ನವದೆಹಲಿ: ಎರಡು ರಾಜ್ಯಗಳಲ್ಲಿ ಮುಖ್ಯಮಂತ್ರಿ ಹುದ್ದೆ ನಿಭಾಯಿಸಿ ರಾಜಕಾರಣವನ್ನೇ ಉಸಿರಾಡಿದ್ದ ಎನ್.ಡಿ ತಿವಾರಿ ಪುತ್ರ ರೋಹಿತ್ ಶೇಖರ್ ತಿವಾರಿ ಇಂದು ನಿಧನರಾಗಿದ್ದಾರೆ. ರೋಹಿತ್ ಜೀವನ ಪುಟವನ್ನು ತಿರುವಿದರೆ ರಾಜಕೀಯ ಹೊರತಾದ ಒಂದು ರೋಚಕ ಹೋರಾಟ ಕಂಡುಬರುತ್ತದೆ.
ಉತ್ತರ ಪ್ರದೇಶ ಹಾಗೂ ಉತ್ತರಾಖಂಡ ರಾಜ್ಯಗಳ ಸಿಎಂ ಆಗಿದ್ದ ಎನ್.ಡಿ ತಿವಾರಿ. ಸ್ವಂತ ಮಗ ರೋಹಿತ್ ಶೇಖರ್ ತಿವಾರಿಯನ್ನು ಮಗ ಎಂದು ಸುತಾರಾಂ ಒಪ್ಪಿರಲಿಲ್ಲ.
ಸಂಬಂಧಿತ ಸುದ್ದಿ:
ಉತ್ತರ ಪ್ರದೇಶ ಮಾಜಿ ಸಿಎಂ ಎನ್.ಡಿ ತಿವಾರಿ ಪುತ್ರ ನಿಗೂಢ ಸಾವು..!
ಏಳು ವರ್ಷದ ಹೋರಾಟ:
2007ರಲ್ಲಿ ಕೋರ್ಟ್ ಕಟಕಟೆ ಏರಿದ್ದ ಈ ಅಪ್ಪ-ಮಗನ ವಿವಾದ ಬರೋಬ್ಬರಿ ಏಳು ವರ್ಷಗಳ ಕಾಲ ನಡೆದಿತ್ತು. ಎನ್.ಡಿ.ತಿವಾರಿ ತಮ್ಮ ಸ್ವಂತ ತಂದೆ ಎನ್ನುವುದನ್ನು ಸಾಬೀತುಪಡಿಸಲು ರೋಹಿತ್ ಶೇಖರ್ ತಿವಾರಿ ಸಾಕಷ್ಟು ಹೆಣಗಾಟ ನಡೆಸಿದ್ದರು.
2014ರಲ್ಲಿ ದೆಹಲಿ ಹೈಕೋರ್ಟ್ ಎನ್.ಡಿ.ತಿವಾರಿ, ರೋಹಿತ್ ಶೇಖರ್ ತಿವಾರಿಯ ಜೈವಿಕ ತಂದೆ ಎನ್ನುವುದನ್ನು ಹೇಳಿತ್ತು. ಅಲ್ಲಿಗೆ ಪ್ರಕರಣ ಸುಖಾಂತ್ಯ ಕಂಡಿತ್ತು. ರೋಹಿತ್ ತಾಯಿ ಉಜ್ವಲ ಶರ್ಮ ಆದೇಶ ಹೊರಬೀಳುತ್ತಿದ್ದಂತೆ ಕಣ್ಣೀರಾಗಿದ್ದರು.
ಕೋರ್ಟ್ ಆದೇಶ ಬಳಿಕ ಅಂದರೆ 2014ರಲ್ಲಿ ರೋಹಿತ್ ಶೇಖರ್ ತಿವಾರಿ ತಾಯಿ ಉಜ್ವಲ ಶರ್ಮರನ್ನು 88ನೇ ವರ್ಷದಲ್ಲಿ ವರಿಸಿದರು. ಎನ್.ಡಿ.ತಿವಾರಿ 1954ರಲ್ಲಿ ಸುಶೀಲಾ ಸನ್ವಾಲ್ರನ್ನು ವಿವಾಹವಾಗಿದ್ದರು. 1991ರಲ್ಲಿ ಆಕೆ ಅಸುನೀಗಿದ್ದಳು.
ಡಿಎನ್ಎ ಪರೀಕ್ಷೆ, ಹಲವಾರು ಮೊಕದ್ದಮೆಗಳು:
ಆರಂಭದಲ್ಲಿ ಡಿಎನ್ಎ ಪರೀಕ್ಷೆಗೆ ಎನ್.ಡಿ ತಿವಾರಿ ತೀವ್ರ ವಿರೋಧ ವ್ಯಕ್ತಪಡಿಸಿದ್ದರು. 2012ರಲ್ಲಿ ಕೊನೆಗೆ ಹೇಗೋ ಒಪ್ಪಿಸಿ ಎನ್.ಡಿ.ತಿವಾರಿಯ ಡಿಎನ್ಎ ಪರೀಕ್ಷೆ ನಡೆಸಲಾಗಿತ್ತು.
ಇಷ್ಟೆಲ್ಲಾ ಹರಸಾಹಸದ ಬಳಿಕ ಇಬ್ಬರೂ ಒಂದಾದರು. 2017ರಲ್ಲಿ ಎನ್.ಡಿ. ತಿವಾರಿ ಅಮಿತ್ ಶಾ ಸಮ್ಮುಖದಲ್ಲಿ ಬಿಜೆಪಿ ಸೇರ್ಪಡೆಯಾದರು. ಜೊತೆಗೆ ಪುತ್ರ ಸಹ ಕಮಲವನ್ನೇ ನೆಚ್ಚಿಕೊಂಡರು.
ತಮ್ಮ ಹುಟ್ಟುಹಬ್ಬದ ದಿನದಂದೇ 2018ರಲ್ಲಿ ಎನ್.ಡಿ.ತಿವಾರಿ ನಿಧನರಾದರು. ಅಪ್ಪ ಸತ್ತ ಒಂದೇ ವರ್ಷದ ಒಳಗಾಗಿ ಮಗ ಸಹ ಸಾವನ್ನಪ್ಪಿದ್ದಾನೆ. ಸಾವಿಗೆ ನಿರ್ದಿಷ್ಟ ಕಾರಣ ಇನ್ನೂ ತಿಳಿದು ಬಂದಿಲ್ಲ.
