ಬೆಂಗಳೂರು: ನಗರದ ಕುಮಾರ ಕೃಪಾ ರಸ್ತೆಯಲ್ಲಿ ಚಿತ್ರಕಲಾ ಪರಿಷತ್ತು ಇಂದು ಆಯೋಜಿಸಿರುವ 22ನೇ ಚಿತ್ರ ಸಂತೆಯಲ್ಲಿ ಹಲವು ವಿಧದ ಮನಮೋಹಕ ಚಿತ್ರಕಲೆಗಳು ಕಲಾಭಿಮಾನಿಗಳಿಗೆ ಬೆರಗು ಮೂಡಿಸಿದವು. ಡಾಟ್ ಪೇಂಟಿಂಗ್, ರಿವರ್ಸ್ ಪೇಂಟಿಂಗ್ ಮತ್ತು ಕ್ಲೇ ಆರ್ಟ್ ಮೂಲಕ ಮೂಡಿ ಬಂದ ಕಲಾಕೃತಿಗಳು ಚಿತ್ರಸಂತೆಯ ಮೆರುಗು ಹೆಚ್ಚಿಸಿದವು.
ಡಾಟ್ ಪೇಂಟಿಂಗ್ ವಿಶೇಷತೆಯೇನು? ಪಶ್ಚಿಮ ಬಂಗಾಳದ ಕೋಲ್ಕತ್ತಾ ಮೂಲದ ವೃತ್ತಿಪರ ಚಿತ್ರಕಲಾವಿದ ಉಷಾರಂಜನ್ ಮಂಡಲ್ ಅವರ ಡಾಟ್ ಪೇಂಟಿಂಗ್ ವಿಶೇಷವಾಗಿ ಜನರ ಗಮನ ಸೆಳೆಯಿತು. ತರಹೇವಾರಿ ಪೆನ್ ಬಳಸಿ ಇವರೇ ಮುನ್ನೆಲೆಗೆ ತಂದಿರುವ ಕಲೆ ಇದಾಗಿದೆ. ಇಟಲಿಯಿಂದ ತರಿಸಲಾದ ವಿಶೇಷ ಪೇಪರ್ನಲ್ಲಿ ಆಕೃತಿ ಮೂಡಿಸಲು 3 ರಿಂದ 4 ತಿಂಗಳ ಕಾಲ ಸಮಯ ಬೇಕು. ಇದಕ್ಕೆ 40 ಸಾವಿರ ರೂ.ದಿಂದ ಲಕ್ಷಗಳವರೆಗೆ ಬೆಲೆ ನಿಗದಿಪಡಿಸಲಾಗಿದೆ. ಸುಮಾರು 35 ಚಿತ್ರಕಲೆಗಳನ್ನು ಜನರು ಇಂದು ಖರೀದಿಸಿದರು.
ಈ ಡಾಟ್ ಪೇಂಟಿಂಗ್ಗಳನ್ನು ಭಾರತದಲ್ಲಿ ಮತ್ತು ವಿದೇಶಗಳಲ್ಲಿ ಪ್ರದರ್ಶನಕ್ಕೆ ಇಡಲಾಗಿದೆ. ಈ ಪೇಂಟಿಂಗ್ನಲ್ಲಿ ವಿನೂತನ ಪೆನ್ ಮತ್ತು ಶಾಹಿ ಬಳಸಲಾಗುತ್ತದೆ. ಇದರಲ್ಲಿನ ಡಿಟೈಲಿಂಗ್ ಬೇರೆ ಚಿತ್ರಕಲೆಗೆ ಹೋಲಿಸಿದರೆ ಅತ್ಯತ್ತಮವಾಗಿದೆ. ಫುಲ್ ಶೀಟ್ ಪೇಂಟ್ ಮಾಡಲು 4 ತಿಂಗಳಿಗಿಂತ ಅಧಿಕ ಸಮಯ ಹಿಡಿಯುತ್ತದೆ. ಚಿತ್ರ ಸಂತೆಯಲ್ಲಿ ಕೂಡ ಒಳ್ಳೆಯ ವಿಮರ್ಶೆ ದೊರೆತಿದೆ ಎಂದು ಉಷಾರಂಜನ್ ಮಂಡಲ್ ಹೇಳಿದರು.
