ನವದೆಹಲಿ: ಪೂರ್ವ ಲಡಾಖ್ನ ಗಾಲ್ವಾನ್ ಕಣಿವೆಯಲ್ಲಿ ನಡೆದ ಸಂಘರ್ಷದಲ್ಲಿ 22 ಭಾರತೀಯ ಯೋಧರು ಹುತಾತ್ಮರಾದ ಬಳಿಕ ಚೀನಾ ಉತ್ಪನ್ನಗಳನ್ನು ಬಹಿಷ್ಕಾರ ಮಾಡುವಂತೆ ದೇಶದೆಲ್ಲೆಡೆ ಕೂಗು ಕೇಳಿ ಬಂದಿತ್ತು. ಇದರ ಬೆನ್ನಲ್ಲೇ ರಾಷ್ಟ್ರೀಯ ಭದ್ರತೆ ಮತ್ತು ಗೌಪ್ಯತೆ ದೃಷ್ಟಿಯಿಂದ ಭಾರತ ಸರ್ಕಾರ ಸೋಮವಾರ ಟಿಕ್ ಟಾಕ್, ಯುಸಿ ಬ್ರೌಸರ್ ಸೇರಿದಂತೆ ಚೀನಾದ 59 ಆ್ಯಪ್ಗಳನ್ನು ಬ್ಯಾನ್ ಮಾಡಿ ಆದೇಶ ನೀಡಿದೆ. ಆದರೂ ಹಲವಾರು ಜನಪ್ರಿಯ ಆ್ಯಪ್ಗಳು ಈ ಪಟ್ಟಿಯಲ್ಲಿಲ್ಲ.
ಭಾರತದಲ್ಲಿ ಬ್ಯಾನ್ ಆಗದ ಚೀನಾ ಆ್ಯಪ್ಗಳು:
- ಪಬ್ಜಿ ಮೊಬೈಲ್ (PUBG Mobile)
- ಎಂವಿ ಮಾಸ್ಟರ್ (MV Master)
- ಅಲಿ ಎಕ್ಸ್ಪ್ರೆಸ್ ( AliExpress)
- ಟರ್ಬೊ ವಿಪಿಎನ್ (TurboVPN)
- ಡೊಮೊಬೈಲ್ನ ಆ್ಯಪ್ಲಾಕ್ (App Lock by DoMobile)
- ರೋಜ್ ಬುಜ್ ವಿ ಮೀಡಿಯಾ (Rozz Buzz we media)
- 360 ಸೆಕ್ಯುರಿಟಿ ( 360 Security)
- ಆ್ಯಪ್ಲಾಕ್ಸ್ (App locks)
- ನೊನೊ ಲೈವ್ (Nono live)
- ಗೇಮ್ ಆಫ್ ಸುಲ್ತಾನ್ಸ್ (Game of Sultans)
- ಮಾಫಿಯಾ ಸಿಟಿ (Mafia City)
- ಬ್ಯಾಟಲ್ ಆಫ್ ಎಂಪೈರ್ಸ್ (Battle of Empires)
ಭಾರತದ ಸಾರ್ವಭೌಮತ್ವ, ರಕ್ಷಣೆ, ಭದ್ರತೆ ಹಾಗೂ ಸಾರ್ವಜನಿಕ ಸುವ್ಯವಸ್ಥೆಗೆ ಧಕ್ಕೆಯಾಗುವಂತಹ ಚಟುವಟಿಕೆಗಳಲ್ಲಿ ತೊಡಗಿರುವ ಕಾರಣ 59 ಆ್ಯಪ್ಗಳನ್ನು ನಿಷೇಧಿಸಲಾಗಿದೆ ಎಂದು ಕೇಂದ್ರ ಪ್ರಸಾರ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು ಸ್ಪಷ್ಟನೆ ನೀಡಿದೆ.
ಭಾರತದಲ್ಲಿ ವಿವಾದಾತ್ಮಕ PUBG ಏಕೆ ನಿಷೇಧವಾಗಿಲ್ಲ?
ಪಬ್ಜಿ, ಸಂಪೂರ್ಣವಾಗಿ ಚೀನಾ ಆ್ಯಪ್ ಅಲ್ಲ. ದಕ್ಷಿಣ ಕೊರಿಯಾದ ಬ್ಲೂ ಹೋಲ್ ಎಂಬ ಕಂಪನಿ ಇದನ್ನು ರಚಿಸಿ, ನಿರ್ವಹಿಸುತ್ತಿತ್ತು. ಆದರೆ PUBG ಜನಪ್ರಿಯವಾದ ಬಳಿಕ ಬ್ಲೂ ಹೋಲ್ ಜೊತೆ ಚೀನಾ ಕಂಪನಿ ಟೆನ್ಸೆಂಟ್ ಕೈಜೋಡಿಸಿತು. ಆನಂತರ ಪಬ್‌ಜಿಯ ಹೆಚ್ಚಿನ ನಿರ್ವಹಣೆಯನ್ನು ಚೀನಾ ವಹಿಸಿಕೊಂಡಿತು. ಹೀಗಾಗಿ ಸದ್ಯ ಪಬ್ಜಿ ಜಂಟಿ ಮಾಲೀಕತ್ವದಲ್ಲಿರುವುದರಿಂದ ಭಾರತ ಸರ್ಕಾರ ಇದನ್ನು ನಿಷೇಧಿಸುವ ನಿರ್ಧಾರ ಇನ್ನೂ ತೆಗೆದುಕೊಂಡಿಲ್ಲ.
ಇದು ಪಬ್ಜಿ ವಿಷಯವಾದರೆ ಉಳಿದ ಈ ಮೇಲಿನ ಆ್ಯಪ್ಗಳು ಬ್ಯಾನ್ ಆಗದಿರಲು ಕೆಲ ಕಾರಣಗಳಿವೆ. ಈ ಆ್ಯಪ್ಗಳು ಬಳಕೆದಾರರ ಸುರಕ್ಷತೆಗೆ ಅಪಾಯವನ್ನುಂಟುಮಾಡಲಿಲ್ಲ. ಆದರೂ ಈ ಅಪ್ಲಿಕೇಶನ್‌ಗಳನ್ನು ಪರಿಶೀಲಿಸಲಾಗುತ್ತಿದ್ದು, ಮುಂದೆ ಇದನ್ನು ನಿಷೇಧಿಸುವ ಸಾಧ್ಯತೆಗಳಿವೆ.
