ಗದಗ : ಕೊರೊನಾ ಹಿನ್ನೆಲೆಯಲ್ಲಿ ಗದಗನಲ್ಲಿ ನಾಟಿ ಕೋಳಿಗೆ ಭಾರೀ ಡಿಮ್ಯಾಂಡ್ ಬಂದಿದೆ. ಕೊರೊನಾ ಸೋಂಕಿತರು ನಾಟಿ ಕೋಳಿ ಸೇವಿಸಿದರೆ ರೋಗ ನಿರೋಧಕ ಶಕ್ತಿ ಹೆಚ್ಚಳ‌‌‌‌‌ವಾಗುತ್ತದೆ ಅಂತ ವೈದ್ಯರು ಸೂಚಿಸಿರುವ ಹಿನ್ನೆಲೆ ನಾಟಿ ಕೋಳಿಗೆ ಭಾರೀ ಬೇಡಿಕೆ ಬಂದಿದೆ.
ಜಿಲ್ಲೆಯ ರೋಣ ಪಟ್ಟಣದಲ್ಲಿ ನಾಟಿ ಕೋಳಿ ಹಿಡಿದು ಹಳ್ಳಿಗಳಿಂದ ಬೆಳ್ಳಂಬೆಳಗ್ಗೆ ಪಟ್ಟಣಕ್ಕೆ ಮಾರಾಟಗಾರರು ಬರ್ತಿದ್ದಾರೆ. ಬೆಳಗ್ಗೆ 6 ರಿಂದ 10 ಗಂಟೆ ಒಳಗೆ ಮಾರಾಟ ಮಾಡಿ ಹೋಗುವುದು ಸಾಮಾನ್ಯವಾಗಿದೆ. 8 ಗಂಟೆ ಒಳಗೆ ಎಲ್ಲಾ ಕೋಳಿಗಳು ಚೌಕಾಸಿ ಇಲ್ಲದೆ ಮಾರಾಟವಾಗ್ತಿವೆ ಅಂತ ವ್ಯಾಪಾರಿಗಳು ಹರ್ಷ ವ್ಯಕ್ತಪಡಿಸಿದ್ದಾರೆ.
ಕಳೆದ ವರ್ಷ ಒಂದು ನಾಟಿ ಕೋಳಿಗೆ 250 ರೂ. ಇತ್ತು. ಈ ವರ್ಷ 400 ರೂ. ಆಗಿದೆ. ದುಬಾರಿ ಎನಿಸಿದರೂ ಖರೀದಿಸುವವರ ಸಂಖ್ಯೆ ಹೆಚ್ಚಳವಾಗಿದೆ. ನಾಟಿ ಕೋಳಿ ಮಾಂಸದಲ್ಲಿ ಪ್ರೊಟೀನ್, ವಿಟಮಿನ್ ಅಂಶ ಹೆಚ್ಚಾಗಿರುತ್ತದೆ.
ಚಿಕನ್ ತಿನ್ನುವುದರಿಂದ ದೇಹದ ಮಾಂಸಖಂಡಗಳು ಗಟ್ಟಿಯಾಗಿ ಕೊರೊನಾ ವಿರುದ್ಧ ಹೋರಾಟ ಮಾಡುತ್ತದೆ. ಇದರಿಂದ ರೋಗಿಗಳಿಗೆ ಇದರ ಸೇವನೆ ಒಳ್ಳೆಯದು ಅಂತ ವೈದ್ಯರ ಸಲಹೆ ಮೇರೆಗೆ ಜನ ಮುಗಿಬಿದ್ದು ಖರೀದಿ ಮಾಡ್ತಿದ್ದಾರೆ.
