ಕೆಲಸ ಮಾಡದ ಕಾರಣ ಸಾವಿರಾರು ಪ್ರಯಾಣಿಕರು ಸಕಾಲದಲ್ಲಿ ವಿಮಾನ ಸೇವೆ ಲಭ್ಯವಾಗದೆ ತೊಂದರೆ ಅನುಭವಿಸಿದರು. ಇದರಿಂದಾಗಿ ಚೆಕ್-ಇನ್, ಬ್ಯಾಗೇಜ್ ಹಾಗೂ ರಿಸರ್ವೇಷನ್ ಪ್ರಕ್ರಿಯೆಗಳಲ್ಲಿ ವ್ಯತ್ಯಯವಾಗಿತ್ತು. ನಸುಕಿನ 3:30ರಿಂದ 8:45ರ ವರೆಗೆ ಸಾಫ್ಟ್ವೇರ್ನಲ್ಲಿ ಸಮಸ್ಯೆ ಕಾಣಿಸಿಕೊಂಡಿದೆ.
ನಿನ್ನೆಯ ಘಟನೆಗೆ ಇವತ್ತೂ ಕೂಡ 137 ವಿಮಾನಗಳ ಹಾರಾಟದಲ್ಲಿ ಸರಾಸರಿ 197 ನಿಮಿಷಗಳ ಕಾಲ ವಿಳಂಬವಾಗಿದೆ ಎಂದು ಏರ್ ಇಂಡಿಯಾ ವಕ್ತಾರರು ತಿಳಿಸಿದ್ದಾರೆ.
ಒಂದು ವಿಮಾನ ಹಾರಾಟ ಒಂದು ಸೆಕ್ಟರ್ನಲ್ಲಿ ವಿಳಂಬವಾದರೆ ಎರಡು ಮತ್ತು ಮೂರನೇ ಸೆಕ್ಟರ್ಗಳಲ್ಲೂ ಅದರ ಪರಿಣಾಮವಿರುತ್ತದೆ. ಉದಾಹರಣೆಗೆ ದೆಹಲಿ- ಮುಂಬೈ ಒಂದು ಸೆಕ್ಟರ್, ಮುಂಬೈ- ಬೆಂಗಳೂರು ಮತ್ತೊಂದು ಸೆಕ್ಟರ್, ಬೆಂಗಳೂರು- ಚೆನ್ನೈ ಮೂರನೇ ಸೆಕ್ಟರ್ ಎಂದು ಪರಿಗಣಿಸಲಾಗುತ್ತದೆ.
ಏರ್ ಇಂಡಿಯಾ ಸಮೂಹದ ಅಲಾಯನ್ಸ್ ಏರ್ ಹಾಗೂ ಏರ್ ಇಂಡಿಯಾ ಎಕ್ಸ್ಪ್ರೆಸ್ ಸೇರಿದಂತೆ 674 ವಿಮಾನಗಳು ನಿತ್ಯ ಹಾರಾಟ ನಡೆಸುತ್ತಿವೆ.
