ಲಂಡನ್: ಬಹುನಿರೀಕ್ಷಿತ ಐಸಿಸಿ ಏಕದಿನ ವಿಶ್ವಕಪ್ ಮಹಾಟೂರ್ನಿ ಇಂದಿನಿಂದ ಆರಂಭಗೊಳ್ಳುತ್ತಿದ್ದು, ಉದ್ಘಾಟನಾ ಪಂದ್ಯದಲ್ಲೇ ಆತಿಥೇಯ ಇಂಗ್ಲೆಂಡ್ ಹಾಗೂ ದಕ್ಷಿಣ ಆಫ್ರಿಕಾ ತಂಡ ಮುಖಾಮುಖಿಯಾಗುತ್ತಿವೆ.
ಕಳೆದ ಒಂದು ವರ್ಷದ ಇತಿಹಾಸ ನೋಡಿದಾಗ ಇಂಗ್ಲೆಂಡ್ ಆಡಿರುವ 25 ಪಂದ್ಯಗಳಲ್ಲಿ 17ರಲ್ಲಿ ಗೆಲುವು ದಾಖಲಿಸಿದ್ದು, ಕೇವಲ 5 ಪಂದ್ಯಗಳನ್ನು ಕೈಚೆಲ್ಲಿದೆ. ಮೂರು ಪಂದ್ಯಗಳಲ್ಲಿ ಯಾವುದೇ ಫಲಿತಾಂಶ ಹೊರಬಿದ್ದಿಲ್ಲ. ಇನ್ನು ಇಂದು ಪಂದ್ಯ ನಡೆಯುತ್ತಿರುವ ಮೈದಾನದಲ್ಲೇ ಇಂಗ್ಲೆಂಡ್ 13 ಪಂದ್ಯಗಳನ್ನಾಡಿದ್ದು, 11 ಪಂದ್ಯದಲ್ಲಿ ಜಯಶಾಲಿ ಆಗಿದ್ದು, ಒಂದು ಒಂದು ಪಂದ್ಯ ಮಾತ್ರ ಸೋತಿದೆ. ಮತ್ತೊಂದು ಪಂದ್ಯದಿಂದ ಫಲಿತಾಂಶ ಬಂದಿಲ್ಲ.
ಕಳೆದ ಒಂದು ವರ್ಷದಲ್ಲಿ ದಕ್ಷಿಣ ಆಫ್ರಿಕಾ ಕೂಡ ಏಕದಿನ ಪಂದ್ಯಗಳಲ್ಲಿ ಉತ್ತಮ ರೆಕಾರ್ಡ್ ಹೊಂದಿದ್ದು, ಆಡಿರುವ 21 ಏಕದಿನ ಪಂದ್ಯಗಳಲ್ಲಿ 16ರಲ್ಲಿ ಗೆಲುವು ಪಡೆದಿದ್ದು, 5ರಲ್ಲಿ ಸೋತಿದೆ. ಇನ್ನು ವಿದೇಶಿ ನೆಲದಲ್ಲೂ ಆಫ್ರಿಕಾ ಉತ್ತಮ ಟ್ರ್ಯಾಕ್ ರೆಕಾರ್ಡ್ ಹೊಂದಿದ್ದು, 8 ಪಂದ್ಯಗಳ ಪೈಕಿ 5ರಲ್ಲಿ ಗೆದ್ದಿದೆ. ಆದರೆ ಇಂದು ಪಂದ್ಯ ನಡೆಯುತ್ತಿರುವ ಮೈದಾನದಲ್ಲಿ ಹರಿಣಗಳ ತಂಡ ಹೇಳಿಕೊಳ್ಳುವಂತಹ ಪ್ರದರ್ಶನ ನೀಡಿಲ್ಲ.
ದಿ ಓವಲ್ ಮೈದಾನದಲ್ಲಿ ಆಫ್ರಿಕಾ 9 ಪಂದ್ಯಗಳನ್ನಾಡಿದ್ದು, ಕೇವಲ ಮೂರು ಪಂದ್ಯಗಳಲ್ಲಿ ಗೆದ್ದಿದೆ. ಈ ಹಿಂದೆ 1999ರ ಮೇ 22ರಂದು ಇಂಗ್ಲೆಂಡ್ ವಿರುದ್ಧ 122ರನ್ಗಳ ಗೆಲುವು ದಾಖಲು ಮಾಡಿತ್ತು. ಇನ್ನು ಉಭಯ ತಂಡಗಳು ಬ್ಯಾಟಿಂಗ್ ಹಾಗೂ ಬೌಲಿಂಗ್ ವಿಭಾಗದಲ್ಲಿ ಬಲಿಷ್ಠವಾಗಿದ್ದು, ಸರಿಸಮವಾದ ಹೋರಾಟ ಕಂಡು ಬರಲಿದೆ.
ಸಂಭಾವ್ಯ ಆಟಗಾರರು:
ಇಂಗ್ಲೆಂಡ್: ಜಾನಿ ಬೈರ್ಸ್ಟೋವ್, ಇಯಾನ್ ಮಾರ್ಗನ್(ನಾಯಕ),ಜೋ ರೂಟ್, ಜಾಸನ್ ರಾಯ್, ಇಯಾನ್ ಮಾರ್ಗನ್, ಜೋಫ್ರಾ ಆರ್ಚರ್, ಬೆನ್ ಸ್ಟೋಕ್ಸ್, ಜಾಸ್ ಬಟ್ಲರ್, ಲೈಮ್ ಫ್ಲಂಕೆಟ್, ಮೊಯಿನ್ ಅಲಿ, ಆದಿಲ್ ರಶೀದ್, ಕ್ರಿಸ್ ವೋಕ್ಸ್, ಟಾಮ್ ಕರ್ರನ್, ಮಾರ್ಕ್ ವುಡ್, ಲೈಮ್ ಡಾಸನ್,ಜೇಮ್ಸ್ ವಿನ್ಸ್
ದಕ್ಷಿಣ ಆಫ್ರಿಕಾ: ಕ್ವಿಂಟನ್ ಡಿಕಾಕ್, ಹಾಸಿಂ ಆಮ್ಲ, ಫಾಫ್ ಡು ಪ್ಲೆಸಿಸ್ (ನಾಯಕ) ರಾಸ್ಸಿ ವ್ಯಾನ್ ಡರ್ ಡಾಸ್ಸೆನ್, ಜೀನ್ ಪಾಲ್ ಡುಮಿನಿ, ಡೇವಿಡ್ ಮಿಲ್ಲರ್, ಆ್ಯಂಡಿಲೇ ಪೆಹ್ಲುಕ್ವಾಯೋ, ಡ್ವೈನ್ ಪ್ರೆಟೋರಿಯಸ್, ಕಗಿಸೋ ರಬಡಾ, ಲುಂಗಿ ಎಂಗಿಡಿ, ಇಮ್ರಾನ್ ತಾಹೀರ, ತಬ್ರೈಜ್ ಶಂಸಿ, ಕ್ರಿಸ್ ಮೋರಿಸ್
