ಅಡವಿಶೇಷ್ ಅಭಿನಯದ 'ಮೇಜರ್' ಚಿತ್ರ ಕಳೆದ ತಿಂಗಳು ಜೂನ್ 3ರಂದು ವಿಶ್ವಾದ್ಯಂತ 3 ಭಾಷೆಗಳಲ್ಲಿ ಬಿಡುಗಡೆಗೊಂಡು ಯಶಸ್ವಿಯಾಗಿತ್ತು. 26/11 ಮುಂಬೈನ ತಾಜ್ ಹೋಟೆಲ್ ಮೇಲಿನ ಭಯೋತ್ಪಾದಕ ದಾಳಿಯಲ್ಲಿ ವೀರ ಮರಣ ಹೊಂದಿದ ಮೇಜರ್ ಸಂದೀಪ್ ಉನ್ನಿಕೃಷ್ಣನ್ ಅವರ ಕುರಿತಾದ ಸಿನೆಮಾ ಇದಾಗಿದೆ.
ಜುಲೈ 3ರಂದು ಒಟಿಟಿ ವೇದಿಕೆ ನೆಟ್ಪ್ಲಿಕ್ಸ್ನಲ್ಲಿ ಈ ಬಹುನಿರೀಕ್ಷಿತ ಚಿತ್ರವನ್ನು ಬಿಡುಗಡೆ ಮಾಡಲಾಗಿತ್ತು. ಇದೀಗ ನೆಟ್ಫ್ಲಿಕ್ಸ್ನಲ್ಲಿ ಸಿನೆಮಾವನ್ನು ಹೆಚ್ಚಿನ ಸಂಖ್ಯೆಯಲ್ಲಿ ಜನರು ವೀಕ್ಷಿಸುವ ಮೂಲಕ ಉತ್ತಮ ರೆಸ್ಪಾನ್ಸ್ ದೊರೆತಿದೆ.
ಮೇಜರ್ ಚಿತ್ರ ಪಾಕಿಸ್ತಾನ ಸೇರಿದಂತೆ ಬಹ್ರೇನ್, ಬಾಂಗ್ಲಾದೇಶ, ಕುವೈತ್, ಮಲೇಷ್ಯಾ, ಮಾಲ್ಡೀವ್ಸ್, ಓಮನ್, ಪಾಕಿಸ್ತಾನ, ಕತಾರ್, ಸಿಂಗಾಪುರ, ಶ್ರೀಲಂಕಾ ಮತ್ತು ಯುಎಇಗಳಲ್ಲಿ ಟಾಪ್ 10 ಟ್ರೆಂಡಿಂಗ್ ಸಿನೆಮಾಗಳ ಪಟ್ಟಿಯಲ್ಲಿ ಒಂದಾಗಿದೆ. ಅಲ್ಲದೆ, ಭಾರತ, ಮಾರಿಷಸ್, ನೈಜಿರಿಯಾಗಳಲ್ಲಿಯೂ ಚಿತ್ರ ಅಗ್ರಸ್ಥಾನದಲ್ಲಿದ್ದು, ಪಾಕಿಸ್ತಾನದಲ್ಲಿಯೂ ಹೆಚ್ಚಿನ ವೀಕ್ಷಣೆ ಕಾಣುತ್ತಿದೆ ಎಂದು ನೆಟ್ಫ್ಲಿಕ್ಸ್ ಸಂಸ್ಥೆ ತಿಳಿಸಿದೆ.
ಚಿತ್ರದ ಯಶಸ್ವಿ ಕುರಿತು ಮಾತನಾಡಿರುವ ನಟ ಅಡವಿಶೇಷ್, ವೀಕ್ಷಕರ ತೋರುತ್ತಿರುವ ಪ್ರೀತಿಗೆ ನಾನು ಋಣಿಯಾಗಿದ್ದೇನೆ. ಇದು ನಿಜಕ್ಕೂ ನಾವು ಹೆಮ್ಮೆ ಪಡುವ ಸಂದರ್ಭ. ಈ ಚಿತ್ರ ಯಾವಾಗಲೂ ವಿಶೇಷವಾಗಿರುತ್ತದೆ ಎಂದು ಸಂತೋಷ ವ್ಯಕ್ತಪಡಿಸಿದ್ದಾರೆ.
ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಬಿಡುಗಡೆಯಾದ ಈ ಚಿತ್ರದಲ್ಲಿ ಸಾಯಿ ಮಂಜ್ರೇಕರ್, ಸೋಭಿತಾ ಧೂಳಿಪಳ್ಳ, ರೇವತಿ, ಪ್ರಕಾಶ್ರಾಜ್ ಮತ್ತು ಮುರಳಿ ಶರ್ಮಾ ಪ್ರಮುಖ ಪಾತ್ರಗಳನ್ನು ನಿರ್ವಹಿಸಿದ್ದಾರೆ. ಇನ್ನೊಂದು ವಿಶೇಷವೆಂದರೆ ಸೂಪರ್ ಸ್ಟಾರ್ ಮಹೇಶ್ ಬಾಬು ನಿರ್ಮಾಣದ ಪಾಲುದಾರರಾಗಿದ್ದಾರೆ.
ಇದನ್ನೂ ಓದಿ: 39ನೇ ಹುಟ್ಟು ಹಬ್ಬ: ಮಾಲ್ಡೀವ್ಸ್‌ಗೆ ಹಾರಿದ ಕತ್ರಿನಾ ಕೈಫ್-ವಿಕ್ಕಿ ಕೌಶಲ್
