ಮುಂಬೈ: ಐಪಿಎಲ್ನ ಆವೃತ್ತಿಯಲ್ಲಿ ಮೊದಲ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ನ ಬ್ರೆಂಡನ್ ಮೆಕಲಮ್ ಆರ್ಸಿಬಿ ವಿರುದ್ಧ ಬಾರಿಸಿದ ಸ್ಫೋಟಕ ಶತಕವೇ(158) ನನ್ನ ಕ್ರಿಕೆಟ್ ಜೀವನಕ್ಕೆ ದಾರಿ ಮಾಡಿಕೊಟ್ಟಿತು ಎಂದು ಕನ್ನಡಿಗ ಕೆ.ಎಲ್.ರಾಹುಲ್ ತಿಳಿಸಿದ್ದಾರೆ.
2008 ರ ಮೊದಲ ಆವೃತ್ತಿಯ ಮೊದಲ ಪಂದ್ಯದಲ್ಲಿ ಬ್ರೆಂಡಮ್ ಮೆಕಲಮ್ ಆರ್ಸಿಬಿ ಬೌಲರ್ಗಳನ್ನು ಮನಬಂದಂತೆ ಥಳಿಸಿದ್ದರು. ಕೇವಲ 73 ಎಸೆತಗಳಲ್ಲಿ ಬರೋಬ್ಬರಿ 158 ರನ್ಗಳನ್ನು ಸೂರೆಗೈದಿದ್ದರು. 13 ಸಿಕ್ಸರ್ ಹಾಗೂ 10 ಬೌಂಡರಿ ಸಿಡಿಸಿದ್ದರು. ಈ ಪಂದ್ಯದಲ್ಲಿ ಕೋಲ್ಕತ್ತಾ 20 ಓವರ್ಗಳಲ್ಲಿ 223 ರನ್ ಕಲೆ ಹಾಕಿತ್ತು. ಇದಕ್ಕುತ್ತರವಾಗಿ ಆರ್ಸಿಬಿ 82 ರನ್ಗಳಿಗೆ ಆಲೌಟ್ ಆಗುವ ಮೂಲಕ 140 ರನ್ಗಳ ಹೀನಾಯ ಸೋಲನುಭವಿಸಿತ್ತು.
ಈ ಪಂದ್ಯ ನಡೆಯುವಾಗ ರಾಹುಲ್ಗೆ 16ರ ಹರೆಯ. ಅಂದು ಮೆಕಲಮ್ ಆಟ ನೋಡಿದ ರಾಹುಲ್ ತಮ್ಮ ಭವಿಷ್ಯದ ಕನಸನ್ನು ಅಲ್ಲಿಂದಲೇ ಕಟ್ಟಲು ಶುರು ಮಾಡಿದರಂತೆ. ಅಂದು ಮೆಕಲಮ್ ಬ್ಯಾಟಿಂಗ್ ಶೈಲಿಯನ್ನು, ಕೌಶಲ್ಯವನ್ನು ಹಾಗೂ ತಂತ್ರಗಾರಿಕೆಯನ್ನು ನೋಡಿ ಅಳವಡಿಸಿಕೊಳ್ಳಲು ಪ್ರಯತ್ನಿಸಿದೆ. ಆ ಆಟ ನೋಡಿದ ಮೇಲೆ ಸಿಕ್ಸರ್, ಸ್ಕೂಪ್ ಶಾಟ್ ಹಾಗೂ ರಿವರ್ಸ್ ಸ್ವೀಪ್ ಶಾಟ್ಗಳನ್ನು ಕರಗತ ಮಾಡಿಕೊಳ್ಳಲು ಕಠಿಣ ಅಭ್ಯಾಸ ನಡೆಸಿದೆ ಎಂದು ತಮ್ಮ ಮೊದಲ ಐಪಿಎಲ್ ಅನುಭವಗಳನ್ನು ರಾಹುಲ್ ಹಂಚಿಕೊಂಡಿದ್ದಾರೆ.
