ಮುಂಬೈ: ಭಾರತ ತಂಡದ ಕೋಚ್ ರವಿ ಶಾಸ್ತ್ರಿಯವರ ಗುತ್ತಿಗೆ ಸೇವಾ ಅವಧಿ ಏಕದಿನ ವಿಶ್ವಕಪ್‌ನ ಕೊನೆಯ ಪಂದ್ಯದವರಗೆ ಇದ್ದು, ಮರು ಆಯ್ಕೆ ಪ್ರಕ್ರಿಯೆಯಲ್ಲಿ ಅವರೂ ಪಾಲ್ಗೊಳ್ಳಬೇಕು ಎಂದು ಬಿಸಿಸಿಐ ಮೂಲಗಳು ಸ್ಪಷ್ಟಪಡಿಸಿವೆ.
ಶಾಸ್ತ್ರಿ ಟೀಮ್‌ ಇಂಡಿಯಾದ ಮುಖ್ಯ ತರಬೇತುದಾರರಾದ ಮೇಲೆ ಹಲವು ವಿದೇಶಿ ಸರಣಿ ಹಾಗೂ ಆಸ್ಟ್ರೇಲಿಯಾ ವಿರುದ್ಧ ಏಕದಿನ ಹಾಗೂ ಟೆಸ್ಟ್ ಸರಣಿ ಗೆದ್ದು ದಾಖಲೆ ಬರೆದಿತ್ತು. ಆದರೆ ಈ ಸಾಧನೆಯಿಂದಾಗಿ ಅವರನ್ನು ಕೋಚ್ ಆಗಿ ವಿಸ್ತರಣೆ ಮಾಡಬೇಕೆಂಬ ಯಾವುದೇ ಷರುತ್ತುಗಳಿಲ್ಲ ಎಂದು ಬಿಸಿಸಿಐ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಹೀಗಾಗಿ ಶಾಸ್ತ್ರಿಯವರ ಹಾಲಿ ಗುತ್ತಿಗೆ ಅವಧಿ ಮುಗಿಯುತ್ತಿದ್ದಂತೆಯೇ ಬಿಸಿಸಿಐ ಹೊಸ ಪ್ರಕ್ರಿಯೆಗೆ ಚಾಲನೆ ನೀಡಲಿದೆ. ಆದರೆ ವಿಶ್ವಕಪ್ನಲ್ಲಿ ಭಾರತ ತಂಡ ಯಾವ ರೀತಿ ಪ್ರದರ್ಶನ ನೀಡಲಿದೆ ಎಂಬುದರ ಮೇಲೆ ಶಾಸ್ತ್ರಿ ಸ್ಥಾನದ ಬಗ್ಗೆ ತಿಳಿಯಲಿದೆ.
ಆದರೆ ಫುಟ್ಬಾಲ್‌ ಅಥವಾ ಎನ್‌ಬಿಎ ಕ್ಲಬ್‌ಗಳು ತಮ್ಮ ಕೋಚ್ಗಳ ಸೇವಾ ಗುತ್ತಿಗೆ ಪತ್ರದಲ್ಲಿ ನವೀಕರಣ ಅಥವಾ ವಿಸ್ತರಣೆಗೆ ಅವಕಾಶ ನೀಡುವ ಷರತ್ತುಗಳನ್ನು ಒಪ್ಪಂದದಲ್ಲಿ ಸೇರಿಸಿರುತ್ತವೆ. ಆದರೆ, ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿ ಕಳೆದ ಕೆಲವು ವರ್ಷಗಳಿಂದ ಆ ರೀತಿಯ ಷರುತ್ತಗಳನ್ನು ವಿಧಿಸುತ್ತಿಲ್ಲ. ಗುತ್ತಿಗೆ ಅವಧಿ ಮುಗಿದ ಮೇಲೆ ಹೊಸದಾಗಿ ಕೋಚ್ ಆಯ್ಕೆ ಪ್ರಕ್ರಿಯೆ ನಡೆಸಿ ನಂತರ ನಿಯಮಾನುಸಾರ ಕೋಚ್ಅನ್ನು ಆಯ್ಕೆ ಮಾಡುತ್ತಾರೆ.
ರವಿ ಶಾಸ್ತ್ರಿ ಜೊತೆಗೆ ಬ್ಯಾಟಿಂಗ್‌ ಕೋಚ್ ಸಂಜಯ್‌ ಬಾಂಗರ್‌, ಬೌಲಿಂಗ್‌ ಕೋಚ್ ಭರತ್‌ ಅರುಣ್‌ ಹಾಗೂ ಫೀಲ್ಡಿಂಗ್‌ ಕೋಚ್ ಆರ್‌.ಶ್ರೀಧರ್‌ ಅವರೂ ಸಹಾ ಕೋಚ್ ಆಯ್ಕೆ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲೇಬೇಕಿದೆ. ಈ ಎಲ್ಲ ಪ್ರಕ್ರಿಯೆಗಳು ವಿಶ್ವ ಕಪ್‌ ನಂತರ ನಡೆಯಲಿದೆ.
