ನವದೆಹಲಿ : ಯುವಕರ ಫೇವರೆಟ್ ಮೊಬೈಲ್ ಗೇಮ್ PUBG ಈ ವರ್ಷದ ಪ್ರಥಮಾರ್ಧದಲ್ಲೇ $1.3 ಬಿಲಿಯನ್ (ಸರಿಸುಮಾರು 9,731 ಕೋಟಿ ರೂ.) ಆದಾಯ ಗಳಿಸಿದೆ.
ಇದು ತನ್ನ ಈವರೆಗಿನ ಗಳಿಕೆಯನ್ನು $3 ಬಿಲಿಯನ್ (ಸುಮಾರು 22,457 ಕೋಟಿ ರೂ.)ಗೆ ಏರಿಸಿಕೊಂಡಿದೆ. ವಿಶೇಷ ಅಂದರೆ ಭಾರತದಲ್ಲೇ ಈ ಆ್ಯಪ್ ಅತಿ ಹೆಚ್ಚು ಡೌನ್ಲೋಡ್ ಆಗಿದ್ದು, ಹದಿನೇಳುವರೆ ಕೋಟಿ(17 ಕೋಟಿ 50 ಲಕ್ಷ) ಜನರು ಪಬ್ಜಿ ಇನ್‌ಸ್ಟಾಲ್ ಮಾಡಿಕೊಳ್ಳುವ ಮೂಲಕ ಆ್ಯಪ್ ಅಗ್ರಸ್ಥಾನದಲ್ಲಿದೆ.
ಕೊರೊನಾ ಲಾಕ್‌ಡೌನ್‌ನಿಂದಾಗಿ ಜನರು ಮನೆಯಲ್ಲಿಯೇ ಇರುವುದರಿಂದ, PUBG ಇನ್‌ಸ್ಟಾಲ್ ಮಾಡಿ ಗೇಮ್ ಆಡುತ್ತಿರುವವರ ಸಂಖ್ಯೆ ಹೆಚ್ಚಿದೆ. ಹೀಗಾಗಿ ಪಬ್ಜಿ ಆದಾಯವು ಮಾರ್ಚ್‌ನಲ್ಲಿ ದಾಖಲೆಯ ಮಟ್ಟ, ಅಂದರೆ $ 270 ಮಿಲಿಯನ್ (ಸುಮಾರು 2,021 ಕೋಟಿ ರೂ.) ತಲುಪಿದೆ ಎಂದು ವಿಶ್ಲೇಷಣಾ ಸಂಸ್ಥೆ ಸೆನ್ಸಾರ್ ಟವರ್‌ ಬಹಿರಂಗಪಡಿಸಿದೆ.
ಇತ್ತೀಚೆಗೆ ಭಾರತದಲ್ಲಿ ಚೀನಾ ಮೂಲದ 59 ಆ್ಯಪ್ಗಳನ್ನು ನಿಷೇಧಿಸಲಾಯ್ತು. ಈ ವೇಳೆ PUBG ಆ್ಯಪ್ ನಿಷೇಧಿಸಿಲ್ಲ. ಇದು ಸಂಪೂರ್ಣ ಚೀನಾ ಮೂಲದ ಆ್ಯಪ್ ಅಲ್ಲ. ದಕ್ಷಿಣ ಕೊರಿಯಾದ ಸಂಸ್ಥೆಯಾದ ಬ್ಲೂಹೋಲ್, ಈ ಗೇಮ್‌ನ ರಚಿಸಿ ನಿರ್ವಹಿಸುತ್ತಿದೆ.
PUBG ಜನಪ್ರಿಯವಾದ ನಂತರ ಚೀನಾ ಸಂಸ್ಥೆಯಾದ ಟೆನ್ಸೆಂಟ್, ಚೀನಾದಲ್ಲಿ ಉತ್ಪನ್ನವನ್ನು ಮಾರುಕಟ್ಟೆಗೆ ತರಲು ಬ್ಲೂಹೋಲ್‌ನೊಂದಿಗೆ ಕೈಜೋಡಿಸಿತು. ಜೊತೆಗೆ ಅದರ ವಿತರಣೆಯ ಹೆಚ್ಚಿನ ಭಾಗವನ್ನು ನಿರ್ವಹಿಸಲು ಪ್ರಾರಂಭಿಸಿತು. ಈ ಗೇಮ್‌ನ ಟೆನ್ಸೆಂಟ್ ಹೋಲ್ಡಿಂಗ್ಸ್ ಭಾರತದಲ್ಲಿ ವಿತರಿಸಿದೆ. ಇದು ಸಂಪೂರ್ಣ ಚೀನಾ ಮೂಲದ ಕಂಪನಿ ಅಲ್ಲ. ಅದರ ಸಹ ಮಾಲೀಕತ್ವದ ಕಾರಣ ಭಾರತದಲ್ಲಿ ನಿಷೇಧಿತ ಆ್ಯಪ್ಗಳ ಪಟ್ಟಿಯಲ್ಲಿ ಪಬ್ಜಿ ಇಲ್ಲ.
