ನವದೆಹಲಿ: ರೀಚಾರ್ಜ್, ಒಟಿಟಿ, ಡಿಟಿಎಚ್ ಮತ್ತು ಯುಟಿಲಿಟಿ ಬಿಲ್‌ ಸೇರಿದಂತೆ ವಿವಿಧ ಸೇವೆಗಳಿಗೆ ಗ್ರಾಹಕರು ಸ್ವಯಂಚಾಲಿತ ಮರುಪಾವತಿಯ ಹೆಚ್ಚುವರಿ ನಿಯಮ ಅನುಷ್ಠಾನವನ್ನು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (ಆರ್‌ಬಿಐ) ಮುಂದೂಡಿಕೆ ಮಾಡಿದೆ.
ಸ್ವಯಂಚಾಲಿತ ಪಾವತಿಗಳಿಗೆ ಹೆಚ್ಚುವರಿ ಪ್ರಮಾಣೀಕರಣ (ಎಎಫ್‌ಎ) ಕಡ್ಡಾಯಗೊಳಿಸುವ ಹೊಸ ಮಾರ್ಗಸೂಚಿಗಳ ಜಾರಿಯನ್ನು ಈ ವರ್ಷದ ಸೆಪ್ಟೆಂಬರ್ 30ರವರೆಗೆ ವಿಸ್ತರಣೆ ಮಾಡಲಾಗಿದೆ. ಇದನ್ನು ಆರ್‌ಬಿಐ ಬುಧವಾರ ಬಹಿರಂಗಪಡಿಸಿದೆ.
ಸ್ವಯಂಚಾಲಿತ ಮರುಕಳಿಸುವ ಪಾವತಿಗಳಿಗಾಗಿ ಗ್ರಾಹಕರಿಂದ ಹೆಚ್ಚುವರಿ ಪ್ರಮಾಣೀಕರಣ ಕಡ್ಡಾಯಗೊಳಿಸುವಂತೆ ಆರ್‌ಬಿಐ ಹೊಸ ಮಾರ್ಗಸೂಚಿಗಳನ್ನು ಹೊರಡಿಸಿತ್ತು. ಕಳೆದ ವರ್ಷ ಡಿಸೆಂಬರ್ 4ರಂದು ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಆರ್‌ಆರ್‌ಬಿಗಳು, ಎನ್‌ಬಿಎಫ್‌ಸಿಗಳು ಮತ್ತು ಪಾವತಿ ಗೇಟ್‌ವೇಗಳು ಸೇರಿದಂತೆ ಬ್ಯಾಂಕ್ಗಳಿಗೆ ಮಾರ್ಚ್ 31ರ ನಂತರ ಎಎಫ್‌ಎಗೆ (ಹೆಚ್ಚುವರಿ ಅಂಶದ ದೃಢೀಕರಣ) ಒಳಪಟ್ಟು ಕಾರ್ಡ್, ಪ್ರಿಪೇಯ್ಡ್ ಪಾವತಿ ವಿಧಾನ ಮತ್ತು ಯುಪಿಐಗಳನ್ನು ಬಳಸಿಕೊಂಡ ಪಾವತಿಗಳನ್ನು ಸ್ಥಗಿತಗೊಳಿಸುವಂತೆ ನಿರ್ದೇಶಿಸಿತ್ತು.
ಇದನ್ನೂ ಓದಿ: ಏಪ್ರಿಲ್ನಲ್ಲಿ ಬ್ಯಾಂಕ್ಗಳಿಗೆ ಸಾಲು ಸಾಲು ರಜೆಗಳು.. ಅವುಗಳ ಸಂಪೂರ್ಣ ಪಟ್ಟಿ ಇಲ್ಲಿದೆ
ಕಾರ್ಡ್ ವಹಿವಾಟಿನ ಸುರಕ್ಷತೆ ಮತ್ತು ರಕ್ಷಣೆ ಬಲಪಡಿಸಲು ಈ ಕ್ರಮಗಳನ್ನು ಕೈಗೊಂಡಿದೆ ಎಂದು ಆರ್‌ಬಿಐ ಈ ಹಿಂದೆ ಹೇಳಿತ್ತು. ಹೊಸ ನಿಯಮಗಳ ಪ್ರಕಾರ, ಸ್ವಯಂಚಾಲಿತ ಪಾವತಿಗಳನ್ನು 5000 ರೂ. ಮೀರಿದರೇ ಬ್ಯಾಂಕ್ಗಳು, ಎನ್‌ಬಿಎಫ್‌ಸಿಗಳು, ಪಾವತಿ ಗೇಟ್‌ವೇಗಳು ಪಾವತಿಸುವವರಿಗೆ ಒಟಿಪಿ ಕಳುಹಿಸಬೇಕಾಗುತ್ತದೆ. ಅವರ ಅನುಮೋದನೆ ಪಡೆದ ನಂತರ ತಮ್ಮ ವ್ಯವಹಾರ ಪೂರ್ಣಗೊಳಿಸಬೇಕಾಗುತ್ತದೆ. ಇಲ್ಲದಿದ್ದರೆ ಅಂತಹ ಪಾವತಿಗಳನ್ನು ಅನುಮತಿಸಲಾಗುವುದಿಲ್ಲ. ಈ ಮೊದಲು 2,000 ರೂ. ಮೀರಿದ ಎಲ್ಲಾ ವಹಿವಾಟುಗಳಿಗೆ ಸೀಮಿತಗೊಳಿಸಲು ಆರ್‌ಬಿಐ ಉದ್ದೇಶಿಸಿತ್ತು.
ಹೊಸ ಮಾರ್ಗಸೂಚಿಗಳನ್ನು ಕಾರ್ಯಗತಗೊಳಿಸಲು ಸ್ವಲ್ಪ ಸಮಯ ತೆಗೆದುಕೊಳ್ಳುವಂತೆ ಬ್ಯಾಂಕ್ಗಳು ಮತ್ತು ಪಾವತಿ ಗೇಟ್‌ವೇಗಳು ಕೇಂದ್ರ ಬ್ಯಾಂಕ್ಗೆ ಮನವಿ ಮಾಡಿದ್ದವು. ಅವಗಳ ಕೋರಿಕೆ ಮನ್ನಿಸಿ ಆರ್‌ಬಿಐ ಸೆಪ್ಟೆಂಬರ್ 30ರ ತನಕ ಗಡುವು ನೀಡಿದೆ. ಅಲ್ಲಿಯವರೆಗೆ ಸ್ವಯಂಚಾಲಿತ ಪಾವತಿಗಳು ಎಂದಿನಂತೆ ಮುಂದುವರಿಯುತ್ತದೆ.
