ಲಂಡನ್: ಸ್ಪಿನ್ ಬಲದಿಂದ ದಕ್ಷಿಣ ಆಫ್ರಿಕಾ ತಂಡವನ್ನು ಬಗ್ಗುಬಡಿದಿದ್ದ ಬಾಂಗ್ಲಾ ಹುಲಿಗಳನ್ನು ನ್ಯೂಜಿಲೆಂಡ್ ತಂಡ 2 ವಿಕೆಟ್ಗಳಿಂದ ಮಣಿಸಿ ಸತತ ಎರಡನೇ ಪಂದ್ಯದಲ್ಲಿ ಜಯ ಸಾಧಿಸಿದೆ.
ಕಿಂಗ್ಟನ್ ಓವೆಲ್ನಲ್ಲಿ ನಡೆದ 12ನೇ ಆವೃತ್ತಿಯ ವಿಶ್ವಕಪ್ನ 9ನೇ ಪಂದ್ಯದಲ್ಲಿ ಟಾಸ್ ಗೆದ್ದ ಕಿವೀಸ್ ಬೌಲಿಂಗ್ ಆಯ್ದುಕೊಂಡಿತ್ತು. ಬ್ಯಾಟಿಂಗ್ ಇಳಿದ ಬಾಂಗ್ಲದೇಶ ಕಿವೀಸ್ ಬೌಲರ್ಗಳ ಎದುರು ರನ್ ಗಳಿಸಲು ಪರದಾಡಿ 244 ರನ್ಗಳಿಗೆ ಸರ್ವಪತನ ಕಂಡಿತ್ತು.
ಆರಂಭಿಕರಾಗಿ ಕಣಕ್ಕಿಳಿದಿದ್ದ ತಮೀಮ್ 24, ಸೌಮ್ಯ ಸರ್ಕಾರ್ 25 ರನ್ಗಳಿಸಲಷ್ಟೇ ಶಕ್ತರಾದರು. ನಂತರ ಬಂದ ಶಕಿಬ್ 64 ರನ್ ಗಳಿಸಿ ತಂಡವನ್ನು ಕುಸಿತದಿಂದ ಪಾರು ಮಾಡಿದರು. ಇವರಿಗೆ ಸಾಥ್ ನೀಡಿದ ರಹೀಮ್ 19, ಮಿಥುನ್ 26, ಮಹಮ್ಮದುಲ್ಹಾ 20 ಹಾಗೂ ಕೊನೆಯಲ್ಲಿ ಅಬ್ಬರಿಸಿದ ಮೊಹಮ್ಮದ್ ಸೈಫುದ್ದೀನ್ 29 ರನ್ ಗಳಿಸಿ 244 ರನ್ಗಳ ಸ್ಪರ್ಧಾತ್ಮಕ ಮೊತ್ತ ಗಳಿಸಲು ನೆರವಾದರು.
ಕಿವೀಸ್ ಪರ ಮಾರಕ ದಾಳಿ ಮಾಡಿದ ಮ್ಯಾಟ್ ಹೆನ್ರಿ 4 ವಿಕೆಟ್ ಪಡೆದರೆ, ಇವರಿಗೆ ಸಾಥ್ ನೀಡಿದ ಬೌಲ್ಟ್ 2, ಲಾಕಿ ಫರ್ಗ್ಯುಸನ್, ಗ್ರ್ಯಾಂಡ್ಹೋಮ್ ಹಾಗೂ ಮಿಚೆಲ್ ಸ್ಯಾಂಟ್ನರ್ ತಲಾ ಒಂದು ವಿಕೆಟ್ ಪಡೆದು ಬಾಂಗ್ಲಾ ತಂಡವನ್ನು 4 ಎಸೆತಗಳಿರುವಂತೆಯೇ ಆಲೌಟ್ ಮಾಡಿದರು.
245 ರನ್ಗಳ ಗುರಿ ಬೆನ್ನೆತ್ತಿದ ನ್ಯೂಜಿಲೆಂಡ್ ತಂಡದ ಗಪ್ಟಿಲ್ 25, ಮನ್ರೊ 24,ಕೇನ್ ವಿಲಿಯಮ್ಸನ್ 40, ರಾಸ್ ಟೇಲರ್ 82 , ನಿಶಾಮ್ 25, ಗ್ರ್ಯಾಂಡ್ಹೋಮ್ 15, ಸ್ಯಾಂಟ್ನರ್ 17 ರನ್ ಗಳಿಸಿದರು . ಕಿವೀಸ್ 47.1 ಓವರ್ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 2 ವಿಕೆಟ್ಗಳ ರೋಚಕ ಜಯ ಸಾಧಿಸಿತು.
ಈ ಪಂದ್ಯವನ್ನು ಉಳಿಸಿಕೊಳ್ಳಲು ಶತಪ್ರಯತ್ನ ನಡೆಸಿದ ಬಾಂಗ್ಲದೇಶ ತಂಡದ ಬೌಲರ್ಗಳು 8 ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾದರೂ ಗೆಲುವು ಕಿವೀಸ್ ಪಾಲಾಯಿತು. ಶಕಿಬ್ 2, ಮೆಹೆದಿ ಹಸನ್ 2, ಮೊಹಮ್ಮದ್ ಹುಸೇನ್ 2, ಮೊಹಮ್ಮದ್ ಸೈಫುದ್ದೀನ್ 2 ವಿಕೆಟ್ ಪಡೆದು ಸೋಲಿನಲ್ಲೂ ಮಿಂಚಿದರು.
82 ರನ್ ಗಳಿಸಿದ ರಾಸ್ ಟೇಲರ್ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು. ಕಿವೀಸ್ ಮುಂದಿನ ಪಂದ್ಯದಲ್ಲಿ ಅಫ್ಘಾನಿಸ್ತಾನವನ್ನು, ಬಾಂಗ್ಲಾದೇಶ ಆತಿಥೇಯ ಇಂಗ್ಲೆಂಡ್ ತಂಡವನ್ನು ಎದುರಿಸಲಿವೆ.
