ಮಾರುಕಟ್ಟೆಯ ಮುನ್ನೋಟ... ಆ ಐದು ಅಂಶಗಳ ಮೇಲೆ ಗೂಳಿ- ಕರಡಿ ಜಿದ್ದಾಜಿದ್ದಿ

ಲೋಕಸಭೆಯ ಸಾರ್ವತ್ರಿಕ ಚುನಾವಣೆಯ ಪ್ರಚಾರದ ಕಾವು ಉತ್ತುಂಗಕ್ಕೇರಿದ್ದು, ರಾಜಕೀಯ ಚಟುವಟಿಕೆಗಳ ಮೇಲೆ ಹೂಡಿಕೆದಾರರು ಕಣ್ಣಿಟ್ಟಿದ್ದಾರೆ. ಇದರ ಜೊತೆಗೆ, ಎಫ್&ಒ ಎಕ್ಸ್​ಪೈರಿ, ಜಾಗತಿಕ ಆರ್ಥಿಕ ಭಾವನೆ, ವಿದೇಶಿ ಸಾಂಸ್ಥಿಕ ಒಳಹರಿವು ಮತ್ತು ಬೃಹತ್ ಆರ್ಥಿಕತೆಯ ಅಂಕಿಸಂಖ್ಯೆ ಸೇರಿದಂತೆ ಇತರ ಅಂಶಗಳು ಮುಂದಿನ ವಾರದ ಮಾರುಕಟ್ಟೆಯ ಮನಸ್ಥಿತಿಯನ್ನು ಪ್ರಭಾವಿಸಲಿವೆ.

ಮುಂಬೈ: ಅಮೆರಿಕದ ಫೆಡರಲ್​ ರಿಸರ್ವ್​ ಬಡ್ಡಿ ದರದ ನಿರ್ಧಾರ, ಬ್ರೆಕ್ಸಿಟ್​ ಒಪ್ಪಂದದ ಬೆಳವಣಿಗೆ ಮತ್ತು ಡಾಲರ್ ಎದುರು ಬಲವರ್ಧನೆಗೊಂಡ ರೂಪಾಯಿ ಮೌಲ್ಯ ಸೇರಿದಂತೆ ಇತರೇ ಅಂಶಗಳನ್ನು ಅನುಸರಿಸಿದ್ದ ಭಾರತೀಯ ಷೇರು ಮಾರುಕಟ್ಟೆಯು ಕಳೆದ ವಾರ ಭಾರಿ ಏರಿಕೆ ಕಂಡಿತ್ತು. ಇಂತಹದೆ ಐದು ಅಂಶಗಳು ಗೂಳಿ- ಕರಡಿಯ ಜಿದ್ದಾಜಿದ್ದಿಗೆ ಮುಂದಿನ ವಾರದ ಪೇಟೆ ವೇದಿಕೆ ಆಗಲಿದೆ.

ಎಫ್&ಒ ಎಕ್ಸ್​ಪೈರಿ:
ದೇಶಿಯ ಮಾರುಕಟ್ಟೆಯಲ್ಲಿ ವಾರದ ಹಿಂದೆ ಚಂಚಲತೆಯ ಸ್ಪರ್ಧೆಯೊಡ್ಡಿದ್ದ ಮಾರ್ಚ್​ ಸರಣಿಯ ಫ್ಯೂಚರ್​ ಆ್ಯಂಡ್​ ಆಪ್ಷನ್ಸ್ (ಎಫ್&ಒ)​ ಕರಾರು​ ಗುರುವಾರ ಮುಕ್ತಾಯವಾಗಲಿದೆ. ಹೀಗಾಗಿ, ಹೂಡಿಕೆದಾರರು ಏಪ್ರಿಲ್​ ಸರಣಿಯ ಮೇಲೆ ನಿಗಾವಹಿಸಿದ್ದಾರೆ. ಶುಕ್ರವಾರದ ಪೇಟೆಯಲ್ಲಿ ನಿಫ್ಟಿ ಶೇ 0.65ರಷ್ಟು ಕುಸಿತಕಂಡು, 11,478 ಅಂಶಗಳಲ್ಲಿ ವಹಿವಾಟು ನಡೆಸಿತ್ತು. ನಿಫ್ಟಿ ಮುಂದಿನ ವಾರ ಕನಿಷ್ಠ 11,222 ಹಾಗೂ ಗರಿಷ್ಠ 11,600 ಅಂಶಗಳ ನಡುವೆ ವಹಿವಾಟು ನಡೆಸಬಹುದೆಂದು ಅಂದಾಜಿಸಲಾಗಿದೆ.