2013 ರಲ್ಲಿ ಆರ್ಸಿಬಿಯಲ್ಲಿ ಆಡಿದ ರಾಹುಲ್ ನಂತರ 2014 - 2015 ರಲ್ಲಿ ಸನ್ರೈಸರ್ಸ್ ಹೈದರಾಬಾದ್ ಪರ ಆಡಿದ್ದರು. ಆದರೆ, ಈ ಮೂರು ವರ್ಷಗಳಲ್ಲಿ ತುಂಬಾ ಕಷ್ಟಪಟ್ಟಿದ್ದರು. 2016ರಲ್ಲಿ ಎಸ್ ಆರ್ಎಚ್ನಿಂದ ಆರ್ಸಿಬಿ ರಾಹುಲ್ರನ್ನು ಟ್ರಾನ್ಸ್ಫರ್ ಮಾಡಲಾಗಿತ್ತು. ಮತ್ತೆ ತವರು ತಂಡವಾದ ಆರ್ಸಿಬಿಗೆ ಬಂದ ನಂತರ ರಾಹುಲ್, ಟಿ-20 ಮಾದರಿಯಲ್ಲಿ ರನ್ಗಳಿಸುವುದನ್ನು ಕರಗತ ಮಾಡಿಕೊಂಡಿದ್ದರು. ಆ ಸೀಸನ್ನಲ್ಲಿ 44ರ ಸರಾಸರಿ ಹಾಗೂ146.49ರ ಸ್ಟ್ರೈಕ್ರೇಟ್ನಲ್ಲಿ 397 ರನ್ ಸಿಡಿಸಿದ್ದರು. ಇದರಲ್ಲಿ 4 ಸತತ ಅರ್ಧಶತಕವೂ ಸೇರಿತ್ತು.
2017ರಲ್ಲಿ ಭುಜದ ಗಾಯಕ್ಕೆ ತುತ್ತಾಗಿ ಆ ಸೀಸನ್ನಿಂದ ಹೊರಗುಳಿದಿದ್ದರು. ನಂತರ 2018ರಲ್ಲಿ ಭಾರಿ ಬೇಡಿಕೆ ಸೃಷ್ಟಿಸಿ 11 ಕೋಟಿಗೆ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡ ಸೇರಿ ಭರ್ಜರಿ ಬ್ಯಾಟಿಂಗ್ ಪ್ರದರ್ಶನ ನೀಡಿದ್ದರು. ಈ ಸೀಸನ್ನಲ್ಲಿ 659 ರನ್ ಸಿಡಿಸಿದ ರಾಹುಲ್ ಎರಡು ಬಾರಿ 90 ಪ್ಲಸ್ ಸೇರಿದಂತೆ 6 ಅರ್ಧಶತಕ ಸಿಡಿಸಿ ಮೂರನೇ ಗರಿಷ್ಠ ಸ್ಕೋರರ್ ಆದರು.
ಒಟ್ಟಾರೆ ಟೆಸ್ಟ್ಗೆ ಸೀಮಿತವಾಗಿದ್ದ ರಾಹುಲ್ ಇಂದು ಸ್ಫೋಟಕ ಆಟಗಾರನಾಗಲು ಮೆಕಲಮ್ ಆಟ ಸ್ಪೂರ್ತಿಯಾದರೆ, ಆರ್ಸಿಬಿ ಆತನನ್ನು ಒಬ್ಬರ ಸ್ಫೋಟಕ ಆಟಗಾರನನ್ನಾಗಿ ತಯಾರು ಮಾಡಿತು ಎಂಬುದನ್ನು ಕೆಎಲ್ ರಾಹುಲ್ ಹೆಮ್ಮೆಯಿಂದ ಹೇಳಿಕೊಳ್ಳುತ್ತಾರೆ. ಈ ಸಂದರ್ಭದಲ್ಲಿ ತಮಗೆ ನೆರವಾದ ಕೊಹ್ಲಿ, ಗೇಲ್ ಹಾಗೂ ಎಬಿ ಡಿ ವಿಲಿಯರ್ಸ್ ಅವರನ್ನು ಕೂಡ ನೆನೆಪಿಸಿಕೊಂಡು ಧನ್ಯವಾದ ತಿಳಿಸಿದ್ದಾರೆ.