ರಿವರ್ಸ್ ಪೇಂಟಿಂಗ್ ಎಂಬ ಸೋಜಿಗ : ಇನ್ನು, ಕಲಾಸಂತೆಯಲ್ಲಿ ರಿವರ್ಸ್ ಪೇಂಟಿಂಗ್ ಕೂಡ ವಿಶೇಷವಾಗಿ ಕಂಡುಬಂತು. ಗ್ಲಾಸ್ ಮೇಲೆ ಚಿತ್ರಕಲೆಯನ್ನು ಕೊನೆಯಿಂದ ಮೊದಲಿನ ಮಾದರಿಯಲ್ಲಿ ಬಿಡಿಸಲಾಗುತ್ತದೆ. ಗ್ಲಾಸ್ ಫ್ರೇಮ್ನ ಹಿಂದಿನಿಂದ ಬಿಡಿಸುವುದು ಸಹ ಈ ಚಿತ್ರಕಲೆಯ ವಿಶೇಷತೆಯಾಗಿದೆ. ಈ ಆಕೃತಿ ಬಿಡಿಸಲು ಸುಮಾರು 1 ವಾರ ಬೇಕು. ಇದು ಚಿತ್ರಸಂತೆಯಲ್ಲಿ ಕೋಲ್ಕತ್ತಾದ ಶಾಂತಿನಿಕೇತನ ಕಲಾ ಶಾಲೆಯ ವಿದ್ಯಾರ್ಥಿ ಸದ್ಯಕ್ಕೆ ತುಮಕೂರಿನಲ್ಲಿ ನೆಲೆಸಿ ಮಕ್ಕಳಿಗೆ ಕಲಾ ಶಿಕ್ಷಣ ನೀಡುತ್ತಿರುವ ಸುಭಾಶಿಶ್ ಅವರದ್ದಾಗಿದೆ.
ಪ್ರತಿ ಬಾರಿಯೂ ಚಿತ್ರಸಂತೆಯಲ್ಲಿ ಭಾಗವಹಿಸಿದ್ದೇನೆ. 5 ರಿಂದ 60 ಸಾವಿರವರೆಗೆ ಬೆಲೆಯನ್ನು ಅಳತೆಯ ಆಧಾರದ ಮೇಲೆ ನಿಗದಿ ಮಾಡಲಾಗಿದೆ. ಸುಮಾರು 10 ಚಿತ್ರಕಲೆಯನ್ನು ಈಗಾಗಲೇ ಜನರು ಕೊಂಡಿದ್ದಾರೆ ಎಂದು ಸುಭಾಶಿಶ್ ಈಟಿವಿ ಭಾರತಕ್ಕೆ ತಿಳಿಸಿದರು.
ಮುಖಭಾವಗಳ ಕ್ಲೇ ಆರ್ಟ್: ಜೂನ್ ಸ್ಟುಡಿಯೋದ ಸುವಿಧಾ ಬೋಳಾರ್ ಮೊದಲ ಬಾರಿಗೆ ಚಿತ್ರಸಂತೆಯಲ್ಲಿ ಭಾಗವಹಿಸಿ ಕ್ಲೇ ಆರ್ಟ್ ಪ್ರದರ್ಶನ ಮಾಡಿದರು. ಮುಖ್ಯವಾಗಿ ಮನುಷ್ಯನ ಮುಖದ ವಿವಿಧ ಆಯಾಮಗಳು ಮತ್ತು ಭಂಗಿಗಳನ್ನು ಚಿಕ್ಕ ಚಿಕ್ಕ ಆಕೃತಿಯನ್ನಾಗಿಸಿರುವುದು ಆಕರ್ಷಣೀಯವಾಗಿತ್ತು. ಜೋಕರ್ ಮುಖಗಳು, ಹೆಣ್ಣಿನ ವಿವಿಧ ಭಾವಗಳು, ಎರಡು ಮುಖಚರ್ಯೆಗಳನ್ನು ತೋರ್ಪಡಿಸುವ ವಿಧಗಳು ವಿಶೇಷವಾಗಿದ್ದವು.
ಮನಷ್ಯನ ವಿವಿಧ ಆಯಾಮಗಳನ್ನು ತೋರ್ಪಡಿಸುವ ಹಂಬಲ ಹೊಂದಿದ್ದೆ. ಈ ನಿಟ್ಟಿನ ಕ್ಲೇ ಆರ್ಟ್ ಅನ್ನು ಹೆಚ್ಚು ಜನರು ಇಷ್ಟಪಡುತ್ತಿರುವುದು ಸಂತಸ ತಂದಿದೆ. ಈ ಪುಟ್ಟ ಪುಟ್ಟ ಮುಖಗಳ ಒಟ್ಟು ಚಿತ್ರಣಕ್ಕೆ 1 ಸಾವಿರದಿಂದ 6 ಸಾವಿರವರೆಗೆ ದರ ನಿಗದಿಪಡಿಸಲಾಗಿದೆ. ಸುಮಾರು ಇದೇ ಬಗೆಯ 6 ಕಲಾಕೃತಿಗಳು ಮಾರಾಟವಾಗಿರುವುದು ಸಮಾಧಾನ ತಂದಿದೆ ಎಂದು ಸುವಿಧಾ ಬೋಳಾರ್ ಮಾಹಿತಿ ನೀಡಿದರು.
ಇದನ್ನೂ ಓದಿ: ಚಿತ್ರಸಂತೆ ಉದ್ಘಾಟಿಸಿದ ಸಿಎಂ: ಕಲಾಕೃತಿ ಕೊಂಡು ಕಲಾವಿದರನ್ನು ಬೆಂಬಲಿಸುವಂತೆ ಸಿದ್ದರಾಮಯ್ಯ ಕರೆ