ಬೃಹತ್​ ಆರ್ಥಿಕತೆದತ್ತಾಂಶ ಬಿಡುಗಡೆ:
ಮುಂದಿನ ವಾರದಲ್ಲಿ ಪ್ರಸ್ತುತ ದೇಶದ ಆರ್ಥಿಕತೆಯ ಕುರಿತ ಎರಡು ದತ್ತಾಂಶಗಳ ವರದಿ ಹೊರಬರಲಿವೆ. ಫೆಬ್ರವರಿ ತಿಂಗಳ ಹಣಕಾಸು ಕೊರತೆ ಮತ್ತು ಮೂಲಭೂತ ಸೌಕರ್ಯಗಳ ಡೇಟಾ ಮಾಹಿತಿ ಶುಕ್ರವಾರ ಬಿಡುಗಡೆಯಾಗಲಿದೆ. ಕಚ್ಚಾ ತೈಲ, ನೈಸರ್ಗಿಕ ಅನಿಲ, ಶುದ್ಧೀಕರಣದ ಉತ್ಪನ್ನಗಳು, ರಸಗೊಬ್ಬರ, ಉಕ್ಕು, ಸಿಮೆಂಟ್ ಮತ್ತು ವಿದ್ಯುತ್​ನಂತಹ ಎಂಟು ಮೂಲಸೌಕರ್ಯ ವಲಯಗಳು ಜನವರಿಯಲ್ಲಿ ಶೇ1.8ರಷ್ಟು ಅಲ್ಪ ಪ್ರಮಾಣದ ಏರಿಕೆ ಕಂಡಿದ್ದವು. ಅದರಲ್ಲಿ ಮುಖ್ಯವಾಗಿ ಕಚ್ಚಾ ತೈಲ, ಶುದ್ಧೀಕರಣದ ಉತ್ಪನ್ನ ಮತ್ತು ಇಂಧನ ವಲಯ ಕುಸಿತ ಕಂಡಿದ್ದವು. ನಾಲ್ಕನೇ ತ್ರೈಮಾಸಿಕದ ದತ್ತಾಂಶದಲ್ಲಿ ವಿದೇಶಿ ಸಾಲ ಮತ್ತು ಚಾಲ್ತಿ ಖಾತೆಗಳ ಡೇಟಾ ಸಹ ಮಾರುಕಟ್ಟೆಯ ಗಮನ ಸೆಳೆಯಲಿದೆ.

ಷೇರು ಮಾರುಕಟ್ಟೆ

ಚೀನಾ- ಅಮೆರಿಕದ ಹೊಸ ಬೆಳವಣಿಗೆ:
ಸೇಡಿಗೆ ಸೇಡು ಎಂಬಂತೆ ಆಮದು ಸರಕುಗಳ ಪರಸ್ಪರ ನಿರ್ಬಂಧನೆಯ ನಿಲುವಿಗೆ ಸಡ್ಡು ಹೊಡೆದಿದ್ದ ಚೀನಾ- ಅಮೆರಿಕ, ತಮ್ಮ ವಾಣಿಜ್ಯ ಸಮರದ ಧೋರಣೆಯನ್ನು ಬದಿಗೊತ್ತಿ ನೂತನ ವ್ಯಾಪಾರ ಮಾತುಕತೆ ಇದೇ ಗುರುವಾರ ನಡೆಯಲಿದೆ. ಎರಡೂ ರಾಷ್ಟ್ರಗಳು ತಮ್ಮ ವ್ಯಾಪಾರದಲ್ಲಿನ ವೈರತ್ವ ಸಮನಗೊಳಿಸಿಕೊಳ್ಳಲು ಮುತೂವರ್ಜಿ ತೋರುತ್ತಿವೆ. ಹೊಸ ಸುತ್ತಿನ ಮಾತುಕತೆ ನೂತನ ದಿಕ್ಕಿನತ್ತ ಸಾಗಲಿದೆ ಎಂಬ ವಿಶ್ವಾಸ ಜಾಗತಿಕ ಷೇರುಪೇಟೆಗಳ ಹೂಡಿಕೆದಾರರಲ್ಲಿ ಮೂಡಿದೆ.

