ಪುಣೆ: ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್ಗೆ (ಪಿಎನ್ಬಿ) ₹ 7,200 ಕೋಟಿ ಮೀರಿದ ಅಧಿಕ ಬಡ್ಡಿಯನ್ನು ಪಾವತಿಸುವಂತೆ ಸಾಲ ವಸೂಲಾತಿ ನ್ಯಾಯ ಮಂಡಳಿಯು (ಡಿಆರ್ಟಿ) ದೇಶ ಭ್ರಷ್ಟ ಆರ್ಥಿಕ ಅಪರಾಧಿ ನೀರವ್ ಮೋದಿ ಹಾಗೂ ಆತನ್ ಸಹಚರರಿಗೆ ಆದೇಶಿಸಿದೆ.
ಸದ್ಯ ನೀರವ್, ಲಂಡನ್ ಜೈಲಿನಲ್ಲಿ ವಿಚಾರಣಾ ಖೈದಿಯಾಗಿದ್ದಾರೆ. ಹೆಚ್ಚಿನ ವಿಚಾರಣೆಗೆ ಭಾರತಕ್ಕೆ ಹಸ್ತಾಂತರಿಸುವಂತೆ ಜಾರಿ ನಿರ್ದೇಶನಾಲಯ (ಇಡಿ) ಲಂಡನ್ ಕೋರ್ಟ್ಗೆ ಮನವಿ ಸಲ್ಲಿಸಿಕೊಂಡು ಬರುತ್ತಿದ್ದು, ಈತನಿಗಾಗಿ ಮುಂಬೈನಲ್ಲಿ ಜೈಲು ಕೋಣೆಯನ್ನೂ ಸಿದ್ಧಪಡಿಸಿದೆ.
ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್ಗೆ ₹ 13,500 ಕೋಟಿ ವಂಚನೆ ಎಸಗಿ ವಿದೇಶಕ್ಕೆ ಪರಾರಿಯಾಗಿ ಪ್ರಸ್ತುತ ಲಂಡನ್ ಜೈಲಿನಲ್ಲಿರುವ ನೀರವ್ ಮೋದಿ ಹಾಗೂ ಸಹಚರರು ಪಿಎನ್‌ಬಿಗೆ ₹ 7,200 ಕೋಟಿಗೂ ಅಧಿಕ ಮೊತ್ತದ ಬಡ್ಡಿಯನ್ನು ಪಾವತಿಸಬೇಕಿದೆ.
ಮುಂಬೈನ ಸಾಲ ವಸೂಲಾತಿ ಅಧಿಕಾರಿಯಾಗಿ ಹೆಚ್ಚುವರಿ ಹೊಣೆಗಾರಿಕೆ ಹೊಂದಿರುವ ಪ್ರಿಸೈಡಿಂಗ್‌ ಅಧಿಕಾರಿ ದೀಪಕ್‌ ಠಕ್ಕರ್‌ ಅವರು, ಎರಡು ಪ್ರಕರಣಗಳಿಗೆ ಸಂಬಂಧಿಸಿದಂತೆ ಪಿಎನ್ಬಿ ಪರವಾಗಿ ಎರಡು ಆದೇಶಗಳನ್ನು ಹೊರಡಿಸಿದ್ದಾರೆ.
