ನವದೆಹಲಿ: ಪಾಕಿಸ್ತಾನದಲ್ಲಿರುವ ಭಾರತೀಯ ಹೈ ಕಮೀಷನರ್, ಉಪ ಹೈ ಕಮಿಷನರ್ ಹಾಗೂ ನೌಕಾ ದಳದ ಸಲಹೆಗಾರರಿಗೆ ಅಲ್ಲಿನ ಸೇನೆ ಕಿರುಕುಳ ಕೊಡುತ್ತಿದೆ ಎನ್ನಲಾಗುತ್ತಿದ್ದು, ಈ ಸಂಬಂಧ ತನಿಖೆ ನಡೆಸಬೇಕೆಂಬ ಕೂಗು ಕೇಳಿಬಂದಿದೆ.
ತನ್ನ ಮೇಲಿನ ಈ ಕಿರುಕುಳವನ್ನು ಮೌಖಿಕವಾಗಿ ಭಾರತೀಯ ಹೈಕಮೀಷನರ್ ಹೇಳಿಕೊಂಡಿದ್ದಾರೆ. ಅಲ್ಲದೇ ಪಾಕ್ ವಿದೇಶಾಂಗ ಇಲಾಖೆಗೆ ಈ ಕುರಿತು ಪತ್ರ ಕೂಡ ಬರೆದಿದ್ದಾರೆ.
ಪಾಕಿಸ್ತಾನದ ಭದ್ರತಾ ಸಿಬ್ಬಂದಿ ಮಾರ್ಚ್ 9 ಹಾಗೂ 10ರಂದು ಕಿರುಕುಳ ನೀಡಿದ್ದರು. ಮಾರ್ಚ್ 8ರಂದು ಇದೇ ರೀತಿಯ ಘಟನೆ ನಡೆದಿದೆ ಎಂದು ಅಧಿಕಾರಿ ಹೇಳಿದ್ದಾರೆ.
ಪಾಕಿಸ್ತಾನಿ ಭದ್ರತಾ ಸಿಬ್ಬಂದಿ ಪ್ರತಿನಿತ್ಯ ಭಾರತೀಯ ಹೈಕಮೀಷನರ್ ಕಚೇರಿಯಲ್ಲಿ ಗಸ್ತು ತಿರುಗುತ್ತಿದ್ದಾರೆ. ಉಪ ಹೈ ಕಮಿಷನರ್ ಮನೆಯ ಸುತ್ತಲೂ ಓಡಾಡುತ್ತಿದ್ದಾರೆ ಹಾಗೂ ನೌಕಾದಳದ ಸಲಹೆಗಾರರ ಮೇಲೂ ಪಾಕ್ ಭದ್ರತಾ ಸಿಬ್ಬಂದಿ ಒಂದು ಕಣ್ಣಿಟ್ಟಿದ್ದಾರೆ. ಅಲ್ಲದೇ ಹೈಕಮಿಷನರ್ ಅವರನ್ನು ಒಂದಿಬ್ಬರು ಪಾಕ್ ಯೋಧರು ಹಿಂಬಾಲಿಸುತ್ತಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಪುಲ್ವಾಮಾ ದಾಳಿ ಹಾಗೂ ನಂತರದ ಬಾಲಕೋಟ್ ಮೇಲಿನ ಭಾರತದ ವಾಯುದಾಳಿ ಬಳಿಕ ಉಭಯ ದೇಶಗಳ ನಡುವಿನ ಸಂಬಂಧ ಇನ್ನಷ್ಟು ಬಿಗಡಾಯಿಸಿದೆ.