ಬ್ರೆಕ್ಸಿಟ್ ಒಪ್ಪಂದ ಮತಯಾಚನೆ:
ಯುರೋಪಿಯನ್ ಒಕ್ಕೂಟದಿಂದ (ಇಯು) ಹೊರಬರುವ ಬ್ರಿಕ್ಸಿಟ್​ ಒಪ್ಪಂದವನ್ನು ಅಂಗೀಕರಿಸುವಂತೆ ಮುಂದಿನ ವಾರ ಸಂಸತ್ತಿನಲ್ಲಿ ಮತಯಾಚನೆ ಮಾಡುವುದಿಲ್ಲ. ಒಪ್ಪಂದವನ್ನು ಮತ್ತೆ ಸಂಸತ್​ನಲ್ಲಿ ಮಂಡಿಸುತ್ತೇನೆ. ಸಾಕಷ್ಟು ಬೆಂಬಲ ದೊರತರೆ ಸ್ಪೀಕರ್ ಅವರ ಅಂಗೀಕಾರ ಪಡೆಯುದಾಗಿ ಬ್ರಿಟನ್ ಪ್ರಧಾನಿ ಸ್ಪಷ್ಟಪಡಿಸಿದ್ದಾರೆ. ಈ ಒಪ್ಪಂದ ವಿಫಲವಾದರೇ ಹಲವು ಸಾಧ್ಯತೆಗಳು ತೆರೆದುಕೊಳ್ಳಲಿದೆ. ಇದರ ಮಧ್ಯೆ ಬ್ರಿಕ್ಸಿಟ್​ ಕುರಿತು ಹೊಸ ಜನಾಭಿಪ್ರಾಯ ಸಂಗ್ರಹಿಸುವಂತೆ 10 ಲಕ್ಷ ಜನರು ಶನಿವಾರ ಲಂಡನ್​ ಸ್ಟ್ರೀಟ್​ನಲ್ಲಿ ಪಥಸಂಚಲನ ನಡೆಸಿದರು.

ಕಚ್ಚಾ ತೈಲ ದರ:
ನಿಧಾನಗತಿಯ ಜಾಗತಿಕ ಆರ್ಥಿಕತೆ ಹಾಗೂ ತೈಲ ಬೇಡಿಕೆಯ ಇಳಿಕೆಯ ಕಳವಳದಿಂದ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಶುಕ್ರವಾರದಂದು ಕಚ್ಚಾ ತೈಲ ದರ ಶೇ 2ರಷ್ಟು ಕುಸಿತವಾಯಿತು. ಶೇ 80ರಷ್ಟು ತೈಲವನ್ನು ಸಾಗರೋತ್ತರವಾಗಿ ಆಮದು ಮಾಡಿಕೊಳ್ಳುವ ಭಾರತ, ತೈಲ ಬೆಲೆ ನಿರ್ಧಾರ ದೇಶದ ಆರ್ಥಿಕತೆಯ ಅಂಕಗಣಿತದ ಮೇಲೆ ನೇರ ಸಂಬಂಧ ಹೊಂದಿದೆ. ಇಂಧನ ಬೆಲೆ ಕುಸಿತವಾದರೇ ದೇಶಿ ಮಾರುಕಟ್ಟೆಗೆ ವಿದೇಶಿ ಬಂಡವಾಳ ಹರಿದು ಬರಬಹುದು ಎಂದು ನಿರೀಕ್ಷಿಸಲಾಗಿದೆ. ಹೀಗಾಗಿ, ಇದು ಕೂಡು ಪೇಟೆಯ ಏರಿಳಿತಕ್ಕೆ ಕಾರಣವಾಗಲಿದೆ.